«Նկարած ունենանք ձեզ»…

Պատկերացրեք, որ ԱԺ-ում չեք, չեք տեսնում, թե ինչ է կատարվում, բայց լսում եք այսպիսի խոսակցություններ.

տղամարդ 1.-«Արի քեզ մի հատ պաչեմ»
կնոջ ձայն- «Մեր ոչը ոճ ա, ոչը ոչ ա, ոճը` ոճ ա…»/անհայտ պատճառով կնոջ լեզուն միամտաբար, թե միտումնավոր «սարվատ ա» լինում…/
տղամարդ 2.- «Իմ կնիկը գեշ ա, արի մի հատ գրկեմ քեզ»…
տղամարդ 3.- «Արա¯, էս ինչքա~ն սիրուն ծտեր, աղջիկներ կան…»
տղամարդ 4.- «Ո՞ր սաունան ենք խոդ տալիս…»
կնոջ ձայն 2.-«Մի փոքրիկ հարցազրույց կտա՞ք…»
տղամարդ 5.- «40 աստիճան ջերմության մեջ վառվում եմ…»
սեռը չճշտված ձայն –Շըլըփ…/մեկը հայտնվեց հորիզոնական վիճակում. դեռ հայտնի չէ` մենակ, թե ինչ-որ մեկի հետ գրկախառնված/:

Համապատասխան հնչերանգներով այս խոսակցությունն ու ձայները կողքից լսողը կմտածի, թե մի խումբ «կայֆարիկներ» մի աղջկա հետ գնացել են շոգեբաղնիք: Կերել-խմել են, հետո փորձել են նրան ինչ-որ բան համոզել, նա էլ այնպես է ասել «ոչ»,որ դրա մեջ լիքը խտացված «հա» է եղել: Ու այդ պարտադիր, բայց ոչ պարտադրված «ոչից» տղամարդիկ այնքան են գրգռվել, որ հանկարծ հայտնվել են աղջիկների շրջապատում ու փորձել են իրենց «սրտի հուրը» փոխանցել նրանց…պաչելու, գրկելու, սաունա գնալու անհագ ու անթաքույց ցանկությամբ: Մեկը նույնիսկ գլուխն այնքան է կորցրել, որ շտապելուց կամ երևակայական վազքից շփոթված` հայտնվել է պառկած վիճակում. միայնակ կամ ինչ-որ մեկին գետնին «տապալած» /լավ իմաստով/:
Բայց թարսի նման այս խոսակցությունը եղել է ԱԺ-ում, խոսողներն էլ` բարեբախտաբար, թե դժբախտաբար` քաղաքական սերն ու սեքսը /կամ գուցե ֆիզիկական/ խառնած պատգամավորներ, որոնց հետևած լրագրողներն արձանագրել են, որ պատգամավորները ոչ սթափ են կամ հարբած: Նախօրեին տարբեր լրատվամիջոցներում հայտնվեցին նաև ՀՀԿ-ական այդ պատգամավորների անունները` Առաքել Մովսիսյան, Վարդան Այվազյան, Արայիկ Գրիգորյան, որոնց «չէ» ասողը եղել է սթափ վիճակում գվտնված Նաիրա Զոհրաբյանը: Դե, նրան էլ, ՀՀԿ-ականները օբյեկտիվ և սուբյեկտիվ պատճառներով չէին կարող անպարկեշտ առաջարկ անել, և ամենայն հավանականությամբ դա ունեցել է քաղաքական ենթատեքստ, որին կին պատգամավորը արձագանքել է`«մեր ոճը ոչ է, մեր ոչը ոճ է…»: Եվ հետաքրքիր է, որ ինչպես էլ արտասանես այդ միտքը, ԲՀԿ-ի դեպքում ճիշտ է ստացվում. «չէ»- ն ձևի /ոճի/ համար են ասում:

Նրանք` ՀՀԿ իշխանությանը, նրա ծրագրերին ասում են «ոչ», բայց միշտ ստացվում է «այո» ինչպես եղավ նախօրեին. ՀՀԿ «ֆուտլյարով» բայց ԲՀԿ հոգով վարչապետ Հովիկ Աբրահամյանը նոր կառավարության ծրագիրը ներկայացնելիս անհանգստության նշաններ ցույց տվեց, որ ԱԺ նիստերի դահլիճում ներկա ՀՀԿ պատգամավորների քիչ թվաքանակի ու ԲՀԿ-ի չաջակցելու դեպքում այն կարող է տապալվել: Բայց եղավ այն, ինչ եղավ… Նաիրա Զոհրաբյանը ՀՀԿ-ականներին «չէ» ասելով մտավ դահլիճ, բայց ծրագիրն ընդունվեց 70 կողմ ձայնով…
Հ.Գ. Այսինքն, քաղաքական ուժերն ինչ ուզում` անում են. ուտուշ-խմուշի սեղանի շուրջ պայմանավորվում են, հետո ինքնագոհ դուրս գալիս. լրագրողներին վիրավորում են, իսկ երբ «դոբրի կայֆի» մեջ են, էլի վիրավորում են, բայց արդեն գրկելու, պաչելու ձևով: Եվ լրագրողներին մնում է` միայն նկարելը ու պատասխանելը. «Նկարած ունենանք ձեզ…»:

Էլմիրա Մարտիրոսյան