«Պա՛պ, Շուշանիկ Ալբերտովնայից էն կողմ՝ բժիշկ չկա։ Բայց…». ցուցմունք տվեց ծննդկան Մերի Մարգարյանի հայրը

Շենգավիթ վարչական շրջանի ընդհանուր իրավասության դատարանում Դավիթ Բալայանի նախագահությամբ ընթանում է «Շենգավիթ» ԲԿ մանկաբարձ-գինեկոլոգներ Շուշանիկ Բախշյանի և Անի Բաբելյանի գործի դատական քննությունը:

Բժշկուհիները մեղադրվում են այն բանի համար, որ իրենց մասնագիտական պարտականությունների նկատմամբ անփույթ և անբարեխիղճ վերաբերմունքի հետևանքով անզգուշությամբ առաջացրել են ծննդկան Մերի Մարգարյանի և նրա նորածին երեխայի մահը: Նրանց մեղադրանք է առաջադրված ՀՀ քրեական օրենսգրքի 130 հոդվածի 2-րդ մասով:

Նախագահող դատավորը այս գործը մի քանի անգամ վերադարձրել էր մեղադրողին, որպեսզի շտկվեին առկա նախաքննական թերությունները:

Եվ գործի դատական քննությունը հիմա արդեն սկսվել է:

Դատարանը հարցաքննեց տուժող կողմին՝ տուժողի իրավահաջորդներին՝ Մերի Մարգարյանի հայրիկին և ամուսնուն:

Մերիի հայրիկը, ինչպես նաև ամուսինը ցուցմունք տվեցին բավական զգացմունքային, բայց և՝ հիմնականում՝ առանց ավելորդ բռնկումների:

Վշտահար հայրը նշեց, որ իր դուստրը՝ մասնագիտությամբ դեղագետ Մերի Մարգարյանը անվերապահորեն հավատացել ու վստահել է իր բժշկին՝ մանկաբարձ-գինեկոլոգ Շուշանիկ Բախշյանին՝ «Ֆանտաստիկ էր վստահում իր բժշկին, ասում էր՝ պա՛պ, ես Շուշանիկ Ալբերտովնային վստահում եմ, դրանից էն կողմ՝ բժիշկ չկա»:

Մերին բժշկուհուն վստահել է հոր կարծիքը հաշվի չառնելով՝ հայրը վերջին մի քանի օրը, երբ Մերիի ջերմույթյունը չէր իջնում, անընդհատ առաջարկել է գնալ ուրիշ բժշկի մոտ, ուրիշ հիվանդանոց: Բայց Մերին իր բժշկուհուն է անընդհատ զանգահարել, ուրիշ բժշկի մոտ գնալ չի ցանկացել…

Մերին «Շենգավիթ» ԲԿ-ում որպես հղի՝ հաշվառվել էր 2015 թվականի փետրվարի 11-ից: Նրա բժիշկը «Շենգավիթ» ԲԿ մանկաբարձ-գինեկոլոգ Շուշանիկ Բախշյանն էր, ում մոտ՝ որպես շատ լավ բժշկի մոտ՝ Մերին գնացել էր ընտանիքի բարեկամի խորհրդով:

Մերիի ջերմությունը բարձրացել էր հղիության ամենավերջին շրջանում՝ հուլիսի 23-ից: Մերին ու նրա հարազատները անընդհատ հեռախոսային կապի մեջ են եղել բժշկուհի Շուշանիկ Բախշյանի հետ, տեղեկացրել են հղիի ջերմության բարձրացման մասին: Բժշկուհին հենց սկզբից եզրակացրել է, որ Մերի Մարգարյանը քաղաքում տարածված վիրուսային հիվանդության պատճառով է ջերմում, և խորհուրդ է տվել, որ նա «Պարացետամոլ» խմի:

Ըստ տուժողի իրավահաջորդ Մարգարյանի՝ բժշկուհի Բախշյանը անընդհատ պնդել է, որ Մերիի մոտ գինեկոլոգիական խնդիր չկա, նա գինեկոլոգիական որևէ սխալ բացառել է: Եվ հուլիսի 23-ից 26-ը Մերին բժշկուհու խորհրդով միայն «Պարացետամոլ» է խմել, մի անգամ էլ «Անալգին-դիմեդրոլ» են ներարկել: Այդ ընթացքում Մերին հարազատների ուղեկցությամբ մի քանի անգամ գնացել է «Շենգավիթ» բժշկական կենտրոն, որտեղ կատարել են արյան ու մեզի անալիզներ, լսել են երեխայի սրտի բաբախոցը ու ասել են, թե ամեն բան նորմալ է: Այդ օրերին Շուշանիկ Բախշյանը չի աշխատել, նա ծննդկանի ու նրա հարազատների հետ ունեցել է բազմաթիվ հեռախոսազրույցներ, տվել է խորհուրդներ, մասնավորապես, վստահ լինելով, որ ծննդկանը գինեկոլոգիական խնդիրներ չունի, հուլիսի 25-ին խորհուրդ է տվել, որ հետազոտեն ծննդկանի ատամների ու կոկորդի վիճակը, միգուցե ջերմության անընդհատ բարձրանալը դրանցում առկա հիվանդության պատճառով էր: Մերիի ատամներն ու կոկորդը առողջ են եղել: Ստուգող բժիշկը նշել է, որ ծննդկանի մոտ կարող է միայն գինեկոլոգիական խնդիր լինել, նա պիտի իրեն հսկող բժշկին ներկայանա:

մանրամասները՝1-in.am-ում: