Որոշվել է Վահան Շիրխանյանին տեղափոխել այլ ՔԿՀ. Նրան խոշտանգելու նոր ձև է. Փաստաբան

Aysor.am-ը գրում է.

Պաշտպանության նախկին փոխնախարար Վահան Շիրխանյանին, ով մեղադրվում է Արթուր Վարդանյանի կողմից ստեղծված հանցավոր համագործակցությանը մասնակցելու, դրա օգտին գործելու համար, որոշում է կայացվել  «Երևան-Կենտրոն» ՔԿՀ-ից տեղափոխել «Արմավիր» ՔԿՀ:

«Չորս ամիս հետո որոշվեց, որ քանի որ պարոն Շիրխանյանը չի կարողանում ցնցուղի տակ ինքնուրույն կանգնել, չի կարողանում լոգանք ընդունել,  ուրեմն պետք է տեղափոխել «Արմավիր» քրեակատարողական հիմնարկ, որովհետև այնտեղ պայմանները, այդ առումով, ավելի լավ են», - Aysor.am-ի հետ զրույցում ասաց Վահան Շիրխանյանի փաստաբան Հայկ Ալումյանը։

Նա նշեց, որ այս տեղափոխումը իրենց մոտ մի շարք հարցեր է առաջացրել։

«Մասնավորապես, եթե դա հիմք էր տեղափոխության համար, ի՞նչ է, չորս ամիս պետք է սպասեին, նո՞ր տանեին, որ ցնցուղ ընդունի։ Իրականությունն այն է, որ այս ամենն արվում է պարոն Շիրխանյանին օրենքի սահմաններում խոշտանգելու համար», - նշեց փաստաբանը։

Հայկ Ալումյանը փոխանցեց, որ բողոքներ է պատրաստում՝ ամեն տեղ ուղարկելու, նաև՝ Եվրոպական դատարան, որտեղ, ի դեպ, քննվում է Վահան Շիրխանյանի վերաբերյալ գործը։

«Պարոն Շիրխանյանը չի կարողանում ճանապարհ անցնել, նա անգամ չի կարողանում մեքենա նստել, մեքենայի թափքից նրա ողնաշարը սարսափելի ցավեր է ունենում։ Նրան ուզում են տանեն այլ ՔԿՀ, հետո, երբ որ ասի, որ չի կարողանում ներկայանալ դատարան, որովհետև ցավերին չի դիմանում, ասեն՝ «այ, տեսեք, չի ուզում գա դատարան»։ Իրականում, ամեն ինչ անում են, որ պարոն Շիրխանյանը չգա դատարան, որ սլաքները շուռ տրվի մեր դեմ», - ընդգծեց Վ. Շիրխանյանի փաստաբանը։

Նշենք, որ Կենտրոն և Նորք-Մարաշ համայնքների ընդհանուր իրավասության առաջին ատյանի դատարանում չորս անգամ արդեն հետաձգվել է Նորք-Մարաշում 2015թ. նոյեմբերին վնասազերծված զինված խմբի գործով առաջին դատական նիստը Վահան Շիրխանյանի ներկայությունը դահլիճում ապահովելու համար։