«Օօօօօ~… ի՞նչ ասեմ, ամեն թռչուն իր երամն ունի.Նմանը զը նմանին գտանե».Վարդան Ղուկասյան

Մամուլում շրջանառվող լուրերի համաձայն` Գյումրու ՏԻՄ ընտրություններում ՀՀԿ-ն պատրաստվում է սատարել  գործող քաղաքապետ Սամվել Բալասանյանին, ում կատարած աշխատանքից ըստ էության  գյումրեցիները այնքան էլ խանդավառված չեն: 

Ազգային ժողովի հանրապետական խմբակցության պատգամավոր, գյումրեցի Սուքիաս Ավետիսայնը թեեւ  Fnews.am-ի հետ զրույցում նշեց, որ տեղյակ չէ նման որոշման մասին: Համենայդեպս իր մասնակցությամբ անցկացված քննարկումների ընթացքում նման հարց առաջ չի քաշվել, սակայն նշեց, որ քաղաքականության մեջ ոչինչ  պետք չէ բացառել:

Հարցին, թե որպես գյումրեցի, ինչպե՞ս է գնահատում Սամվել Բալասանյանի աշխատանքը, Սուքիաս Ավետիսյանը խուսափեց պատասխանել:
«Դե դրա ժամանակը չի, հիմա սիրուն չի դրա մասին խոսել. քանի դեռ նախընտրականը չի սկսել` զերծ մնանք որևէ գնահատականից»,-եզրափակեց Ավետիսյանը:

Այն, որ ՀՀԿ-ի թեկնածուին ներկայացնելու ժամանակը չէ Fnews.am-ի հետ զրույցում իր կուսակից ընկերոջ կարծիքը հաստատեց նաև պատգամավոր Սամվել ֆարմանյանը, ում ակունքերն, ի դեպ ևս Շիրակի մարզ են գնում:

Նա հրաժարվեց մեկնաբանել մամուլում տեղ գտած որևէ հրապարակում, և բավարարվեց իր տված այն գնահատականով, թե Սամվել Բալասանյանը քաղաքապետի արժանի թեկնածու է:
Գյումրու  նախկին քաղաքապետ Վարդան Ղուկասյանն էլ լսելով հրապարակման մասին բազմանշանակ ծոր տվեց.
«Օօօօօ~… ի՞նչ ասեմ, ամեն թռչուն իր երամն ունի, եթե իրենք գտել են, որ էդ մարդուն պետք է ընդգրկեն ցուցակում, ուրեմն նմանը զը նմանին գտանե»,-ընդգծեց Ղուկասյանը:
Հարցին, թե գո՞հ են արդյոք գյումրեցիները Բալասանյանի աշխատանքից, Ղուկասյանը հորդորեց ժողովրդից հարցնել ու անմիջապես էլ ուղղեց իրեն.«Չէ, այսինքն ի՞նչ եմ ասում. Ժողովրդի կարծիքը ինչի ով է բանի տեղ դրել ո՞ր, կա՞ էդպիսի բան… ինչի, ո՞վ չգիտի որ ժողովուրդը գոհ չէ… ամոթ է, ամո’թ»,- ասաց Ղուկասյանը, ով մի առիթով նշել էր, որ «Գյումրիի մասով SOS է պետք հնչեցնել» և իր տված հարցազրույցներից մեկում ակտիվ քննադատել էր Սամվել Բալասանյանին` ասելով, որ նա հույս չի ներշնչում...

«Ես ուղղակի ափսոսում եմ Գյումրի քաղաքին, որ սահամանդրական բարեփոխումների արդյունքում ՏԻՄ մասով մարդու իրավունքները ոտնահարվեցին: Քաղաքում կան մարդիկ, ովքեր կուսակցական չեն, բայց ուզում են առաջադրվել ու հաստատ ավելի մեծ հարգանք ու հեղինակություն ունեն ու ավելի լավ կաշխատեն, քան կուսակցական թեկնածուները: Ինչի՞  են էդ մարդկանց ճանապարհը փակում էդ օրենքով»,- իր հարցադրումնն ուղղեց նա` ընդգծելով, որ շատ սխալ են վարվել Գյումրիի և Վանաձորի նկատմամբ:

Հիշեցնենք, որ բացի Երևանից, այժմ նաև Գյումրիի և Վանաձորի ավագանիները ևս կընտրվեն համամասնական ընտրակարգով, իսկ քաղաքապետերը կընտրվեն արդեն ավագանու կողմից: