Ոստիկանպետի ԺՊ Արման Սարգսյանը շարունակում է իր քաջագործությունները

Նախօրեին, առիթ ունեցել էինք բարձրաձայնելու այն մասին, որ ՀՀ ոստիկանության ԺՊ Արման Սարգսյանը ջանասիրաբար համակարգ է վերադարձնում այն կադրերին, ովքեր ոչ միայն սերտաճել են նախկինների հետ, այլեւ անցել են ուշագրավ եւ աղմկահարույց միջադեպերի միջով:

Զորօրինակ նշել էինք՝ թե ինչպես է ստացվում, որ ՀՀ ոստիկանության ԺՊ Արման Սարգսյանի օրոք համակարգ է վերադառնում ՀՀ Ոստիկանության 7-րդ վարչության պետի նախկին տեղակալ Աշոտ Մանսուրյանը, ով ըստ ՌՈ նախկին աշխատակից Վարդան Ղուկասյանի. անցնում է ակտիվիստ Վիլեն Գաբրիելյանին՝ Նավակ Ճոճողին առեւանգելու եւ ծեծելու գործով: Ի դեպ Ղուկասյանը զարմանք էր հայտնել նաեւ նախկինում ոստիկանություն գաղտնի դիտարկման բաժնի պետ Արման Ավագյանին՝ 6-րդ գլխավոր վարչության 4-րդ վարչության պետ նշանակվելու հետ կապված, հիշեցնելով որ նա եւս անցել է Սարի թաղի հայտնի դեպքերով:

Այս դարակազմիկ զարգացումների ֆոնին, ոչ պակաս ուշադրության է արժանի մեկ այլ իրողություն եւս. այն է համակարգի հնաբնակ Վիգեն Աղեկյանին՝ պարոն ԺՊ-ի հրամանով, Ոստիկանության Սեւանի բաժնի պետ նշանակելու որոշումը:

Նկատենք, որ նախկինում էլ Աղեկյանը երկու անգամ առիթ ունեցել ՝ նշանակվելու նույն պաշտոնում:

Նշենք նաեւ, որ Աղեկյանը հատկապես իրեն լավ էր զգում ՀՀ նախկին ոստիկանապետ Վլադիմիր Գասպարյանի օրոք, քանի որ (ըստ տարածված լուրերի), նա հատկապես 2017 թվականի իր նշանակումից հետո, մշտապես պաթոսով է խոսել Գասպարյանի մասին, ու թերեւս պատահական չէ, որ նա  Գասպարյանի յուրայինի համբավ է  ունեցել համակարգի ներսում:

Սակայն արի ու տես, որ մեծահարուստ եղբոր տեր Վիգեն Աղեկյանը, Վալերի Օսիպյանի ոսիկանապետ նշանակվելուց հետո  հրաժեշտ տվեց իր աթոռին, իսկ ահա աջ ու ձախ հին կադրերին համակարգ վերադարձնելու առաջամարտիկ Արման Սարգսյանը,  նրան նորից նշանակեց Ոստիկանության Սեւանի բաժնի պետ, ում նշանակումը այդուհանդերձ հետաքրքություն է առաջացրել շատերի մոտ:

Քանի որ, (ինչպես կասեր դասականը. օդում կախված լուրերի համաձայն), թավշյա գործընթացներից հետո, մի միջոցառման ժամանակ վարչապետ Փաշինյանին ամենեւին դուր չի եկել Վիգեն Աղեկյանի պահվածքը, որին ըստ նույն լուրերի հաջորդել է Աղեկյանի պաշտոնանկությունը:

Իսկ թե հիմա ինչ կանաչ լույս է վառվել Աղեկյանի համար, որ նա նորից վերադարձել է հին գործին՝ հավանաբար կիմանան Աղեկյանն ու պարոն ժամանակավոր պաշտոնակատարը:

Ի դեպ, օդում կախված մեկ այլ լուրի համաձայն էլ, Աղեկյանի մեծահարուստ եղբայրը նույնպես իր դերակատարությունն է ունեցել. եղբորը՝ հին պաշտոնին վերադարձնելու սուրբ գործի մեջ…

Հ. Գ

Հիշեցնենք նաեւ, որ դեռեւս 2014-ի հոկտեմբերի 2-ին, երբ մանր և միջին բիզնեսով զբաղվող սևանցիները միացել էին երևանցիների ու գյումրեցիների՝ «Շրջանառության հարկի մասին» օրենքի դեմ պայքարին, Ոստիկանության Սեւանի բաժնի այն ժամանակվա պետ նույն Աղեկյանը (ըստ հրապարակման) քաղաքի առևտրականներին սաստել էր, ասելով՝ եթե դուրս գան ցույցի և փակեն ճանապարհները, խնդիրներ կունենան: Ըստ տարածված լուրերի՝ ոստիկանապետն ասել էր. «Եթե միլիցա բարեկամ ունեք, գործից կհեռացնեմ»:

Մեկնաբանությունները կարծես թե ավելորդ են…

Շարունակելի…

NewsMedia.am 

Լուրեր Հայաստանից եւ աշխարհից