Ներկայիս վիճակը համախմբման հիմք կարող է դառնալ մեր ազգի և սփյուռքի համար

Ադրբեջանական կողմն իր ագրեսիվ պահվածքով և անընդմեջ կրակոցներով փորձում է իբր թուլացնել մեր դիրքերը, սակայն ինչպես տեսնում ենք, որոշների մուրազները փորներում է մնում: Ունենալով հայրենասեր և լավ պատրաստված զինվորներ, հայկական բանակը շարունակում է ամուր կանգնած մնալ իր դիրքերում: Իսկ թե սահմանը պահող զինվորների վրա ի՞նչ ազդեցություն կարող են թողնել ադրբեջանական գործողությունները հոգեբանական տեսանկյունից, Fnews.am-ը ճշտեց հոգեբան Արշակ Գասպարյանից.
-Հոգեբանական տեսակետից այդ հարցին կարող ենք նայել երկու տարբերակով: Առաջինը՝ սեփական վախից թշնամին ցանկանում է դիմացինին ոչնչացնել, և երկրորդը՝ դա հրահրման գործընթացն է, երբ դիմացինին փորձում են գցել ծուղակը: Դիմացինին հրահրելով ստիպում են, որի նա սխալվի, սակայն որպես կանոն մենք գիտենք, որ հարձակվողը շատ ավելի քիչ է պաշտպանված քան պաշտպանվողը:
-Փաստորեն, նրանք հուզականության վրա՞ են շեշտադրում կատարում:
-Նախ կցանկանայի նորից շեշտել այն հանգամանքը, որ, այո, հրահրում կա, որովհետև հարձակումը ոչ այդքան պլանավորած գործողությունների է տանում: Այդ դեպքում էլ արդեն դիմացինը խաղում է հուզական վիճակի վրա, ենթադրվում է, որ էմոցիոնալ լինելով հակառակ կողմին կանգնածը կվազի դեպի իրեն և թույլ կտա սխալներ: Ծուղակը հիմնված է հուզական ապրումների վրա, ոչ այնքան պլանների:
-Ձեր կարծիքով, հակառակորդի նման քայլերը կարո՞ղ են հոգեբանական ճնշում առաջացնել զինվորների վրա:
-Հոգեբանական ներազդում միգուցե, բայց ճնշում՝ ոչ, սակայն մենք գիտենք, որ մեր տղաները քաջատեղյակ են հակառակորդի աշխատելաոճին եւ կարող են իրենց ճիշտ տիրապետել ու չենթարկվել պրովկացիաների: Ես ենթադրում եմ, որ ներկայիս վիճակը համախմբման հիմքերից մեկը կարող է դառնալ մեր ազգի և սփյուռքի համար, քանի որ մենք օրհասական իրավիճակներում սկսում ենք համախմբվել:
Վ. Սաֆարյան