«Որսորդ» հոգևորականի հարցը կքննի Մայր Աթոռի կարգապահական հանձնախումբը

Ապօրինի որսի մասին այսօր հերթական գրառումն է կատարել EcoNews.am կայքը՝ ներկայացնելով լուսանկարներ, որտեղ անհատը տափաստանային ու մարգագետնային մկնաճուռակների որս է իրականացրել:

Ըստ կայքի տեղեկությունների՝ «որսորդը» Տեր Ղևոնդ (ավազանի անունը՝ Արարատ- խմբգ.) քահանա Գափոյանն է: Վերջինս ՀԱԵ Արագածոտնի թեմի Աշտարակի Սուրբ Կարմրավոր եկեղեցու և Նոր Եդեսիա համայնքի հոգևոր հովիվն է:

Նկատենք, որ վերոնշյալ կայքի տարածած լուսանկարները համցանցում քննարկման բուռն առարկա են դարձել: Շատերն իրենց որդովմունքն են հայտնում ոչ միայն այն առնչությամբ, որ «Կարմիր գրքում» գրանցված թռչունների որս է իրականացվել, այլ այն փաստի մասին են խոսում, որ որս կատարող անձը հոգևորական է:

Դեպքի առնչությամբ ՀայՄեդիա.AM-ը կապ հաստատեց Արագածոտնի թեմի հետ: Թեմական առաջնորդարանից մեզ հայտնեցին՝ դեպքի մասին որևէ տեղեկություն չունեն: Ավելին՝ մեր հեռախոսազանգին պատասխանած Արման սակավագը, ով ներկայացավ որպես Արագածոտնի թեմի առաջնորդի քարտուղար, ասաց, թե մեզնից է առաջին անգամ լսում, որ նման բան է եղել: «Սակայն ես որևէ բան ասել չեմ կարող: Թեմի առաջնորդը կտեղեկանա, ինքն անձամբ կորոշի՝ որևէ բան հայտնել այս առնչությամբ, թե՝ ոչ»:

Նկատենք սակայն, որ ՀայՄեդիա.AM կայքի միջոցով խնդրի մասին տեղեկացած Արագածոտնի թեմը, այնուամենայնիվ, անդրադարձել է հարցին, ըստ երևույթին, չհերքելով, որ, այո, որս կատարած անձը նույն ինքը Տեր Ղևոնդ է եղել: Թեմի Facebook-ի պաշտոնական էջում կարդում ենք մասնավորապես այսհայտարարությունը. «Տարիներ առաջ իմանալով Տ. Ղևոնդ քահանա Գափոյանի` թույլատրելիի սահմաններում որսասիրական հակումների մասին՝ թեմական համապատասխան մարմինը հորդորել է Տեր Հորը հրաժարվել իր նախասիրությունից` այն գիտակցությամբ, որ արարչագործությունը սրբազան նվեր է մարդկությանը, իսկ նրա պահպանությունը նվիրական առաքելություն` անկախ կրոնական պատկանելությունից, սեռից, հասարակության մեջ գրաված դիրքից, մասնագիտությունից և կոչումից: Ավելին, Արագածոտնի Թեմի Թեմակալ Առաջնորդի կողմից Տեր Հայրն արժանացել է խիստ նկատողության և անցել ապաշխարության շրջան: