Նոր Հայաստանում էլ հնարավոր է գործ կարել

hraparak.am-ը գրում է.

ՊՎԾ պետի երիտասարդ ու հարուստ տեղակալ, պետի ժամանակավոր պաշտոնակատար Արգիշտի Քյարամյանը երեկ կառավարության նիստից հետո էլ ավելի խճճեց իր միլիոնների կարողության ծագումնաբանությունը․ եթե անցած շաբաթ նա ասել էր, ապա հայտարարություն տարածել՝ պարզաբանելով, որ հայտարարագրում նշված ավելի քան 32 միլիոն դրամը նվեր է ստացել արտերկրում գտնվող քեռուց եւ արտագնա աշխատանքի մեկնած հարազատներից, ապա երեկ պարզվեց, որ դրա մի մասն էլ կնոջ «օժիտն» է. «Ես ամուսնացել եմ ավելի վաղ, քան պետական պաշտոն զբաղեցնելս: Կինս գումարներն ունեցել է մեր ամուսնությունից առաջ, եւ ես այս գումարները եւս հավատարմագրել եմ»: Քյարամյանն ասաց, որ այդ գումարներն ինքն ունեցել է մինչեւ պետական պաշտոն զբաղեցնելը։ Հերքեց նաեւ Հայ առաքելական եկեղեցու Կոտայքի թեմի առաջնորդի որդին լինելու մասին լուրերը՝ ասելով, որ ազգակցականներ են։ Կոնկրետ ի՞նչ ազգական է Ձեզ։ «Ես իր հորեղբոր թոռն եմ»։ Քյարամյանի հետ զրուցեցինք նաեւ այլ թեմայի շուրջ։

- Մենք որոշակի առումով ուսումնասիրություններ անելու հնարավորություն ունենք ուժային կառույցներում, ունենք համապատասխան վարչություն, ով որ զբաղվում է այդ հարցով, եւ այդ վարչությունն էս պահին զբաղված է ՔԿՀ-ներում ուսումնասիրություններ կատարելու գործընթացով, որն ավարտական փուլին է մոտենում, եւ արդյունքներն ամփոփելուց հետո պետք է քննարկվի հաջորդ կառույցը, որտեղ որ պետք է իրականացվի ուսումնասիրություն, որտեղ որ պետք է իրացվեն էդ վարչության ռեսուրսները։

- Կոնկրետ ԱԱԾ-ն լինելո՞ւ է, թե՞ ոչ։

- Հնարավոր է նաեւ․․․ ցանկացած ուժային կառույց․․․ Այդ վարչության ուսումնասիրության ոլորտը շուրջ 28 կառույց է նախատեսում, այդ թվում՝ ԱԱԾ-ն։

- Դուք համաձա՞յն եք այն կարծիքների հետ, որ նոր Հայաստանում կարող են գործ կարել որեւէ պաշտոնյայի վրա, ինչպես նշում են ՊՎԾ պետի հետ կապված գործի մասին։

- Ես կարծում եմ, որ ընդհանրապես ցանկացած պետությունում իրավապահ համակարգն անընդհատ զարգացող համակարգ է, եւ իրավապահ համակարգում գործող որոշակի անհատներ ցանկացած երկրում կարող են դուրս գալ իրենց պաշտոնեական լիազորությունների շրջանակներից։ Հետեւաբար, նաեւ Հայաստանի Հանրապետությունում բացառել նման երեւույթ, հնարավոր չէ։

- Այսինքն՝ հնարավոր է գործ կարել։

- Ես պարզ ասեցի՝ գործ կարել կորակվի, պաշտոնեական դիրքի չարաշահում կորակվի, թե ավելի պատկերավոր ասեմ՝ ինչ-որ մի վայրում ինչ-որ մի օպերլիազոր, քննիչ իր պաշտոնեական դիրքն ինչպես կչարաշահի, ինչպես դուրս կգա պաշտոնեական դիրքի սահմաններից, հնարավոր չէ բացառել, ոչ էլ հնարավոր է տոտալ վերահսկողության ենթարկել ոլորտը։

- Խոսքը կոնկրետ Դավիթ Սանասարյանի գործի մասին է, նրա պաշտպանները, մտերիմները կամ, ընդունված է ասել՝ «սորոսականները» պնդում են, որ ԱԱԾ-ն գործ է կարում․ այս մակարդակում հնարավո՞ր է անել դա։

- Նախ «սորոսական թիմ» ասվածը չեմ հասկանում, ես չեմ հասկանում, թե այդ համատեքստում ինչ կապ ունի Դավիթ Սանասարյանը, քանի որ կա քրեական գործ, բնականաբար, ես թույլ չեմ տալու գործի հետ կապված մեկնաբանություն տալու։ Բայց շարունակում եմ պնդել, որ Դավիթ Սանասարյանն իմ համար բացառիկ հայրենասեր եւ մարդկային բարձր արժեքների առումով բարձր անձնավորություն է։

- Այսինքն՝ Դուք բացառում եք, որ նա կարող է ներգրավված լինել որեւէ կոռուպցիոն գործարքում։

- Քրեական գործ գոյություն ունի, եւ այս շրջանակում կարծիք տալը սխալ է։