Որդեկորույս մայրեր, երբեք գլուխներդ չկախեք, Դուք հերոսներ եք տվել ազգին, մեր բանակը հերոսական բանակ է

Հայտնի է, որ  Ն.Ս.Օ.Տ.Տ. Գարեգին Երկրորդ ծայրագույն պատրիարք և Ամենայն հայոց կաթողիկոսի՝ hունվարի 21-ի հայրապետական տնօրինությամբ գերաշնորհ Տ․ Պարգև արքեպիսկոպոս Մարտիրոսյանը ազատվել է Արցախի թեմի առաջնորդի պաշտոնից և նշանակվել հատուկ հանձնարարություններով Հայրապետական նվիրակ։

Նոր պաշտոնի, Արցախի թեմից հեռանալու պատճառների, հետագա գործունեության հետ կապված «Իրավունքը» առիթի է ունեցել զրուցել անձամբ հատուկ հանձնարարություններով Հայրապետական նվիրակ, Պարգեւ արքեպիսկոպոս Մարտիրոսյանի հետ, ով նախ անդրադարձավ Արցախի թեմի առաջնորդի պաշտոնը թողնելու պատճառին.

-Փոփոխությունները տեղի ունեցան բացառապես առողջական պայմաններից ելնելով: Առողջությունս բավական տկարացած է, քսան տարվա մեջ չորս անգամ ինֆարկտ ստանալը  համաձայնեք, որ միքիչ շատ է(-ժպտում է. Ի.Ա.): Գումարած դրան ունեմ անոթների խնդիր, այլ խոսքով առողջական վիճակիս վատթարացման վտանգը միշտ առկա է: Եթե ինչ-որ խնդիր առաջանա, պետք է անհապաղ հոսպիտալացվեմ: Սա է ընդամենը հոգեւոր ծառայությանս փոփոխության բուն պատճառը:

- Սրբազան, Դուք հատուկ հանձնարարություններով Հայրապետական նվիրակ եք: Որո՞նք են Ձեր բուն գործառույթները նոր պաշտոնում:

- Այո, այդ հարցը շատերին է հետաքրքրում, շնորհակալ եմ այն հնչեցնելու համար: Այն ենթադրում է, որ Վեհափառ հայրապետի կողմից առաջ քաշված հարցերով եմ զբաղվելու` լուծում տալու ակնկալիքով:

Գիտեք, որ ես 32 տարի շարունակ ծառայել Արցախում, եւ առանց Արցախ, իհարկե, ոչ կյանք ունեմ, ոչ էլ որեւէ այլ իմաստ: Հաշվի առնելով այդ հանգամանքը, մենք Վեհափառ Հայրապետի հետ պայմանավորվել ենք, որ ինչ ուժ, կարողություն ունեմ` պետք է ուղղեմ դեպի Արցախի թեմ, դեպի արցախցին եւ Արցախի քաղաքական դաշտը: Ամեն ինչ անելու եմ հնարավորությանս սահմաններում հանուն Արցախի եւ առողջությունիցս ելնելով` պարբերաբար պետք է այցել եմ Արցախ: Ես չեմ կարող կտրվել Արցախից: Այս առումով ունեմ Վեհափառ Հայրապետի թույլտվությունը եւ օրհնությունը: Այլ խոսքով ես միշտ Արցախի հետ եմ ե՛ւ հոգով ե՛ւ մտքով:

-Սրբազան, վաղը Հայոց բանակի կազմավորման 29-րդ տարելիցն է, այն անշուշտ տարբերվում նախորդ տարելիցներից` հաշվի առնելով առկա իրողությունները...

-Այո, ցավոք, ճիշտ նկատեցիք: Բայց ես առիթից օգտվելով ուզում եմ Հայով բանակի 29-րդ տարեդարձի առթիվ շնորհավորել համայն հայության հերոսական բանակի սպաներին, զինվորներին: Մաղթում եմ մեր բանակին կայունություն, նորանոր նվաճումներ եւ հաջողւություներ: Մենք պարտավոր ենք ազգովի լինել Հայոց բանակի թիկունքում` նպաստելով նրա հզորացմանը: Յուրաքանչյուրս յուովի, մեր չափով պետք է նետվենք դեպի բանակ:

Չեմ կարող չխոնհարվել նաեւ մեր զոհված հերոսների հիշատակի առաջ, ցավակցում եմ բոլոր հեչոսների ծնողներին, քույրերին, կանանց: Որդեկորույս մայրեր, երբեք գլուխներդ չկախեք, Դուք հերոսներ եք տվել ազգին, մեր բանակը հերոսական բանակ է , որը օր-օրի էլ ավելի պետք է հզորանա: Ես հավատում եմ մեր տղաների բազկի ուժին եւ մեր ազգի միասնականությանը:

Առանձնահատուկ ուզում եմ բանակի օրվա առթիվ շնորհավորել մեր վիրավոր հերոսներին: Տղերք, Դուք մեր ամենօրյա աղոթքներում եք` շուտափույթ ապաքինում Ձեզ հերոս զավակներ:

Զրույցը`ԻԼՈՆԱ ԱԶԱՐՅԱՆԻ

Iravunk.com