Ներքին շուկայում դեֆիցիտ կառաջանա. Վ.Խաչատրյան

Shabat.am-ը գրում է. ԵՏՄ անդամակցության հետ կապված սննդամթերքի գնի հնարավոր թանկացումն այսօր մեր հասարակությանն ամենաշատ մտահոգող հարցերից է: Shabat.am-ի լրագրողի հետ զրույցում ՀԱԿ անդամ, տնտեսագետ Վահագն Խաչատրյանը նշեց, որ. «Չնայած հայաստանյան իշխանության ներկայացուցիչները ասում էին, որ իրենք բազմաթիվ ապրանքատեսակների հետ կապված արտոնություններ են ստացել և 3-5 տարվա ընթացքում մաքսադրույքաչափերը չեն փոխվելու, սակայն պարզվում է, որ կան մսատեսակներ, որոնց գները կբարձրանան մինչև 30-40 %-ի չափով: Կան նաև ուրիշ ապրանքատեսակներ, որոնց մաքսադրույքների բարձացման հետ կապված կարձանագրենք գնաճ: Դա արդեն կախված է նրանից, թե ինչքանով դրանք փոխարինելի կլինեն:
Սակայն չի բացառվում, որ ՀՀ ներքին շուկայում նույնպես արձանագրվի սպառողական ապրանքների գնաճ: Եթե մի որևէ ապրանքատեսակ դրսում պահանջարկ է ունենում, ներքին շուկայում տվյալ ապրանքի դեֆիցիտ է արձանագրվում: Դա 2 հանգամանքից է բխում. 1-ին՝ Հայաստանը փոքր շուկա ունի, արտահանման ծավալներն են քիչ և,իհարկե, երկրիրը սխալ տնտեսական քաղաքականություն է վարում»:
Shabat. am-ի այն հարցին, թե արդյո՞ք հնարավոր է գրանցվի արտահանման ծավալների աճ՝ Խաչատրյանը պատասխանեց.«Խնդիրն այն է, որ եթե փոխվի Ռուսաստանի հարաբերություններն այն պետությունների հետ, որոնց հետ մինչ այդ ազատ առևտրի նորմերն էին գործում, ապա դա հնարավորություն կտա դեպի մաքսային միության երկրներ Հայաստանից արտահանվող մթերքների աճին: Թե ինչքանո՞վ Հայաստանը կօգտվի այդ հնարավորությունից՝ ցույց կտա ժամանակը»:

Իսկ, ահա Սպառողների միության նախագահ Արմեն Պողոսյանն այս առումով ունի իր տեսակետը. «Մեզ մոտ խելամիտ չի վարվում տնտեսությունը: Արտահանման ծավալները խիստ սակավ են: Օրինակ՝ եթե մենք համեմատենք Հայաստանի և Վրաստանի գինու արտահանումը, ապա կարող եմ ասել, որ ուղղակի ողբալի են այդ ցուցանիշների համեմատ: Մենք երբեք չենք կարող մրցակցել և հասնել արտահանման նման ցուցանիշների, սակայն այսօրվա արտահանման ծավալները կրկնապատկել մենք պարտավոր ենք: Վերջին տարում մեզ մոտ գինու արտադրությունը և արտահանումը նվազել է: Բերենք օրինակ. երբ ՌԴ-ն արգելեց վրացական գինիների մուտքը պետություն, այդ հսկա պետության գինիների շուկան 35 %-ով դատարկվեց: Այդպիսի դրախտային պայմաններ չեն լինում, սակայն մեր պետությունը չօգտվեց ստեղծված հնարավորությունից: Այսինքն մենք տնտեսությունը վատ ենք վարում և մեր տնտեսական շահերը լավ չենք կառավարում»: