Որքանո՞վ է իրականում նվազել Հայաստանից Ռուսաստան արտահանումը.

«168 ժամ» թերթը գրում է. «Ինչպես արդեն տեղեկացրել ենք, ՀՀ պաշտոնական վիճակագրության համաձայն՝ այս տարվա առաջին եռամսյակում Հայաստանից Ռուսաստան արտահանումը նախորդ տարվա առաջին եռամսյակի համեմատ նվազել է 47.6 անգամ։ Նախորդ տարվա առաջին եռամսյակում դեպի ՌԴ արտահանել ենք 65.3 միլիոն դոլարի ապրանքներ, այս տարվա առաջին եռամսյակում՝ 1.4 միլիոն դոլարից էլ քիչ։

Ազգային վիճակագրական ծառայությունն ու էկոնոմիկայի նախարարությունը եռամսյակի ընթացքում բազմիցս պարզաբանել են, որ այս խայտառակ ցուցանիշները պայմանավորված են ԵՏՄ երկրների միջեւ փոխադարձ առեւտրի ցուցանիշների ոչ ամբողջական հավաքագրմամբ եւ այդ տվյալները հետագայում ենթակա են ճշգրտման: Արդեն 5-րդ ամիսն է, որ Հայաստանը ԵՏՄ-ի անդամ է, սակայն մեզ հորդորում են էլի սպասել՝ արտաքին առեւտրի ճշգրտված թվերն իմանալու համար։

Սակայն սպասելու անհրաժեշտություն չկա, որովհետեւ ՀՀ-ՌԴ արտաքին առեւտրի տվյալները կարելի է գտնել նաեւ Ռուսաստանի պաշտոնական աղբյուրներում։ Այսպես, ՌԴ մաքսային ծառայության տվյալներով՝ 2014 թվականի առաջին եռամսյակում Հայաստանից ներմուծումը կազմել է 60.8 միլիոն դոլար (ՀՀ տվյալներով՝ 65.3 միլիոն դոլար էր)։ Իսկ այս տարվա առաջին եռամսյակում, ըստ ՌԴ մաքսային ծառայության, Հայաստանից ներմուծումը կազմել է 24.1 միլիոն դոլար։ Այն, ինչը ռուսների համար ներմուծում է, մեզ համար՝ արտահանում է։ Ու ստացվում է, որ ՌԴ պաշտոնական տվյալներով, Հայաստանից Ռուսաստան արտահանումը նվազել է 2.5 անգամ։

Ընդ որում, որեւէ տեղ չի նշվում, որ տվյալները թերի են, ինչից կարելի է ենթադրել, որ սրանք վերջնական եւ ճշգրտված թվեր են։ Իսկ ինչպե՞ս է ստացվում, որ Ռուսաստանը տիրապետում է Հայաստանից իր երկիր մտած ապրանքների ցուցանիշներին, իսկ Հայաստանը՝ ոչ, գրեթե անհնար է պատասխանել»:

Առավել մանրամասն՝ թերթի այսօրվա համարում