Նեղն ընկած պահին Ռուսաստանն աջակցեց իր դաշնակիցներից Սիրիային, բայց ոչ Հայաստանին

«Ասպարեզ»-ը գրում է.

Վերջին տարիներին ՀՀ ներքին և արտաքին քաղաքականու­թյան վրա Ռուսաստանի ազդե­ցությունն այնքան է մեծացել, որ թվում է, թե ՀՀ իշխանություննե­րի թողտվությամբ այդ երկիրը տնտեսական և քաղաքական ինտերվենցիա է իրականացնում Հայաստանի դեմ։

Կտրուկ քայլեր կատարելու հա­մար Հայաստանն ունի՞ բավա­րար չափով հզորություն և ինք­նուրույնություն Ռուսաստանից «պաշտպանվելու» նպատակով։ Օրինակ՝ ԵՏՄ անդամ չհանդիսացող, բայց մեր հիմնական հա­կառակորդ Ադրբեջանի աշխարհաքաղաքական շահերը սպա­սարկող ԵՏՄ-ից Հայաստանի Հանրապետության հնարավոր դուրս գալն ի՞նչ հետևանքների կարող է հանգեցնել մեր երկրի համար։

Եթե ՌԴ կողմից ՀՀ իշխանու­թյունների վրա, իրոք, ճնշում է գործադրվում, ապա այդ դեպ­քում հնարավոր է՝ ՌԴ-ն ավելի ագրեսիվանա։ Հաշվի առնելով նաև վերը նշված կառույցում մեր դերի և նշանակության բացա­կայությունն այս պահին՝ ԵՏՄ-ից դուրս գալը ճիշտ որոշում կլի­ներ։ Սակայն մենք ՌԴ-ի հետ կապված ենք տնտեսական և քաղաքական մի շարք խողովակ­ներով, ինչը բավական բարդաց­նում է այս հարցում, ինչպես նաև մեր երկրի արտաքին քաղա­քականությանը վերաբերող այլ հարցերում որոշումների ինքնու­րույն ընդունման գործընթացը։

ՌԴ-ից մեր պետության ունեցած տնտեսական, քաղաքական կախվածությունը և ԵՏՄ-ից մեր երկրի հնարավոր դուրս գալու հետևանքները ներկայացնենք մի քանի կետերով.

1. Մեր տնտեսության կարևորագույն ճյուղերը գտնվում են Ռուսաստանի վերահսկողության տակ։ Ժամանակին «Գույք պարտքի դիմաց» գործարքով ՀՀ իշխանությունները ՌԴ-ին հանձնեցին մի շարք ձեռնարկություն­ներ («Մարս» գործարանը, կա­ռավարման ավտոմատացված համակարգերի և նյութաբանության գիտահետազոտական ձեռնարկությունները, էներգետիկ համակարգը և այլն), որոնք մինչ օրս ռուսական կողմը չի աշխա­տեցնում, ուստի հայկական կող­մը դրանք պետք է ետ վերցնի ռուսներից։ Մեր երկրում հիմնա­կան վառելիքի՝ գազի օգտա­գործման հարցում ևս մենք մեծ չափով կախված ենք Ռուսաս­տանից։ Օրինակ՝ ԵՏՄ-ից դուրս գալու դեպքում Ռուսաստանը կարող է բարձրացնել գազի սա­կագինը սահմանին։

2. ՌԴ-ում մեր հայրենակիցների թվաքանակը բավական շատ է՝ 1 միլիոնից ավել։ Այլ կերպ ասած՝ ՌԴ-ն հայերի համար կարելի է համարել «երկրորդ հայրենիք»։ ՌԴ-ում բնակվող մեր հայրենա­կիցների՝ Հայաստան ուղարկած տրանսֆերտների հաշվին են մե­ծամասամբ գոյատևում հայաստանաբնակները, քանի որ մեր բյուջեի միջոցները բավական սուղ են, իսկ արդյունաբերությու­նը բավական թույլ է զարգացած։ ԵՏՄ-ից մեր երկրի հնարավոր դուրս գալը կարող է հանգեցնել ՌԴ իշխանությունների կողմից ռուսաստանաբնակ հայերի վրա ինչ-ինչ ճնշումների գործադրմանը։

3. Ռուսաստանը երբեմն օգտա­գործում և հետագայում էլ ավե­լի մեծ չափով կարող է մեր դեմ օգտագործել Թուրքիային, մաս­նավորապես Ադրբեջանին՝ այդ երկրների հետ մեր ունեցած հիմնախնդիրների համատեքստում։ Մեր երկրի կախվածությունը ՌԴ-ից առավել մեծ է այն առումով, որ Հայաստանում, մասնավորա­պես Գյումրիում է գտնվում 102-րդ ռուսական ռազմաբազան, որը, ըստ հայ-ռուսական համա­պատասխան համաձայնագրի, ապահովում է մեր երկրի անվ­տանգությունը։

Դատելով վերևում նշվածներից՝ կարելի է եզրակացնել, որ ԵՏՄ-ից ՀՀ դուրս գալը կարող է մեզ համար անցանկալի հետև­անքներ ունենալ։ Սակայն այդ պարագայում նաև հնարավոր է, որ Հայաստանի դերն ու նշա­նակությունը Ռուսաստանի հա­մար ավելի բարձրանա։

Ամբողջական տեքստը՝ թերթի այսօրվա համարում: