Ոչ ոք չի կարող Յուվեցի Կարոյի սեփականությունը խլել, անգամ վարչապետ Աբրահամյանը

Տեւական դադարից հետո, Աժ պատգամավոր Կարո Կարապետյանը` հանրահռչակ Յուվեցի Կարոն, կրկին հայտնվեց նոր սկանդալի կիզակետում  եւ դեռ հայտնի էլ չէ, թե դեռ ինչ նոր ռեկորդներ կսահմանի Յուվեցին` իր բռնած գործերի ու իր դրսեուրած վարքագծի պատճառով:
Նորություն չէ, որ հայ հանրությունը Յուվեցուն ճանաչում է  որպես «ղալմաղալների» սիրահար, ում ձայնը նման դեպքերում հայտնի է, որ աշխարհն է բռնում: Անգամ երբ Յուվեցուն հաջողվում է իր գործերը կարգի բերել, միեւնույնն է` պատեհ-անպատեհ առիթներով նա այնպես է բարձրաձայնում իր դարդերի մասին, որ ամբողջ աշխարհն է տեղեկանում, թե ո՞վ, ինչպե՞ս, եւ որտե՞ղ փակեց Յուվեցու գործերը: Այդ մասին առավել մանրամաս դեռ առիթ կլինի խոսելու:
Վերջին սկանադալը, որ ստվերեց քաղաքական դաշտի բոլոր ինտրիգները, դա Յուվեցի Կարո-Գոհար Ենոքյան մենամարտն էր, որից Ենոքյանը ըստ էության պատվով դուրս եկավ, իսկ Կարապետյանի դեպքում ամեն ինչ ստացվեց այնպես, ինչպես միշտ է պատահում... Յուվեցին մնաց միայնակ`իր խնդիրների հետ միասին:

Հիմա էլ նույն պատգամավորը,ով հայտարարում է, որ ինքը բանկի տոկոսների տակ «ճռռում» է, բանից պարզվում է ոչ միայն Գոհար Ենոքյանի շրջապատի մարդկանց, այլ նաեւ խնդիրներ ունի իր իսկ նախկին կուսակիցներից այլոց հետ նույնպես: Շրջանառվող լուրերի համաձայն, պատգամավոր Կարապետյանը, այս օրերին փորձում է հետ ստանալ մեկ այլ պատգամավոր Տիգրան Ստեփանյանին`Մասիսցի Տիկոյին պարտքով տված իր գումարները, որի մասին մինչ օրս երկու կողմն էլ աշխատում էր լռություն պահպանել: Սակայն նույն լուրերի համաձայն, խոսում են, որ այս օրերին հին ախպերները թունդ լեզվակռիվ են ունեցել, քանի որ Յուվեցին մեկ անգամ եւս Տիկոյից պահանջել է վերադարձնել իր գումարները:
Այ քեզ բան. մարդ է՞լ պատգամավորի աղքատիկ աշխատավարձով կարողանա սենց գումարներ պտտացնել ու հետն էլ ասել, թե տոկոսների տակ «ճռռում» է:

Գրողը տանի, վերջապես կարելի՞ է իմանալ, թե որտեղի՞ց եւ ինչպե՞ս են սնկի պես աճում Կարոյի փողերը: Կամ գուցե նա ուրիշի փողերն է՞ պտտացնում, եւ դրանից մեծ պարգեւներ ստանում:

Ո՞վ իմանա: Տեսնես իրենից առաջ ԱԺ պատգամավոր եղած հայրն է՞ ժառանգություն տվել ամենակարող Կարոյին, թե՞ օպեր-լիազոր եղած տարիներին է նա բարձի տակ «դարսել» իր փողերը: Ախր բանկը, որ բանկ է, իր գումարները պարտատիրոջից փորձում է հետ ստանալ օրենքի տառը պահելով, իսկ Կարապետյանը որ ոտքի վրա մի բանկ արժե, ու հարկայինն էլ երևի թե նրա տեղը դեռ չգիտի, էն դիապազոնով է իր հալալ քրտինքով աշխատած գումարները պահանջում, որ ամբողջ Հանրապետությունն այդ մասին տեղեկանում է:

