Ոչ ոք չի ցանկանում, որ ինչ-որ սխալ որոշումների պատճառով ամբողջ շարժումը տապալվի (Video)

1in.am-ը գրում է.Լրագրողների հարցերին պատասխանում է ՀԱԿ խմբակցության ղեկավար Լևոն Զուրաբյանը

- Պարոն Զուրաբյան, ՀԱԿ-ը երեկ հայտարարություն էր տարածել, թե միասնական շտաբներ ձևավորելու մասին «Բարգավաճ Հայաստան» կուսակցության քաղխորհրդի անցած շաբաթվա նիստի որոշումը «վատ գաղափար չէ, եթե այն զուգորդվում է Ազատության հրապարակում ընթացող ակտիվ քաղաքական գործողությունների հետ: ՀԱԿ-ի հայտարարության մեջ նաև նշված է, թե «Ակտիվ քաղաքական գործողությունների անորոշ ժամանակով հետաձգումը կարող է դառնալ ճակատագրական սխալ»:

Փոխադարձաբար, այսօր «Բարգավաճ Հայաստան» կուսակցությունն էր հայտարարություն տարածել, թե «շարժմանը մասնակից քաղաքական ուժերից յուրաքանչյուրի և մասնավորապես ՀԱԿ-ի իրավունքն է՝ ինքնուրույն կազմակերպել ցանկացած զանգվածային միջոցառում՝ ցանկացած վայրում և ցանկացած պահին»: Արդյոք փոխադարձ այս հյայտարությունները նշանակո՞ւմ են, որ ՀԱԿ-ի ու ԲՀԿ-ի միջև հակասություններ կան:

- Ոչ մի հակասություն չկա, կա մտահոգություն: Բոլորիս մտահոգությունն այն է, որ այս երեք տարվա գործընթացով ձևավորված համաժողովրդական շարժումը հաջողվի: Այնպես որ այստեղ ո՛չ ՀԱԿ-ի հարցն է լուծվում, ոչ էլ ԲՀԿ-ի հարցն է լուծվում, այստեղ ժողովրդի և երկրի հարցն է լուծվում:

Բնական է, որ բոլոր մասնակիցներն էլ շատ սրտացավ են շարժման հաջողությունների նկատմամբ: Եվ ամեն ինչ պետք է անենք, որ շարժումը, իսկապես, հասցնենք հաղթական ավարտին: Սա բնական մտահոգություն է, և կարող են լինել բնական տարբերություններ, ասենք՝ շարժման մեթոդոլոգիայի կամ պայքարի ձևերի վերաբերյալ: Սրանք բնական բաներ են, որոնք լուծվում են եռյակի քննարկումների ընթացքում:

- Հակասություններ չկա՞ն, երբ միասնական շտաբների ստեղծումը Ազատության հրապարակում քաղաքական գործընթացների հետ զուգորդելու ձեր կոչին ԲՀԿ-ն հակադարձում է, թե գնացեք, զանգվածային միջոցառումներն արեք երբ ուզում եք և որտեղ ուզում եք:

- Որևէ հակասություն գոյություն չունի, իսկ որ մեթոդոլոգիայի և պայքարի ձևերի վերաբերյալ կարող են լինել տարբերություններ, կարծում եմ՝ դուք դա բնական եք համարում: Անբնական կլիներ, եթե նման բան չլիներ: Առավել ևս այդ մտահոգությունները խորանում են, երբ մենք տեսնում ենք, թե ինչ մեծ գործ ենք հաջողել, ինչ մեծ հույս ենք արթնացրել, ինչ լուրջ ալիք է բարձրացել: Եվ բնական է, որ ոչ ոք չի ցանկանում, որ հանկարծակի ինչ-որ սխալ որոշումների պատճառով այդ ամբողջ շարժումը ձախողվի կամ տապալվի:

մանրամասները՝ սկզբնաղբյուրում