Ովքե՞ր կդառնան դերակատարներ`սահմանադրական բարեփոխումներից հետո...

Սահմանադրական բարեփոխումների փաթեթն արդեն իսկ պատրաստ է, համաձայն որի ազդարարվել է, որ Ազգային ժողովը կազմված է լինելու առնվազն 101 պատգամավորից: Ինչպիսի ուրախությո~ւն, հավանաբար որոշ հաստավզեր ու անիմաստ կնոպկա սեղմողներ կհեռանան խորհրդարանից…

Դե ինչ, նոր Սահմանադրությամբ մենք անցում ենք կատարում կառավարման խորհրդարանական համակարգին: Իսկ թե ինչքանո՞վ դա կգործի Հայաստանում, եւ որո՞նք են կառավարման խորհրդարանական համակարգի առավելությունները, Fnews.am-ը այս եւ այլ հարցերի շուրջ զրուցեց ԱԺ ՀՀԿ-ական պատգամավոր Մկրտիչ Մինասյանի հետ:

-Պարոն Մինասյան, նախ քաղաքական օրակարգում եռացող ամենագլխավոր գլխավոր հարցի շուրջ: Ի՞նչ եք կարծում, ՀՀ-ի քաղաքական դեմքերից ովքե՞ր կմնան դերակատար ֆիգուրների դերում `սահմանադրական փոփոխություններից հետո: Սերժ Սարգսյան, Սեյրան Օհանյան, Վիգեն Սարգսյան, Կարեն Կարապետյան, Հ. Աբրահամյան, Արթուր Բաղդասարյան, եւ այլք …

-Ըստ իս, կմնան բոլոր արժանավորները:

-Այսինքն նշվածներից բոլորն  էլ արժանավոր ե՞ն, թե՞…

-Այո իհարկե, դուք արժանավոր մարդկանց անուններ եք տալիս: Աբրահամյանն էլ,Վիգենն էլ, բոլորն էլ, արժանավոր են: Բա ի՞նչ. մի՞թե ՀՀ նախագահից, Սեյրան Օհանյանից, Կարեն Կարապետյանից, ու Արթուր Բաղդասարյանից նշանավոր ու արժանի մարդիկ կան:

-Կարո՞ղ եք նշել Նոր Սահմանադրության վիճահարույց մի քանի կետերի մասին, որոնք ըստ  էության կարող են թեժ քննարկումների առիթ դառնալ:

-Հիմա դժվարանում եմ պատասխանել այդ հարցին, բայց իհարկե  կլինեն կետեր, որոնք կդառնան քննարկման առարկա:

-Պարոն Մինասյան, Ձեր կարծիքով ՀՀ-ում կգործի՞ Կառավարման խորհրդարանական համակարգը:

-Իսկ ինչո՞ւ չպետք է գործի: Մենք բավականին լուրջ կադրեր ունենք, ովքեր կարողանում են ճիշտ լուծումներ տալ ցանկացած խնդրի, եւ ես վստահ եմ որ կառավարման այս տարբերակի դեպքում նույնպես, նրանք ի զորու կլինեն հաջողությամբ լուծելու իրենց առջեւ դրված խնդիրները:

-Իսկ ի՞նչ կասեք ընդդիմադիր ուժերի մասով: Արդյո՞ք Նոր Սահմանադրությունը հնարավորություն կընձեռնի ընդդիմադիր սեկտորին նույնպես:

-Ընդդիմադիր ուժերին կընձեռնվի ավելի լայն հնարավորություններ: Կարծում եմ Նոր Սահմանադրությունը կօգնի մեր երկրում առավել  արդյունավետ Կառավարման համակարգ ունենալ և լուծել մեր առջեւ  ծառացած բոլոր խնդիրները:

Աննա Առաքելյան