Փաշինյան-Շաբոյան. Լեզվակռիվ ԱԺ-ում

Այսօր ԱԺ-ում էր ՀՀ տնտեսական մրցակցության պաշտպանության պետական հանձնաժողովի նախագահ Արտակ Շաբոյանը, ում ԱԺ Հայ ազգային կոնգրես ընդդիմադիր խմբակցության պատգամավոր Նիկոլ Փաշինյանը հիշեցրեց, որ նախագահը վերջերս Շաբոյանին ևս մեկ անգամ նշանակեց ՏՄՊՊՀ նախագահ և այդ նույն ժամանակ Երևանում շաքարավազի գինը նույն ժամանակահատվածում Վրաստանի համեմատ բավականին թանկ է եղել. «Հարցս հետևյալն է, ի՞նչ կապ ունի այս փաստն այն իրողության հետ, որ ՀՀ-ի ապրանքային շուկայում սպառելու համար Հայաստան շաքարավազ ներկրել է մեկ անձ, ես չեմ ասում մեկ ՍՊԸ, և այդ անձը ՀՀԿ խմբակցության պատգամավոր Սամվել Ալեքսանյանն է»:

Փաշինյանը հետաքրքրվեց, թե ինչու է Հայաստանում բանանը էականորեն թանկ, ի տարբերություն Ավստրիայի և հայտարարեց, որ համաձայն մամուլի հրապարակումների, Հայաստանում բանան է ներկրում ԴԱՀԿ ծառայության պետ Միհրան Պողոսյանը.«Ձեր ղեկավարած կառույցը այս փաստերն ուսումնասիրե՞լ է, և արե՞լ է համապատասխան հետևություններ:

Արդյո՞ք ուսումնասիրել եք այն տեղությունները, որ առանց Միհրան Պողոսյանի «դաբրոյի» ոչ ոք չի կարող Հայաստան բանան ներկրել»: Փաշինյանի հայտարարությունը իրականությանը չեն համապատասխանում` միանգամից հակադարձեց ՏՄՊՊՀ նախագահ Արտակ Շաբոյանը և հավելեց, որ իր կարծիքով այդ հայտարարություններն անիմաստ են ու անհեթեթ:

«Մենք իհարկե ուսումնասիրություններ իրականացրել ենք: Մասնավորապես, շաքարավազի շուկայում, մասնավորապես բանանի ներկրման ոլորտում, քանի որ, այո’, այդ ոլորտներում կան խոշոր ընկերություններ և խնդիրը գտնվում է հանձնաժողովի տեսադաշտում»: Արտակ Շաբոյանը հայտարարեց, թե իրենց չի հետաքրքրում, թե որ ընկերության սեփականատերն ով է.«Մենք գործում ենք տնտեսվարողների հետ»:

Փաշինյանն արձագանքելով Շաբոյանի պատասխաններին, մասնավորապես որակումներին, նշեց.«Եթե դուք նայեիք կողքից, թե ընդհանրապես այս ամբիոնից ինչ եք խոսում, դուք այն ժամանակ կիմանայիք, թե անիմաստն ինչ է, անհեթեթն ինչ է»: Փաշինյանը շարունակելով նկատեց.«Հիմա ես Ձեզ, որ այդտեղ նայում եմ, որ Ձեզ այդտեղ նշանակող մարդիկ ընդհանրապես անիմաստ են ու անհեթհեթ»:

Շաբոյանը Փաշինյանին կոչ արեց պահպանել էթիկայի կանոնները և «լինել չափի մեջ»: «Ես ձեզ կոչ եմ անում խոսել տնտեսագիտության լեզվով, այլ ոչ թե պոպուլիստական հայտարարություններ կատարել: Դուք թվեր եք հրապարակում, որոնք իրականությանը չեն համապատսախանում»: