Որտեղ են հանգստանալու կարկառուն ՀՀԿ-ականներ`Աշոտ Աղաբաբյանն ու Վալոդյա Բադալյանը

Լիարժեք երջանկության համար չափից դուրս ջերմ արեւից բացի, պակասում է ծովափնյա թեթեւ քամին եւ հաճելի միջավայրը: Չնայած հայաստանաբնակներից շատերն այդ ամենը միայն լավ երազում կարող են տեսնել, քանի որ մեկը մյուսին հերթ չտվող թանկացումները բացառում են անգամ Հայաստանում ընտանիքի անդամների հետ թեկուզ մեկ շաբաթով հանգիստ կազմակերպելը: Սակայն հետաքրքիր էր իմանալ, թե ինչպե՞ս են պատրաստվում ամառային հանգիստն անցկացնել քչից-շատից կարողություններ ունեցող հայրենի օրենսդիրները: Օրինակ, ԱԺ ՀՀԿ խմբակցության պատգամավոր Աշոտ Աղաբաբյանը`(Բուռնաշը), Fnews.am-ի հետ զրույցում նշեց.
-Անկեղծ ասած, ես գործուղումների մեջ եմ, դեռ չեմ որոշել, թե որտեղ եմ հանգստանալու: Ինձ համար կարեւոր չէ որտեղ կհանգստանամ. կարեւորը, որ խաղաղ միջավայր լինի, ներվային չլինեմ: Ես իմ հանգիստն անց եմ կացնելու թոռնիկներիս հետ: Եթե գնամ հանգստի՝ ուրեմն նրանց հետ, քանի որ թոռնիկներն աշխարհի ամենաանմեղ եւ պարզ մարդիկ են: Պետք է նշեմ, որ պասիվ հանգստի սիրահար եմ. հանգստի ժամանակ հեռուստացույց, հեռախոս, երաժշտություն չպետք է լինի:Այդ ժամանակ, միայն ծովի խշշոցն է այդ հաճելի: Ես Հայաստանից հանգստի նպատակով ուշ-ուշ եմ դուրս գալիս, սակայն դրսում հանգստանալը` եւս հաճելի է: Երիտասարդ տարիներիս՝ մինչեւ պատերազմը, շատ տեղերում եմ եղել: Իսկ պատերազմից հետո օլիմպիադաների հետ կապված Ավստրալիայում եւ Հունաստանում եմ եղել:
Դե իսկ ՀՀԿ խմբակցության մեկ այլ պատգամավոր Վալոդյա Բադալյանն էլ ամառվա հանգստի հարցը շատ խիստ է դրել: Վերջինս արեւի ճառագայթներից պատսպարվելու միակ վայրը համարում է սեփական տունը.

-Հանգստանալու եմ Երեւանում, մեր տանը, ընտանիքիս ու թոռներիս հետ: Հայաստանից չեմ պատրաստվում դուրս գալ` հանգստանալու նպատակով: Հարմար եմ գտնում իմ ընտանիքի հետ տանը մնալ: Երկու տարի առաջ հանգստացել եմ սանատորիայում: Ես մնալու եմ տանը երեխաներիս ու թոռներիս հետ, իսկ նման հարցերին, թե պատգամավորական աշխատավարձը հերիքում կամ չի հերիքում դրսում հանգստանալու համար, չեմ ցանկանում պատասխանել,քանի որ դրանք ավելորդ հարցեր են»:

Նշենք, որ տվյալ թեմայի հետ կապված փորձեցինք զրուցել նաեւ ԱԺ ՀՀԿ խմբակցության պատգամավոր Արմեն Մխիթարյանի հետ, սակայն վերջինս մի տեսակ խռոված էր, հավանաբար դա կապված է մեր վերջին հրապարակումներից մեկի հետ, որտեղ պատգամավորն ինքն էր խոստովանել, որ իր ջիպը վարկով է վերցրել եւ ամեն ամիս մարում է ջիպի վարկերը:

Շարունակելի…

Սոսե  Չանդոյան