Որքան դրամական միջոցներ ունեն ՀՀ մարզպետները՝ ըստ ներկայացրած հայտարարագրերի

Tert.am-ը գրում է .

Tert.am-ը ուսումնասիրել է բարձրաստիճան պաշտոնատար անձանց և նրանց հետ փոխկապակցված անձանց գույքի և եկամուտների հայտարարագրերը՝ պարզելու, թե որքան ֆինանսական կարողություն են հայտարարագրել ՀՀ մարզպետները։
 

Ըստ հայտարարագերի՝ ամենաշատ դրամական միջոցներն ունի վերջերս Կոտայքի մարզպետի պաշտոնում նշանակված Կարապետ Գուլոյանը: Նրա դրամական միջոցները 2014թ-ին կազմել են 1 մլրդ 352 մլն դրամ և 94 հազ. դոլար, իսկ նրա կնոջ՝ Ռոզա Ծառուկյանինը՝ 17 մլն դրամ և 44 հազ. դոլար:

Տավուշի մարզպետ Հովիկ Աբովյանի դրամական միջոցները 2014թ-ի սկզբին եղել են  40 մլն դրամ 200 հազ. դրամ, իսկ տարեվերջին՝ 31 մլն դրամ և 110 հազ. դոլար: Թե ինչի վրա է ծախսել իր միջոցները, հայտարարագրում նշված չէ, բացառությամբ ընթացիկ տարվա ընթացքում ձեռք բերված «TOYOTA LAND CRUISER 100 4.5» մակնիշի մարդատար մեքենայի, որը ձեռք է բերել  7,5 մլն դրամով: Նշենք, որ հարկային տարում մարզպետի եկամուտը կազմել է՝ 2 մլն 583 հազ. 328 դրամ:

Մարզպետի կնոջ՝ Աննա Ազատյանի դրամական միջոցները ևս տարեվերջին նվազել են՝ կազմելով 101 մլն դրամ և 400 հազ. դոլար: Մարզպետի դուստրը՝ Անուշ Աբովյանը, 2014թ-ին ձեռք է բերել 15 մլն դրամ արժողությամբ մարդատար ավտոմոբիլային տրանսպորտի միջոց «TOYOTA RAV 4 2.0 GAS» մակնիշի: Որդին՝ Աշոտ Աբովյանը, ձեռք է բերել «MERCEDES-BENZ G55 AMG» ավտոմեքենա 20 մլն դրամ արժողությամբ:

Այնուհետև առավել շատ դրամական միջոցներով աչքի է ընկնում Արարատի մարզպետ  Ռուբիկ Աբրահամյանը: Նա 2014թ-ին պաշտոնը ստանձնելիս հավատարմագրել է  7,6 մլն դրամ, 33 հազ. դոլար և 15,000.00 եվրո, ինչպես նաև բեռնատար (բեռնաուղևորատար) ավտոմոբիլային տրանսպորտի միջոց «FORD COURRIER VAN 1.3» մակնիշի: Տարեվերջին մարզպետի դրամական միջոցները կազմել են 10 մլն դրամ, 35 հազ. դոլար և 15 հազ. եվրո:

Նրա կնոջ՝ Նաիրա Ներսիսյանի դրամական միջոցները 2014թ-ին կազմել են՝ 15 մլն դրամ,  21 հազ. դոլար և 16 հազ. եվրո: Նրա տարվա եկամուտը կազմել է 25 հազ. եվրո:

Մարզպետի որդիներից մեկի՝ Էմին Աբրահամյանի  եկամուտը կազմել է 10 մլն դրամ, իսկ մյուսի՝ Գոռ Աբրահամյանի եկամուտը՝ 4 մլն դրամ:

Լոռու մարզպետ Արթուր Նալբանդյանի դրամական միջոցները 2014թ-ի վերջին կազմել են 2 մլն 834 հազ. դրամ և 229 հազ. 862 դոլար:

Արմավիրի մարզպետ Աշոտ Ղահրամանյանի դրամական միջոցը տարեվերջին կազմել են 21 մլն 340 հազ. դրամ, իսկ հարկային տարվա եկամուտը՝ ավելի քան 5 մլն 616 հազ. դրամ: Նրա կնոջ՝ Արփիկ Ղահրամանյանի դրամական միջոցները կազմում են 21 մլն 340 հազ. դրամ:

Շիրակի մարզպետ Ֆելիքս Ցոլակյանի դրամական միջոցները, ըստ հայտարարագրի կազմել են 16 մլն 888 հազ. դրամ, ինչը տարեսկզբի համեմատ ավելացել է 2 մլն դրամով: Նրա կնոջ՝ Զինաիդա Բարսեղյանի միջոցները կազմել են 6 մլն 620 հազ. դրամ:

Սյունիքի մարզպետ Սուրիկ Խաչատրյանի դրամական միջոցները, ըստ հայտարարագրի, կազմում է 2 հազ. 999 դոլար, իսկ եկամուտը՝ 215 մլն 202 հազ. դրամ:

Նրա կինը՝ Լորետա Բարսեղյանը, դրամական միջոցներ չի հայտարարագրել, սակայն նրա հարկային տարվա եկամուտը կազմել է 2 մլն 192 հազ. դրամ: Մարզպետի որդին՝ Տիգրան Խաչատրյանը, ևս ոչինչ չի հայտարարագրել:

Վայոց Ձորի մարզպետ Հարություն Սարգսյանը պաշտոնն ստանձնելու պահին հայտարարագրել է մարդատար ավտոմոբիլային տրանսպորտի միջոց «MITSUBISHI PAJERO 3.0 L» մակնիշի: Եկամուտը հունվարի մեկից մինչև պաշտոնը ստանձնելու ժամանակ կազմել է՝ 2 մլն  դրամ: 2014թ-ի վերջին մարզպետը կրկին դրամական միջոցներ չի հայտարարագրել, իսկ հարկային տարում նրա եկամուտը կազմել է 2 մլն 909 հազ. դրամից ավելի:

Արագածոտնի մարզպետ Սարգիս Սահակյանը ևս դրամական միջոցներ չի հայտարարագրել,  իսկ հարկային տարում նրա եկամուտը կազմել է 4 մլն 874 հազ. դրամից ավելի: Նրա կինը՝ Մելինե Գենջոյանը, նույնպես դրամական միջոցներ չի հայտարարագրել, նրա հարկային տարվա եկամուտը կազմում է շուրջ 527 հազ. դրամ:

Գեղարքունիքի մարզպետ Ռաֆիկ Գրիգորյանը դրամական միջոցներ չի հայտարարագրել, 2014թ-ին նրա եկամուտը կազմել է 6 մլն 620 հազ. դրամից ավելի: Նախորդ տարի ևս դրամական միջոցներ չի հայտարարագրել, իսկ եկամուտը ավելի քիչ է եղել՝ 2 մլն 834 հազ. դրամ:

Աղբյուրը ` Tert.am