Ավելին, մի դավթար խնդիրների ու պարտք ու պահանջների մեջ, ասում են, Յուվեցուն նյարդային լարումների մեջ է պահում ազգիս վարչապետ Հովիկ Աբրահամյանը, ով մի հայտնի քր. գործի համատեքստում դամոկլյան սուր է պահում Յուվեցու գլխին, այն աստիճան, մինեւ որ Յուվեցին կգնա վա բանկ ու նա էլ կհասնի իր բաղձալի նպատակին: Չար լեզուներն ասում են, որ մեր բիզնեսազուրկ վարչապետը լոլիկի բիզնեսը հորով – մորով անելուց հետո, այդպես էլ չի հրաժարվում Յուվեցի Կարոյին պատկանող գինու գործարանը իրենով անելու մտքից: Իսկ թե այս գործում ինչքանո՞վ հաջողություններ կունենա մեր տնտեսությունը վարած-ցանած վարչապետը, եւ թե ի վերջո ի՞նչպես է Յուվեցին հետ բերելու քամուն տված իր փողերը, Fnews.am-ը փորձեց պարզել հենց պատգամավոր Կարապետյանից:
-Բարեւ Ձեզ պարոն Կարապետյան, Fnews.am-ից է,կարելի՞ Ձեզ մի քանի հարց ուղղել:  
 
-Ի՞նչ եք ուզում հարցնել Կարոյից:

-Մի քանի հարց ունենք:

-Ինձ տվեք, ես նրա օգնականն եմ, նա այստեղ չէ:

- Ես ուզում եմ անձամբ իր հետ խոսել :

-Նա կվերադառնա, ինձ հարցրեք, կփորձեմ օգնել:

-Հարգելի օգնական, լուրեր են պտտվում, որ Կ. Կարապետյանը տոկոսով գումար է տվել ԱԺ պատգամավոր Տիգրան Ստեփանյանին եւ հիմա էլ չի կարողանում նրանից հետ ստանալ այդ գումարները: Դուք տեղյակ ե՞ք այդ պատմությունից:

-Ոչ, Կարոն երբեք ոչ մեկին տոկոսով գումար չի տվել, Ստեփանյանին էլ չի ճանաչում:

-Զարմանալի է, որ տարիներ շարունակ իրենց ընկերությամբ աչքի ընկած պատգամավորները իրար չեն ճանաչում:

-Հա, բայց հիմա միասին չեն աշխատում:

-Բայց դա չի նշանակում, որ իրար չեն  ճանաչում, այդպես չէ՞:

-Ուրիշ ի՞նչ հարց ունեք տվեք- տվե~ք :

-Ճի՞շտ է, որ վարչապետ Հովիկ Աբրահամյանը «աչք է դրել» Կարապետյանի սեփականություն հանդիսացող Քաղցրաշենու գինու գործարանի վրա:

-Նման բան չկա, ոչ ոք չի կարող խլել գործարանը, դա սուտ է :

-Հարգելի օգնական, իսկ կներկայանա՞ք. Ձեզ ինչպե՞ս ներկայացնեմ, այդպես էլ ձեր անունը չասացիք:

-Պետք չի անուն գրել:

-Ինչի՞, պետական գաղտնիք է՞: Չիմանա՞նք, թե ում հետ ենք խոսում, ի վերջո պատահական մարդ չէր կարող պատասխանել պատգամավորի բջջային հեռախոսին: 

-Պարտադիր չէ:Մի ասեք օգնականն է, գրեք ծանոթ մեկն է պատասխանել:

Հ.Գ. Մի տեսակ այնպիսի տպավորություն էր, որ զգուշավոր օգնականը հենց պատգամավոր Կարո Կարապետյանն էր, դե թաթալաբազությունը Կարապետյանից հեռու չէ…

Աննա Առաքելյան