Նոր Կյանքի դպրոցի տնօրենին ու նրա պաշտոնյա մորն ազատազրկում է սպառնում

Արարատի մարզի Նոր Կյանք համայնքի դպրոցի տնօրենի, նրա մոր դեմ մեղադրանք է առաջադրվել և նախորդ տարվա ավարտին գործն ուղարկվել է դատարան: Մոր, որդու և միջնորդող անձի գործունեությունից տուժող է ճանաչվել 33 անձ:

Դպրոցի տնօրեն Արամ Ստեփանյանին մեղադրանք է առաջադրվել այն բանի համար, որ նա, ուսումնական հաստատության ղեկավար պաշտոնի հավակնորդ դառնալու համար օգտագործել է իրավունք վերապահող ակնհայտ կեղծ փաստաթղթեր՝ ՀՀ կրթության և գիտության նախարարություն է ներկայացրել աշխատանքային ստաժի վերաբերյալ կեղծ տեղեկանք և աշխատանքային գրքույկ: Մոր՝ Օֆելյա Մուրադյանի կազմակերպմամբ Սամվել Գրիգորյանից ստացել է խոշոր չափերով՝ 400.000 ՀՀ դրամ կաշառք, Գայանե Հովհաննիսյանից՝ կրկին Օֆելյա Մուրադյանի կազմակերպմամբ և Տիգրան Ասատրյանի միջնորդությամբ՝ խոշոր չափերով՝ 616.845 ՀՀ դրամին համարժեք 1.500 ԱՄՆ դոլար կաշառք, իսկ Սամվել Բադալյանից անձամբ պահանջել և ստացել է ևս խոշոր չափերով՝ 637.000 ՀՀ դրամ գումար կաշառք: Բացի այդ, պաշտոնեական դիրքի օգտագործմամբ, յուրացման եղանակով հափշտակել է դպրոցի աշակերտների ծնողների կողմից իրեն վստահված գումարներից 180.000 ՀՀ դրամը, դպրոցի դասագրքերի վարձավճարների համար հավաքված և իր վստահությանը հանձնված գումարներից՝ 264.184 ՀՀ դրամը և դպրոցի կարիքների համար ձեռք բերված խոշոր չափերով՝ 622.350 ՀՀ դրամ ընդհանուր արժողությամբ իրեն վստահված տարբեր տեսակի տնտեսական, շինարարական և գրասենյակային գույքը:

Այնուհետև Արամ Ստեփանյանը, «Նոր Կյանքի միջնակարգ դպրոց» ՊՈԱԿ-ի տնօրենի պաշտոնով պայմանավորված իր պաշտոնեական դիրքն օգտագործելով, յուրացման եղանակով հափշտակել է 2014-2015 թվականների ուսումնական տարվա դպրոցի 5-12-րդ դասարանների աշակերտների կողմից որոշակի ներդրումների պայմաններով վերջիններիս տրամադրված դասագրքերի համար դպրոցի ուսուցիչների կողմից հավաքված և դպրոցի՝ հիմնադրամի ենթահաշվին փոխանցման ենթակա գումարներից իր վստահությանը հանձնված՝ 264.184 ՀՀ դրամը՝ այն ծախսելով իր անձնական նպատակներով:

Մեղադրանք է առաջադրվել նաև Նոր Կյանք համայնքի դպրոցի տնօրենի մորը՝ Օֆելյա Մուրադյանին, ով զբաղեցնում է Արարատի մարզպետարանի աշխատակազմի կրթության, մշակույթի և սպորտի վարչության գլխավոր մասնագետի պաշտոնը:

Մուրադյանին մեղադրանք է առաջադրվել այն բանի համար, որ նա, կազմակերպել է որդու՝ պաշտոնատար անձ հանդիսացող Արամ Ստեփանյանի կողմից Սամվել Գրիգորյանից խոշոր չափերով՝ 400.000 ՀՀ դրամ և Տիգրան Ասատրյանի միջնորդությամբ՝ Գայանե Հովհաննիսյանից՝ խոշոր չափերով՝ 616.845 ՀՀ դրամին համարժեք 1.500 ԱՄՆ դոլար կաշառք ստանալը:

Մեղադրանք է առաջադրվել նաև Տիգրան Ասատրյանին այն բանի համար, որ նա, նպաստել է կաշառք տվողի՝ Գայանե Հովհաննիսյանի և Օֆելյա Մուրադյանի կազմակերպմամբ, պաշտոնատար անձ հանդիսացող կաշառք ստացողի՝ Արամ Ստեփանյանի միջև խոշոր չափերով՝ 616.845 ՀՀ դրամին համարժեք 1.500 ԱՄՆ դոլար կաշառքի շուրջ համաձայնության գալուն:

Արամ Ստեփանյանին մեղադրանք է առաջադրվել ՀՀ քրեական օրենսգրքի 325-րդ հոդվածի 1-ին մասով՝ փաստաթղթեր կեղծելը, պատժվում է տուգանքով՝ նվազագույն աշխատավարձի երկուհարյուրապատիկից չորսհարյուրապատիկի չափով, կամ ազատազրկմամբ՝ առավելագույնը երկու տարի ժամկետով: Մեղադրանք է առաջադրվել 311-րդ հոդվածի 3-րդ մասի 3-րդ կետով՝ իրական կամ ենթադրյալ ազդեցությունը շահադիտական նպատակով օգտագործելը, պատժվում են ազատազրկմամբ` հինգից տասը տարի ժամկետով` գույքի բռնագրավմամբ կամ առանց դրա և 179-րդ հոդվածի 2-րդ մասի 1-ին կետով՝ յուրացնելը կամ վատնելը խոշոր չափերով՝ պատժվում է տուգանքով` նվազագույն աշխատավարձի հինգհարյուրապատիկից հազարապատիկի չափով, կամ ազատազրկմամբ` երկուսից հինգ տարի ժամկետով:

Օֆելյա Մուրադյանին մեղադրանք է առաջադրվել ՀՀ քրեական օրենսգրքի 38-րդ հոդվածի 3-րդ մասով՝ կազմակերպել կամ ղեկավարել է հանցանքի կատարումը, ինչպես նաև ստեղծել է կազմակերպված խումբ կամ հանցավոր համագործակցություն կամ ղեկավարել է դրանք և 311-րդ հոդվածի 3-րդ մասի 3-րդ կետով՝ խոշոր չափերով կաշառք ստանալը, պատժվում է ազատազրկմամբ՝ չորսից տասը տարի ժամկետով՝ գույքի բռնագրավմամբ կամ առանց դրա:

Տիգրան Ասատրյանին մեղադրանք է առաջադրվել ՀՀ քրեական օրենսգրքի 313-րդ հոդվածի 1-ին մասով՝ կաշառքի միջնորդությունը , որը պատժվում է տուգանքով՝ նվազագույն աշխատավարձի հարյուրապատիկից երկուհարյուրապատիկի չափով, կամ կալանքով՝ առավելագույնը երկու ամիս ժամկետով, կամ ազատազրկմամբ՝ առավելագույնը երեք տարի ժամկետով:

Գործը Վեդիի դատարանում է: Այն նախագահում է դատավոր Լևոն Արազյանը: