ՆԱՏՕ-ն հաջորդ շաբաթ կքննարկի անվտանգության երաշխիքների վերաբերյալ Ռուսաստանի առաջարկները

ՆԱՏՕ-ի անդամ երկրները հաջորդ շաբաթ Հյուսիսատլանտյան խորհրդում կքննարկեն անվտանգության երաշխիքների վերաբերյալ Ռուսաստանի առաջարկները։ Այս մասին կիրակի հայտարարել է Գերմանիայի պաշտպանության նախարար Քրիստին Լամբրեխտը՝ Լիտվա կատարած այցի ժամանակ: Այս մասին փոխանցել է ՏԱՍՍ-ը։

«Ես հստակ հասկացրել եմ, որ պետք է կարգավորենք լարված իրավիճակը, որում գտնվում ենք՝ ինչպես դիվանագիտական ​​մակարդակով, այնպես էլ զսպման վստահելի միջոցների միջոցով։ Դրանց է վերաբերում նաեւ այն փաստը, որ մենք պետք է խոսենք միմյանց հետ», - ասել է նա իր լիտվացի գործընկեր Արվիդաս Անուշաուսկասի հետ մամուլի ասուլիսի ժամանակ: «Սա նշանակում է, որ Ռուսաստանի կողմից ներկայացված առաջարկների քննարկումը ճիշտ եւ կարեւոր է, սակայն անհնար է [թույլ տալ] Ռուսաստանին թելադրել ՆԱՏՕ-ի գործընկերներին՝ ինչպես դիրքավորվել», - պնդել է նախարարը։ «Դա պետք է պարզ լինի, եւ մենք հստակ կհասկացնենք խորհրդակցությունների ընթացքում», - շարունակել է Լամբրեխտը:

«Այդ առաջարկները կքննարկենք հաջորդ շաբաթ Հյուսիսատլանտյան խորհրդում», - ասել է ԳԴՀ պաշտպանության նախարարը։

Լամբրեխտը նաեւ ընդգծել է, որ որպես նախարար իր առաջին այցը Լիտվա է կատարել «միանգամայն գիտակցաբար»: «Մենք ամուր կանգնած ենք մեր գործընկերների եւ ընկերների կողքին», - հայտարարել է նա: «Մենք ՆԱՏՕ-ում պատրաստ ենք վճռականորեն եւ միասնաբար հանդես գալ մեր դաշնակիցների անվտանգության համար», - ասել է Լամբրեխտը: Նա նշել է, որ դաշինքն ուշադիր հետեւում է Ուկրաինայում տիրող իրավիճակի զարգացմանը։