«ՆՈՐ ՄԻՈՒԹՅՈՒՆՈՒՄ ՄԵՆՔ ԱՎԵԼԻ ԻՆՔՆԻՇԽԱՆ ԵՆՔ ԼԻՆԵԼՈՒ»

«Մենք միշտ ենք խոսել հայ-ռուսական բարեկամական հարաբերությունների սերտացման  մասին` թե՛ քաղաքական, թե՛ մշակութային, թե՛ ռազմավարական կոնտեքստում», - «Ուժեղ Հայաստան Ռուսաստանի հետ. հանուն նոր միության» շարժման հիմնադիր համաժողովի ժամանակ ընդգծեց շարժման կազմկոմիտեի անդամ, Արցախի նախկին վարչապետ ԱՆՈՒՇԱՎԱՆ ԴԱՆԻԵԼՅԱՆԸ:

- «Ուժեղ Հայաստան Ռուսաստանի հետ. հանուն նոր միության» շարժման հիմնադիր անդամներս եկել ենք այն համոզմանը, որ մինչ օրս գործող ՌԴ-ի հետ նույն քաղաքական կազմակերպության մեջ լինելը բավարար չէր, որպեսզի կարողանայինք պաշտպանել մեր անվտանգությունը: Մնացած բոլոր հարցերը երկրորդական են, եթե համեմատում ենք անվտանգության հետ: Բավական էր երկու-երեք տարի, որպեսզի որոշ արկածախնդիրներ կարողանային մեր հանրապետության 30 տարվա գործընթացը 360 աստիճանով փոխել եւ մեկ օրվա ընթացքում կորցնել մեր երկրի գրեթե 1/3-ը: Դրա համար առաջարկում ենք, որ «Ուժեղ Հայաստան Ռուսաստանի հետ. հանուն նոր միության» շարժումը լինի այնպիսի ինստիտուցիոնալ հիմքերի վրա, որպեսզի ՌԴ-ն ստիպված չլինի վերջին պահին զորքերը մտցնել հանուն մեր անվտանգության: Մենք տեսանք, որ եթե ռուսները անգամ մեկ օր ուշանային, ապա Ստեփանակերտը արդեն կլիներ հանձնված: Ինչու եմ ասում հանձնված, որովհետեւ պատերազմի երկրորդ օրվանից, լինելով Արցախում, եկել եմ այդ համոզմանը եւ մինչ օրս էլ մնում եմ այդ համոզմանը, որ պարտությունը ոչ թե իշխանությունների ապիկարության հետեւանքն էր, այլ նախապես ծրագրված էր: Եվ այսօր պետք է ճակատագրական որոշում ընդունենք, թե որ պետության հետ պետք է լինենք մեկ միության մեջ, որպեսզի կարողանանք պահպանել մեր երկրի եւ մեր ժողովրդի հարատեւությունն ու անվտանգությունը: Իսկ այն, որ  դա մենք չկարողացանք անել` այսօր ականատեսն ենք բոլորս: Մեր ընդդիմախոսները հակադրում են մեր այս առաջարկությանը ինքնիշխանության խնդիրների հետ: Դրա համար ուզում եմ ի սկզբանե ասել, որ այս հարցի հետ կապված լուրջ քննարկումներ ենք ունեցել, եւ կարող եմ վստահեցնել, որ նոր միությունում մենք ավելի ինքնիշխան ենք լինելու, ավելի անվտանգ եւ ավելի պաշտպանված` թե՛ անվտանգության, թե՛ ինքնության եւ թե՛ հավատքի տեսակետից:

ԻԼՈՆԱ ԱԶԱՐՅԱՆ

Iravunk.com