"Ոնց կարելի է մոռանալ, որ անմեղ 26 տարեկան տղա է գնացել էդ մարդու պատվերով"

Արդեն քանի օր է լրատվամիջոցներում ակտիվորեն շրջանառվում են լուրեր այն մասին, որ Մալաթիայի նախկին թաղապետ Վահան Զատիկյանի որդու` 26-ամյա Սեդրակ Զատիկյանի սպանության պատվիրատուն` Լեդի Հակոբի եղբոր որդին` Ստեփան Հակոբյանը, հնարավոր է հայտնվի ազատության մեջ: Այս լուրը շոկի մեջ է գցել Զատիկյանների ընտանիքի անդամներին եւ հարազատներին: Համենայնդեպս Fnews.am-ի հետ զրույցում սպանված երիտասարդի մորեղբայրը` Մ. Հարությունյանը ասաց.

-Ցավոք մենք էլ ենք լսել էդ լուրերը ու շոկի մեջ ենք, ոնց կարելի էդ տեսակ հանագործություն կատարողին ազատ արձակել: Թեպետ հիմա էնպիսի ժամանակներում ենք ապրում, որ ինչ ասես կարա լինի: Եթե հանկած նման բան լինի՝ մենք սուսուփուս չենք նստելու հաստատ. Բողոքելու ենք տարբեր ատյաններով, ո՞նց կարելի ա երիտասարդ տղայի սպանություն պատվիրելու համար դատապարտվել ու հետո հանգիստ դատարանի սահմանած պատժաչափից շուտ ազատ արձակվել:

- Այսինքն եթե տեղեկությունը իրականությանը համապատասխանի բողոքարկելո՞ւ եք:
-Միանշանակ, ուղղակի չենք ուզում հավատալ բալես: Դրան երբեք ու ոչ ոք չի կարող ներել: Ճիշտ է` յուրաքանչյուրն էլ կուզենա իր երեխուն ազատի, իրենք էլ ունեն նյութական հնարավորություններ, բայց ոնց կարելի է մոռանալ, որ անմեղ 26 տարեկան տղա է գնացել էդ մարդու պատվերով: Չգիտեմ, կոնկրետ ինչ կլինի` ոնց, բայց որ բողոքելու ենք եթե նման բան լինի` միանշանակ:

"Վերաքննիչ դատարանում դեռ այդ գործով բողոք կա ներկայացված, թող դրա մասին չմոռանան"

Զատիկյանների ներկայացուցիչ, փաստաբան Վարշակ Գեւորգյան էլ իր հերթին հույս հայտնեց."Համոզված եմ, որ արդարադատություն կիրականացվի այնպես` ինչպես որ կա: Ուզում եմ հավատալ, որ սա ընդամենը շոոււ է, որովհետեւ իրավական տեսանկյունից նրա ազատ արձակման որեւէ պատճառ չկա, եթե հիվանդություն են փորձում շահարկել` դա էլ չեն կարող, որովհետեւ նրա հիվանդությունը այն հիվանդությունը չէ, որով, որ կարելի լինի ազատ արձակել: Եվ հետո Վերաքննիչ դատարանում դեռ այդ գործով բողոք կա ներկայացված, թող դրա մասին չմոռանան":

Հիշեցնենք, Մալաթիա-Սեբաստիա համայնքի նախկին ղեկավար, ազատամարտիկ Վահան Զատիկյանը մահացել է 1999թ-ին: Թեեւ պաշտոնական վարկածով ասվում է, թե մահացել է սրտի կաթվածից, բայց ոչ բոլորն են այդ վարկածին հավատում:
Իսկ նրա որդին՝ 26-ամյա Սեդրակ Զատիկյանը, սպանվեց 2006 թվականին՝ Երեւանի Սեբաստիայի եւ Տիչինայի փողոցների խաչմերուկում. անհայտ անձը ԱԿ-74 տիպի ինքնաձիգից կրակահերթ էր արձակել "Մերսեդես" մակնիշի ավտոմեքենայի վրա, որի հետեւանքով Սեդրակ Վահանի Զատիկյանը վիրավորվել եւ հիվանդանոցի ճանապարհին մահացել էր: Կրակոցներից մահացել էր նաեւ անցորդ, 37-ամյա Կարինե Սարգսյանը: Իսկ 2013 թվականի հունվարի 13-ին՝ ժամը 7:00-ի սահմաններում, Մալաթիա-Սեբաստիա վարչական շրջանի Մեծարենցի 58 հասցեի մոտ հայտնաբերվել է 31-ամյա Անդրանիկ Վահանի Զատիկյանի դին:
Սեդրակ Զատիկյանի որդու սպանությունը պատվիրելու համար 15 տարվա ազատազրկման է դատապարտվել ՀՀ ԱԺ նախկին պատգամավոր Հակոբ Հակոբյանի` Լեդի Հակոբի եղբորորդին` Ստեփան Հակոբյանը: Վերջերս դատապարտվեց նաեւ սպանությունը կատարողը՝ Նարեկ Խաչատրյանը: Ըստ մեղադրանքի` Նարեկ Խաչատրյանը Ստեփան Հակոբյանի հետ, նախնական համաձայնությամբ, նախկինում ունեցած վեճի պատճառով վրեժխնդիր լինելու նպատակով, Արսեն Առուշանյանին նյութապես շահագրգռելով դրդել, պատվիրել են սպանել Սեդրակ Զատիկյանին:

Հ.Գ Այս ամենի առնչությամբ, մենք փորձեցինք ստանալ նաեւ Լեդի Հակոբի եղբոր՝Սիմոն Հակոբյանի մեկնաբանությունը, սակայն նրա բջջային հեռախոսահամարին երկու օր շարունակ պատասխանեց մի տղամարդ՝ներկայանալով որ ինքը Սիմոնյանի վարորդն  է, եւ որ Սիմոնյանը՝ Գյումրիում գտնվելու պատճառով չի կարող մեզ հետաքրքրող հարցերին պատասխանել:  

Շարունակելի...

Նոնա Ադամյան