Նորքի 9-րդ զանգվածի բնակարաններից մեկում ամուսինը հիվանդագին խանդից կնոջ վրա նռնակ է նետել

Ավան և Նոր Նորք վարչական շրջանների ընդհանուր իրավասության դատարանում Սամվել Ուզունյանի վարույթում է Մելիք Գ.-ի գործի քննությունը:

52-ամյա Մելիքը, կնոջը հիվանդագին խանդելով, նրան անհիմն մեղադրել է անհավատարմության համար:

2015 թվականի փետրվարի 6-ին, ժամը 11-ն անց 30-ի սահմաններում Մելիքը դուրս է եկել տնից ու հետևել է կնոջը: Վերջինս երթուղային տաքսի է նստել և գնացել է Նորքի 9-րդ զանգվածում բնակվող քրոջ տուն, որտեղ մշտապես խնամում էր քրոջ դեռահաս թոռնուհուն:

Ըստ գործի տվյալների՝ կնոջը հետևող Մելիքը դիտավորություն է ունեցել նրան «բռնացնելու դեպքում» կյանքից զրկել: Այդ նպատակով նախապես նա իր հետ վերցրել, գրպանն է դրել երկու բեկորային նռնակներ:

Կնոջ հետևից Մելիքը մտել է քենու բնակարան: Այնտեղ ոչ մի կասկածելի բան չտեսնելով՝ այնուամենայնիվ, կնոջից պարզաբանում է պահանջել անհավատարմության վերաբերյալ:

Կնոջ խոսքը չլսելով՝ Մելիքը գրպանից հանել է նռնակները, քաշել է նրանցից մեկի օղակը և շատերի կյանքի համար վտանգավոր եղանակով նետել է կնոջ ու երեխայի ուղղությամբ:

Բարեբախտաբար, Մելիքի կինն ու վերջինիս քրոջ թոռնուհին չեն մահացել, ստացել են վնասվածքներ ու տեղափոխվել են հիվանդանոց:

Հանցավոր արարքի կատարումից հետո Մելիք Գ.-ն ենթարկվել է դատահոգեբուժական փորձաքննության և ի հայտ է բերվել, որ նա հոգեկան հիվանդություն ունի:

Մելիք Գ.-ն ճանաչվել է անմեղսունակ:

Մելիքի օրինական ներկայացուցիչ է ճանաչվել նրա եղբայր Աշոտը:

Վերջինս ասաց, թե իրենք չեն իմացել, որ եղբայրը հոգեկան հիվանդություն ունի: Տարօրինակություններ, հիվանդագին խանդ եղել են, բայց որ Մելիքը հիվանդ է՝ պարզվել է նռնակի պայթյունից հետո:

մանրամասն՝ 1-in.am-ում: