«Օրենքը թույլ չի տալիս ծեծել, թե չէ…». Նաիրիտցիների «ուժգին» բողոքի ակցիա են անելու.

«Հրապարակ» թերթը գրում է. «Երեկ ՀՀ էներգետիկայի և բնական պաշարների նախարար Երվանդ Զախարյանը, իր խոստմանը հավատարիմ, թանկարժեք մեքենայով ժամանեց «Նաիրիտ»: Գույնը գցած, սովետական ճռճռան դարպասները բացվեցին և ներս թողեցին նախարարին: «Նաիրիտի» աշխատակիցների և նախարարի հանդիպումն սկսվեց: Թե ինչու լրագրողներին թույլ չտվեցին ներկա գտնվել հանդիպմանը, անհասկանալի էր, միևնույն է՝ նաիրիտցիները բազմաթիվ ակցիաներից հետո այլևս գաղտնիքներ չունեն հանրությունից: Մինչ նախասրահում սպասում էինք ժողովի ավարտին, անընդհատ ուշացած մարդիկ էին ներս մտնում: «Միտինգն ստե՞ղ ա»,- հարցնում էին ու անցնում երեք թափառական շների կողքով, որոնք նախասրահի միջանցքում «տնավորվել» էին: Ոգևորված ներս էին մտնում և հուսաթափ դուրս գալիս: Հարցին, թե ինչ տեղի ունեցավ ժողովի ժամանակ, պատասխանում էին. «Ի՞նչ պետք ա լիներ: Նույնը, ինչ անցած անգամներին: Խոստացան փետրվարի 23-ին մեկ ամսվա աշխատավարձը վճարեն»: Իսկ դուք բողոքեցի՞ք: «Իհարկե բողոքեցինք, բայց ի՞նչ օգուտ: Խոստացավ, որ հենց «Նաիրիտը» վաճառեն, առաջինը մեր աշխատավարձերը կվճարեն»: Հազիվ 40 րոպե տևած ժողովից հետո նախարարը, կրկին իր թանկարժեք մեքենայով «պատսպարված», հեռացավ: «Այդ պարտքն ամբողջությամբ պետք է վճարվի: Ձեր աշխատավարձի պարտքի մարման խնդիրն անհանգստացնում է բոլորիս: Կա հանրապետության նախագահի հանձնարարականը, որ այդ հարցը լուծվի հնարավորին սեղմ ժամկետում,- ասել է Երվանդ Զախարյանը:- «Նաիրիտի» աշխատակիցներից կազմված աշխատանքային խումբը պատրաստել է այն ապրանքների ցանկը, որոնք, մինչև ընդհանուր գույքը գրավից հանելը, հնարավոր կլինի իրացնել: Բայց այդ գործընթացը ևս ժամանակ է պահանջում, քանի որ ցանկալի է, որ այդ գույքն իրացվի ոչ որպես ջարդոն». մի փոքր ուշ էներգետիկայի և բնական պաշարների նախարարությունից պաշտոնական հաղորդագրություն ստացանք, և ժողովի «գաղտնիքը» բացահայտված էր:

«Նախարարն անձամբ խոստացավ, ասաց՝ 29-ին աշխատավարձ կտա»: Իսկ մնացա՞ծ գումարը, բողոքողներ չեղա՞ն: «Օրենքը թույլ չի տալիս ծեծել, թե չէ…: Մենք աշխատում ենք ամբողջ ուժով հարցերը լուծել, այն ամենն էր, ինչ հնչեց այնտեղ»,- ասաց նաիրիտցիներից մեկը: Մեկ այլ աշխատակից էլ հայտնեց, որ նորից հավաքվելու են կառավարության մոտ և «ուժգին» բողոքի ակցիա են անելու: Ե՞րբ: «Դեռ չենք որոշել: Հենց որոշենք, բոլորը կիմանան այդ մասին»: