Ով ստիպել է, թող տեր կանգնի. գյուղնախարարը՝ Հովիկ Աբրահամյանին

Արարատի մարզի Քաղցրաշեն համայնքի բնակիչներն այսօր կառավարության շենքի մոտ դարձյալ բողոքի ակցիա էին անում՝ պահանջելով 2015 թվականին մթերած, սակայն, մինչ այժմ չստացած խաղողի գումարները:

Կառավարության նիստից առաջ և հետո գյուղացիներին մոտեցավ ՀՀ գյուղատնտեսության նախարար Իգնատի Առաքելյանը:

Քաղցրաշենցիներն իրենց խնդիրները փոխանցեցին գյուղատնտեսության նախարարին՝ ասելով, թե «ինչի ՞ մեզ բերեցիք, էս դռները»

Իգնատի Առաքելյանը նշեց՝ դատախազությունը պարզել է, որ «Վինար» ընկերության սպիրտը խաղողի չէ. «Կա սպիրտ, որը խաղողի չի, առնող էլ չկա»:

Նա գյուղացիներին առաջարկեց սպիրտը վերցնել, սակայն, քաղցրաշենցիները հրաժարվեցին:

«Սպիրտը վերցնենք ի՞նչ անենք: Տվեք մեր փողերը, վարկերը չենք կարողանում փակել»,- ասացին տուժած գյուղացիները:

Այդ ընթացքում գյուղացիները նաև կատակեցին՝ ասելով, թե պետք է «Վինար»-ի տնօրենին պաշտոն տան, որպեսզի իրենց պարտքերը կարողանա մարի, նախարարն էլ առաջարկեց, որ նրան տանեն իրենց այգիներում աշխատեցնեն:

«Բա ես կթողնե՞մ իմ այգում անգրագետ մարդն աշխատի, կոմպյուտեր, անգլերեն չիմանա՞»,- նշեց գյուղացիներից մեկը:

Հարցին, թե չի՞ կարծում, որ ստեղծված իրավիճակը հետևանք է նրա, որ ժամանակին կառավարությունը ստիպեց խաղողագործներին մթերել խաղողը՝ ասելով «ընդունեք, մենք տեր ենք», Իգնատի Առաքելյանը պատասխանեց. «Դե ով ստիպել է, թող տեր կանգնի»։

Իգնատի Առաքելյանը մեկ անգամ ևս շեշտեց, որ «Վինարի» հետ կապված ամեն ինչ անօրինական է՝ ոչ լիցենզիա ունի, ոչ էլ սպիրտ, դրա համար էլ իրենք դիմել են իրավապահ մարմիններին:

Դիտարկմանը,թե  նախկին վարչապետ Հովիկ Աբրահամյանն էր ստիպել, որ իրենք խնդրի մասին բարձրաձայնեն, նախարարն արձագանքեց. «Դե ուրեմն թող տեր կանգնի, ինչ ասեմ»:

«Այս իրավիճակից ելք չկա: Եթե մի քաղաքացին խաբում է մյուսին ու ինքը ոչինչ չունի, ապա ի՞նչ ելք կա: Դատարան ենք տվել, կգնա կդատվի, հետո՞: Ելքը ո՞րն ա: Քաղցրաշենցիների ցակությունը փող ստանալն է: Պետության լծակն էլ այն է, որ ասեն՝ եկեք մենք էդ փողը վերցնենք տանք «Վինար»-ի փոխարեն: Դա ճի՞շտ է: Եթե կառավարությունն այսօր «Վինար»-ի փոխարեն քաղցրաշենցիների փողը տա, դա ճի՞շտ է: Էդ դեպքում ինչի՞ բոլորին չտանք էդ փողերը, որոնք չեն ստացել: Սա բիզնես միջավայր է, որտեղ մեկը մյուսին խաբել է»,- ասաց Իգնատի Առաքելյանը: