«Ո՞վ կարող էր ավելի հեռուն կրակել»...

«Իրականում ներկլանային պայքարը եւ ինտրիգները այս վերջին ժամանակահատվածում կածես թե առավել ակնառու են դարձել: Բայց միեւնույն ժամանակ այնպիսի տպավորություն է, որ ՀՀԿ-ի ներսում գալիք նախագահական ընտրությունների ֆոնի վրա, գզվռտոցների նոր ալիք է բարձրանում»,-Fnews.am-ի հետ զրույցում նման կարծիք հայտնեց սոցիոլոգ Ահարոն Ադիբեկյանը, անդրադառնալով ներքաղաքական ներկա զարգացումներին ու հնարավոր նոր սցենարների իրագործմանը:
Այդ համատեքստում սոցիոլոգը խոսեց նաեւ առկա նյարդային պատերազմի մասին, եւ շեշտը դնելով հատկապես քարոզչական դաշտում Պաշտպանության նախարար Սեյրան Օհանյանի ու նրա կնոջ դեմ սկսված գրոհի վրա նկատեց.

-Պատճառներից գլխավոր այնն է, որ կա վարկած, որ Սեյրան Օհանյանը 2018-ին կարող է դառնալ ՀՀ Նախագահ: Հավանաբար սա է պատճառը, որ սկսել են մեթոդներ գտնել` նրան վարկաբեկելու, մարդկանց աչքից գցելու համար:
Բայց ես կասեմ հետեւյալը. եթե հիմիկվանից արդեն, երբ դեռ անգամ պարզ չէ, թե ով կդնի թեկնածությունը, սկսել են վարկաբեկել նրան ու նրա ընտանիքին, ուրեմն Սեյրան Օհանյանը շատ լուրջ քաղաքական գործիչ է, և հզոր հակառակորդ: Նա ուրեմն ունի այնքան արժանիքներ, որ 2 տարի առաջ սկսել են վարկաբեկել, որպեսզի 2 տարի հետո գոնե արդյունքի հասնեն:

-Պարոն Ադիբեկյան, իսկ այս պահի դրությամբ ապագա նախագահացուներ նշմարվում ե՞ն, թե՞ դեռ վաղ է այս մասին խոսելը:

-Դեռ 2 տարի կա, և հետո պետք է ժողովուրդն ինքն  ընտրի: Կարծում եմ մյուս տարի մի հարցում կկազմակերպեմ և այդպիսով կերևա, թե ում է ուզում տեսնել որպես նախագահ ժողովուրդը:
-Ի դեպ, քաղաքական տարբեր շրջանակներում, կես կատակ, կես լուրջ խոսակցություններ են պտտվում, որ ՀՀ վարչապետ Հովիկ Աբրահամյանը նույնպես նման հավակնություններ ունի. Ձեր կարծիքով, արդյո՞ք նա օր առաջ կարող էր «հեռուն կրակել»...Այսինքն ցանկություն հայտներ նախագահ դառնալու: 

-Գիտեք վարչապետից նախագահ դառնալը շատ բարդ է: Դա ստացվեց Ռ. Քոչարյանի մոտ, որովհետեւ նա կարողացավ ապացուցել ժողովրդին, որ նա լավ տնտեսվարող է. խելացի ու կիրթ, և ընտրվեց. ինչու չէ՞ նաև սիրվեց: Բայց Հ. Աբրահամյանի առումով չեմ կարող միանշանակ պատասխան տալ, քանի որ այժմ ՀՀ-ն տնտեսական լուրջ խնդիրներ ունի:

-Այդուհանդերձ ներկա պահին ո՞ւմ էր խանգարում Սեյրան Օհանյանը: Եւ ո՞ւմ էր ձեռատու ներխուժել մարդու անձնական կյանք:

- Ես կարծում եմ, որ դա հնարավոր է ՀՀԿ-ից մեկը լինի, ով ևս ուզում է առաջադրվել, բայց վախենում է չընտրվել, քանի որ կունենա հզոր հակառակորդ ` ի դեմս Պաշտպանության նախարարի: Հաստատ ոչինչ ասել չեմ կարող: Իշխանության ներսում միշտ էլ եղել է նույն վիճակը : Չի կարող խաղաղ լինել մի իշխանություն, ուր շատերն իրենց գրպանի մասին են մտածում: Իրականում տգեղ է երևույթը. այդ արշավը, բայց ամենայն հավանականությամբ, այո, ամեն ինչ արվում է ՊՆ նախարար Սեյրան Օհանյանին վարկաբեկելու համար: Հավանաբար այն մարդը, ով կանգնած է այս ամենի հետևում, շատ թույլ  մարդ է, եւ նա այս կերպ փորձում է խազ քաշել նախարարի բարի համբավի վրա , որպեսզի հետագայում իր համար հեշտ լինի իրեն` որպես լավ թեկնածու ներկայացնելը: 

- Իսկ ո՞վ կարող է լինել այդ  մարդը...

-Մատնացույց չեմ անի ոչ մեկին, բայց կասեմ, որ սա նման է նաեւ կնոջ արարքի: Կարծում եմ դա այն պաշտոնյայի կին է , ով հույս ունի նախագահ դառնալ, իսկ կինն էլ ` Առաջին Տիկին : Իսկ այն մտավախությունը, որ հնարավոր է Սեյրան Օհանյանն ընտրվի , իսկ Օհանյանի կինն էլ դառնա Առաջին Տիկին, նրան ստիպում է գնալ նման էժանագին քայլերի: Միայն կասեմ, որ սա շատ թույլ մարդու արարք է:

Ի վերջո չպետք է մոռանալ նաեւ բումերանգի հայտնի էֆեկտի մասին...