Ո՞ւմ ձեռքի գործն է եղել քրեական հեղինակություն «Թեւոսիկ»-ի եղբոր սպանությունը…

Ի՞նչ ա նշանակում դատավարության փուլում «գալադովկա» անելը...

Քրեական հեղինակություն համարվող Թեւոսիկի եղբոր՝ Արթուր Սաֆարյանի սպանության գործի շրջանակներում կալանավորված Իսրայել Սարգսյանի հարազատները համոզված են, որ վերջինիս անհիմն են անազատության մեջ պահում։ Իսրայել Սարգսյանի մայրը՝ Անժելա Բեգինյանը, հասցրել է տեղեկացնել այն մասին, որ իր որդին պատրաստվում է հացադուլ հայտարարել, քանի որ ապօրինությունների դեմ պայքարելու այլ ճանապարհ չի տեսնում։ Մինչդեռ, Իսրայել Սարգսյանի փաստաբան Հեկտոր Սարդարյանը, Fnews.am-ի հետ զրույցում, հավաստիացրեց, որ այդպիսի բան չի կարող լինել, քանի որ նա այդ քայլին գնալու իմաստ անգամ չի տեսնում:

-Ես գտնում եմ, որ այդ խոսակցությունները ռեալ չեն, եւ դժվար թե իմ պաշտպանյալը գնա այդ ճանապարհով: Որովհետեւ, ի՞նչ ա նշանակում դատավարության փուլում «գալադովկա» անելը, որ ի՞նչ, ինչի՞ համար: Որ դատաքննությունը հետաձգվո՞ւմ է: Դա հիմք չէ, որ մարդը նման քայլի գնա: Դատը հետաձգվում է, քանի որ այնտեղ օբյեկտիվ պատճառաբանություններ կան:

-Պարոն Սարդարյան, վերջին անգամ ե՞րբ եք հանդիպել եւ խոսել Ձեր պաշտպանյալի հետ:

-Դե, դա ինչ կարեւոր է. մի քանի օր առաջ:Այդ ժամանակ նման խոսակցություն չի եղել, եւ Իսոն էլ այդպիսի տրամադրություններ չի ունեցել:

-Եւ, ըստ Ձեզ, ո՞ւր կհասնի Թեւոսիկի եղբոր սպանության առեղծվածը, քանի որ Իսրայել Սարգսյանի հարազատները համառորեն պնդում են, որ նրան անհիմն են պահում անազատության մեջ: Ի՞նչ հիմքով են նրանք նման հայտարարությամբ հանդես գալիս:

-Ճիշտ է, դատավարությունը մի քիչ ձգձգումներով է գնում (ինչը դժգոհություն է առաջացնում նաեւ իմ պաշտպանյալի մոտ), բայց մենք հույս ունենք, որ քննությունն իր օբյեկտիվ հանրագումարին կհասնի եւ իրականությունն էլ վերջնականապես ջրի երես դուրս կգա: Եթե իմ պաշտպանյալը հանցանք է կատարել, բնականաբար իր արժանի պատիժը կստանա: Բայց նա հայտարարում է, եւ նրա փաստարկներն էլ հերքված չեն բավարար չափով, որ նա տեղեկություն չունի այդ երկու սպանության դեպքերից:

-Այդ դեպքում, ինչո՞ւ այդ երկու սպանությունների մեջ ի հայտ եկավ հենց Իսրայել Սարգսյանի անունը:

-Ես չեմ ասում՝ նա կապ չունի: Իմ պաշտպանյալն ինքն է ասում, որ այդ սպանության հետ ինքը կապ չունի: Դատավարությանը մասնակից կողմերը, ինչպես նաեւ ես, դատարանը հետազոտում ենք ներկայացված այդ փաստարկները՝ պարզելու, թե ում ձեռքի գործն են եղել այդ երկու սպանությունները:

Հիշեցնենք, որ հունվարի 27-ին՝ ժամը 00.17-ին, ոստիկանության Երևան քաղաքի վարչության օպերատիվ կառավարման կենտրոնից ոստիկանության Կենտրոնականի բաժնում հաղորդում էր ստացվել, որ Սարյան փողոցում գտնվող փոստատան մոտ կրակել են մի քաղաքացու վրա, որը տեղափոխվել է հիվանդանոց: Պարզվել էր, որ որովայնի և կրծքավանդակի ստորին մասերի հրազենային վնասվածքով հիվանդանոց է տեղափոխվել 1972 թ. ծնված Արթուր Սաֆարյանը, որը ստացած վնասվածքներից մահացել է: Մեկնած օպերատիվ խումբը պարզել էր, որ նույն օրը, ժամը 00.15-ի սահմաններում, անհայտ անձը Արամի նրբանցքի թիվ 5/Ա շենքի բակում, հրազենի գործադրմամբ, վնասվածքներ է պատճառել Ա. Սաֆարյանին` որովայնի և կրծքավանդակի հատվածներում: Դեպքի վայրի զննությամբ հայտնաբերվել էր փամփուշտի 1 գնդակ, 9 մմ տրամաչափի 3 պարկուճ, իսկ Սարյան փողոցի թիվ 20 շենքի մոտից` «Մակարով» տեսակի ատրճանակ` փամփշտակալում` 9 մմ տրամաչափի 1 փամփուշտ:

Տաթեւիկ Աբրահամյան