Նապոլեոն Ազիզյանը՝դատական քաշքշուկների, եւ ակտիվ քաղաքականություն վերադառնալու մասին

Ազգային ժողովի նախկին ԲՀԿ-ական պատգամավոր Նապոլեոն Ազիզյանին պատկանող «Միլարի» ՍՊԸ-ի սնանկության հարցով դատավարությունը շարունակվում է: Այդ մասին Fnews.am-ի հետ հետ զրույցում ասաց «Միլարի» ՍՊԸ-ի փաստաբան Լեռնիկ Հովհաննիսյանը, ով անդրադարձավ դատաքննության մանրամասներին:

Նրա խոսքով` այս պահին «Հայբիզնեսբանկ»-ի դեմ 2 հայց կա ներկայացված. դրանցից մեկը հատուցման, բռնագանձման, մյուսը` սնանկության վայրույթի ճանաչելու մասով է: Այսօրվա դրությամբ դատավարությունն ընթանում է ընկերության սնանկության վարույթում, որի շրջանակներում էլ քննարկվում են նաև բռնագանձման հետ կապված հարցերը: Փաստաբանի պարզաբանմամբ` «Միլար» ՍՊԸ-ն հողամասի սեփականատեր և կառուցապատող ընկերություն է եղել: 2013 թվականի «Հայբիզնեսբանկը», որը վարկ էր տրամադրել «Միլար» ՍՊԸ-ին, իրականացրել է գույքի բռնագանձում:

Լեռնիկ Հովհաննիսյանի խոսքով, նշանակված փորձաքննության արդյունքում պարզվել է, որ բանկի կողմից իրականացված բռնագանձումն անօրինական է եղել: «Ըստ մեր ձեռքին վերջերս հայտնված բանկի խորհրդի որոշման, թույլատրվել է ՍՊԸ-ից բռնագանձման հիման վրա շենքի անշարժ գույքը վաճառել մի քաղաքացու` 32մլն 133 հազար ՀՀ դրամ վճարելու պայմանով: Պարզվում է, որ գնահատում կատարվել է ոչ թե բանկի վաճառած գնով, այլ 29 մլն 437 հազար ՀՀ դրամով: Այսինքն՝ փաստաթղթերով ապացուցվում է, որ «Հայբիզնեսբանկի» կողմից ոչ միայն ապօրինի բռնագանձում է կատարվել, այլ նաև բանկի աշխատակիցները վաճառքի են հանել չգնահատված գույքը»,- ընդգծում է Լեռնիկ Հովհաննիսյանը: Մեջբերելով ՀՀ քաղաքացիական օրենսգրքի համապատասխան հոդվածը` նա պարզաբանում է, որ բռնագանձում իրականացնելու դեպքում անհրաժեշտ է գույքը տվյալ օրում գնահատել որպեսզի հստակ որոշվի, թե տվյալ ընկերությունից ինչ արժեքի գույք են վերցնում: Սակայն, ըստ փաստաբանի, «Հայբիզնեսբանկ»-ը սկզբնական բռնագանձում չի իրականացրել և անհրաժեշտ գումարից ավելի շատ գույք է բռնագանձել: Նրա դիտարկմամբ` այժմ բանկը պետք է այդ չափով գումար հետ վերադարձնի «Միլլար» ՍՊԸ-ին:

Թեմայի շուրջ ԱԺ նախկին պատգամավոր Նապոլեոն Ազիզյանից պարզաբանումներ չստացանք, քանի որ նա ընկերության սնանկության հարցով դատավարության հետ կապված ոչ մի հարցի չի պատասխանում 2 պատճառով. մի կողմից՝ իր իսկ խոսքով, «կոմպետենտ չէ» պատասխանել որևէ հարցի և նախընտրում է որպես մասնագետ, այդ հարցերով զբաղվի փաստաբանը, կողմից էլ` հոգնել է 2 տարի շարունակվող քաշքշուկներից ու դատական գործընթացից: «Ես չեմ խառնվում… եթե հարցեր կան` իրավաբանի հետ…»,-մեզ հետ զրույցում նկատեց Նապոլիոն Ազիզյանը` հավելելով, որ նա չի էլ հետևում այդ գործով ընթացքող դատավարությանը:

Նապոլեոն Ազիզյանը ձեռնպահ մնաց նաև իր քաղաքականություն վերադառնալու հետ կապված հարցին հստակ պատասխանելուց: Համենայնդեպս մեր հարցին, թե պատրաստվո՞ւմ է արդյոք նա վերադառնալ քաղաքականություն և որ ուժի հետ է ինքն իրեն տեսնում, նախկին ԲՀԿ-ական պատգամավորը պատասխանեց. «Չկա նման բան… հետո գուցե լինի, չգիտեմ…»,-ասաց նախկին  պատգամավորը:

Ա. Սահակյան