Ո՞րն է լինելու շարժման ելքը...

Այս պահին Բաղրամյան պողոտայում կարելի է ասել վիճակը համեմատաբար հանգիստ է: Քիչ առաջ ցուցարարներին բաժանվել է սնունդ եւ ջրեղեն, իսկ արեւից պաշտպանվելու համար տեղադրվել են նաեւ մեծ հովանոցներ: Ի դեպ, ստեղծվել է նաեւ հատուկ չեզոք տարածք լրագրողների համար, ուր լրագրողները ըստ էության կարող են աշխատել առավել պաշտպանված պայմաններում: 

Նշենք, որ ցուցարարները անկոտրուն են. նրանք պատրաստ են պայքարել մինչեւ վերջ՝ անկախ եղանակային պայմաններից ու ժամանակ առ ժամանակ ստեղծվող լարված իրավիճակից:
Թե ի վերջո, ո՞ւր կտանի այս պայքարը, եւ ի՞նչ հանգուցալուծում կստանա այն,Fnews.am-ը այս եւ մի քանի այլ հարցերի շուրջ զրուցեց սոցիոլոգ Ահարոն Ադիբեկյանի հետ:
-Պարոն Ադիբեկյան, ի՞նչ եք կարծում, որն է լինելու այս շարժման ելքը, նորից հիասթափությո՞ւն ենք ապրելու, թե այդուհանդերձ քայլ առաջ ենք անելու:

-Ելքն այն է , որ կառավարությունը ցածր սակագին սահմանի: Բայց գիտեք մի բան էլ ասեմ.այն ժամանակ էլ տրանսպորտի համար նման բան եղավ, հարցը լուծվեց, երբ ծախսն ինքնըստինքյան նվազեց, տրանսպորտի սակագինն էլ չբարձրացավ: Հիմա տեսնենք էլեկտրաէներգիան ինչ կլինի: Պետք է ժողովուրդն էլ հասկանա, որ ինչ-որ բանի գինը մեր կամքով չի, որ կարող է իջնել ու բարձրանալ: Դրա համար պետությունն ու տնտեսվարողները լուրջ հաշվարկներ են անում, գնահատականներ տալիս: Ժողովուրդը դեռ չի հասկացել ինչ է գնի ձևավորումը: Ելքի համար պետք է լուրջ եւ կիրթ մոտեցում:
Չգիտեմ, կլսեն ժողովրդի ձայնը այս դեպքում թե ոչ, բայց մի կետ եմ ուզում նշել. տեսեք, Հայաստանում շատերը նպաստ ու թոշակ են ստանում, լավ կլինի, որ պետությունը բարձրացնի նպաստներն ու թոշակը, իսկ աշխատողներին ավելի շատ աշխատավարձ տա, որ թանկացումները տեղին լինեն:

-Իսկ ըստ Ձեզ այս շարժումը այնուամենայնիվ կարո՞ղ է ունենալ թեկուզ ընդհատակյա ղեկավարներ, թե ոչ:

-Կարծում եմ այո, քանի որ ամեն ինչ լավ է կազմակերպված: Պարզապես ոչ մի ընդիմադիր կուսակցություն չի ուզում, որ իր անունը շեշտվի:

-Ի՞նչ եք կարծում. արդյո՞ք պատգամավորները, մտավորականները չէին կարող ավելի շուտ գնալ եւ կանգնել ցուցարարների կողքին: Գուցե ցուցարարները լսեին նրանց խոսքը եւ գործը չհասներ ոստիկանության միջամտությանը: Թեեւ ոստիկանությունը տեւական ժամանակ  հորդորում  էր դադարեցնել չարտոնված նստացույցը: 

-Կարող էին, բայց սա էլ իր քաղաքականությունն ունի:

- Ամեն դեպքում ստեղծված իրավիաճկը կարո՞ղ է հանգեցնել Մայդանի, թե՞...

-Միանշանակ պատասխան տալ չեմ կարող, կերևա դեպքերի հետագա զարգացումներից:

Աննա Առաքելյան