Նարեկ Մակարյանն առաջիկայում հանդես կգա ռուսական ֆիլմում

Երգիչ Նարեկ Մակարյանը որոշել է ուժերը փորձել նաև որպես դերասան: ATV հեռուստաընկերությամբ արդեն մեկ ամսից ավել ցուցադրվող «Կյանքից առավել» հեռուստասերիալի շրջանակներում նրան հանդիպում ենք սերիալի գլխավոր հերոսի՝ Միքայելի կերպարում: Life.panorama.am-ի հետ զրույցում նա անկեղծացավ. թեև հետաքրքիր, բայց շատ պատասխանատու ու բավականին դժվար քայլ էր այս նոր կարգավիճակը. «Ինձ վրա շատ եմ աշխատում, որպեսզի կարողանամ ավելի լավ ներկայանալ: Ամեն օր պրոֆեսիոնալ դերասանների հետ շփվելով՝ իրենցից շատ բան եմ սովորում: Կարծես թե արդեն փոփոխություն զգում եմ»:

 Դերասանական առաջին քայլերը կատարող երգիչն արդեն իսկ առաջարկ է ստացել նկարահանվել գեղարվեստական ֆիլմում: Դեռևս մանրամասներ հրապարակել չի կարող, քանի որ ֆիլմը քննարկման փուլում է: Միակ տեղեկությունը, որ նա կարողացավ փոխանցել, այն էր, որ նախատեսվող ֆիլմը ռուսական կինոշուկայի համար է: Սակայն, երգչի վստահեցմամբ, կողմնակի զբաղվածությունը չի խանգարում իրեն երգարվեստի մեջ: Շուտով իր երկրպագուներին կներկայացնի գեղեցիկ հեղինակային մի երգ: