Ո՞մ համար են աշխատելու օրինականացված ընտրակեղծիքները

"Հոկտեմբերի 29-ին ԱԺ-ն կրկին «դեմ» ասաց նոր ընտրական օրենսգրքին: 2018 թ-ի դեկտեմբերին սպասվելիք ԱԺ արտահերթ ընտրություններին մենք գնալու ենք ամենախայտառակ ընտրական օրենսգրքով, որում օրինականացվել էին ընտրությունները կեղծելու մի քանի մեխանիզմներ: Քանի որ մենք ընտրություններին գնալու ենք ընտրական հին օրենսգրքով, ապա պետք է անդրադառնալ ոչ միայն այդ մեխանիզմներին, այլև նրան, թե ում օգտին, իսկ ավելի ճիշտ է ասել, քաղաքական ո՞ր ուժի կամ ուժերի օգտին են կիրառվելու այդ օրինականացված կեղծարարությունները»,-գրում է քաղաքագետ Գագիկ Համաբարյանը ու թվարկում ընտրությունները կեղծելու հիմնական 3 մեխանիզմները.

«Առաջին. լրացուցիչ ցուցակներով ընտրություններ:
Այս մեթոդով Սերժ Սարգսյանը «կլոնավորում» էր իր ընտրողներին, որոնք անհրաժեշտության դեպքում շատ արագ, օրինակ, Երևանի բնակչից վերափոխվում էին Շիրակի, Արմավիրի կամ այլ մարզի բնակչի: Նայած, թե ՀՀԿ-ին որտեղ և որքան ձայն էր անհրաժեշտ ստանալ":
Երկրորդը՝ զինվորականների ընտրության կարգն է: Ինչպես հայտնի է գործող ԸՕ-ի համաձայն՝ զինվորականները ևս մասնակցում են ռեյտինգային կարգով ընտրություններին: Քաղաքագետը հարց է հնչեցնում՝ ինչու՞ են նրանք ռեյտինգային կարգով մասնակցում ընտրություններին, եթե չեն ճանաչում պատգամավորների թեկնածուներին:

"Ի՞նչ իրավունքով են բանակ զորակոչված ժամկետային զինծառայողները մասնակցում ռեյտինգային կարգով ընտրություններին, օրինակ, Շիրակի մարզում, եթե ասենք, զինծառայողը զորակոչված է Կոտայքի, Սյունիքի կամ այլ մարզերից: Շիրակի մարզի տարածքում ծառայում է մոտ 2500 զինծառայող: Նույն կերպ, ի՞նչ իրավունքով է Շիրակի մարզից զորակոչված և այլ մարզում ծառայող ժամկետային զինծառայողը ընտրելու իր համար «օտար» պատգամավորի, որի անունն առաջին անգամ է լսում»:

Երրորդը՝ քաղաքագետը համարում է ռեյտինգային կարգով ընտրությունը, ու շեշտում. «Ամենալուրջը այդ կարգով առաջադրվող տեղական «ֆեոդալիկների» հարցն է, որոնք մինչև հիմա մեծ ուրախությամբ ծառայել են նախորդ իշխանություններին՝ հիմնականում ընտրակաշառքի միջոցով ձայներ ապահովելով վերջիններիս համար»:

Գագիկ Համաբարյանը նկատում է. «Հենց այս հիմնական 3 կեղծարարության մեխանիզմներն են կիրառվել մեծ մասշտաբներով ընտրությունները կեղծելու և ՀՀԿ-ի վերարտադրությունն ապահովելու համար»,-ապա հարցադրում է հնչեցնում. «Նախկին իշխանությունների մանկլավիկները, որոնք շատ լավ տիրապետում են օրինականացված ընտրակեղծարարության բոլոր մեխանիզմներին, հիմա ու՞մ համար են ջանադրաբար աշխատելու և ու՞մ համար են "օգտագործվելու" զինվորականների և լրացուցիչ ցուցակներով ընտրողների ձայները»: