Նորանշանակ մարզպետը`«սրբերի շարքին դասվելու, Աստծո պատվիրանները հիշելու եւ մեղքերը քավելու մասին»...

Փաստորեն, Հայաստանում դեռ կան պաշտոնյաներ, որոնք քնում-արթնանում իրենց սուրբ կամ ասենք՝ <առաքյալ> պատկերացնելով…Խոսքը Տավուշի նորանշանակ մարզպետ Հովիկ Աբովյանի մասին է, ով հասցրել է մարզպետարանից բացի, տեղ գտնել նաեւ ո՛չ ավել, ո՛չ պակաս՝ հայտնի Դավինչիի «Խորհրդավոր ընթրիք» նկարում, այն էլ Քրիստոսի առաքյալներից մեկի փոխարեն: Հավանաբար նորանշանակ մարզպետը, ով վերջերս ՀՀ վարչապետի այցի ժամանակ բնակիչներին պատասխանում էր վարչապետի փոխարեն, ընտրել է լայն ճանաչում ձեռք բերելու նաեւ այս «սրբագույն» տարբերակը`կարծելով, որ կարճա ժամանակում այն կտա իր պտուղները:

Սակայն առավել հետաքրքրական կլիներ, եթե, իհարկե, հարգարժան «մարզպետ-առաքյալը» ժամանակ առ ժամանակ լսեր իր մարզի բնակիչներին, ապրեր նրանց հոգսով ու խնդիրներով, այլ ոչ թե արհեստածին կերպով մտածեր իրեն <սրբերի շարքը> դասելու մասին:
Ինչեւէ, 21-րդ դարի նորագույն հայտնագործության եւ սրբերի շարքին դասվելու մոլուցքի շուրջ էլ, Fnews.am-ը փորձեց մեկնաբանություն ստանալ Տավուշի նորանշանակ մարզպետ Հովիկ Աբովյանից:
-Պարոն Աբովյան, «Խորհրդավոր ընթրիք» նկարում, որտեղ Հիսուուս Քրիստոսն իր 12 առաքյալների հետ է, 12 առաքյալներից մեկը դիմագծերով չափից դուրս Ձեզ է նման: Ի՞նչ կասեք դրա մասին:
- (ծիծաղում է) Ո՞ր նկարում ա նման: Կարա՞նք նայենք, ինչ նկարի մասին է խոսքը:
-Իհարկե, կայքերում այն տեղադրված է: Անգամ նկարիչը չի հերքել, որ նկարում պատկերվածը` Դուք եք եւ ասել է, որ մեծ աղմուկից հետո է միայն նկարը տեղափոխվել այլ վայր:
-Ոչ մի վայր էլ չի տեղափոխվբել, կարաք հենց հիմի էլ գնաք, նայեք եկեղեցու նկարները: Եկեղեցու նկարներն էլ Անդրանիկ անունով նկարիչն է արել:
-Իսկ առհասարակ Դուք աստվածահաճո՞ մարդ եք:
-Էհ, թողնում եմ Ձեր վրա:
-Նկարիչը պնդում է, որ Դուք եք ասել, որ այդ նկարը եկեղեցուց հանեն:
-Ցավդ տանեմ, ես չգիտեմ նկարիչը Ձեզ ինչ ա ասել, ես հիմա Դիլիջանում եմ` նախարարի հետ: Դուք կարաք գնաք Էտ նկարը նայեք, նկարեք, էլ ինչ ասեմ Ձեզ: Թղթակցին ուղարկեք թող նայի նկարները հանած ե՞ն, թե՞ ոչ:
-Ասում են այլ նկար է տեղադրված դրա փոխարեն:
-Ես ասում եմ, էտ նկարները ոնց կպցրած ա, տենց էլ կպցրած ա էղել, նկարը չես կարա ամեն օր հանես, նորից կպցնես, կամ ինչ անես: Էտ նկարները 17 մետր բարձրության վրա են կպցրած…
-Մենք տեղեկացանք, որ եկեղեցու օծման արարողությունը մեծ ուրախության առիթ է դարձել տեղի բնակիչների համար: Սովորաբար պաշտոնյաներն էլ եկեղեցի են կառուցում, վերանորոգում` մեղքերի թողության համար: Ինչո՞վ էր պայմանավորված Ձեր այս նախաձեռնությունը:
-Սա աստվածահաճո նախաձեռնություն էր, ոչ մի մեղք չկա քաղելու:
-Աստվածաշնչից որեւէ հատված  այս պահին կարող ե՞ք մեջբերել:
-Կարող եմ, բայց ժամանակ չկա…
-Օրինակ Աստծո պատվիրաններից, ո՞րը կարող եք ասել:
-Որն ուզեք, էն էլ կարող եմ ասել..
-Դե, թվարկեք մի քանիսը…
-Հարմար չի հիմա ինձ… խնդրում եմ, հիմա ինձ մի խանգարեք, ես աշխատանքի մեջ եմ:

Սոսե  Չանդոյան