Պատերազմը չի էլ վերջացել,պարզապես նոր փուլ դեռ չի սկսվի

Որոշակի լարվածություն կա, կրակոցների թիվն է ավելացել, հակառակորդը ոչ միայն Արցախում, այլ նաև Հայաստանի Հանրապետության սահմանամերձ բնակավայրերի ուղղությամբ է կրակում: Այս մասին այսօր լրագրողների հետ զրույցում ասել էր Պաշտպանության նախարար Սերյան Օհանյանը՝ անդրադառնալով սահմանին տիրող վիճակին:

Նախարարը նշել էր նաեւ այն մասին, որ վերջին օրերին հակառակորդը խոշոր տրամաչափերի ականանետներից է կրակում։ «Իհարկե, կրակոցները ստույգ և ճշգրիտ չեն եղել, սակայն իրավիճակը հայկական ստորաբաժանումների կողմից՝ թե ԼՂՀ տարածքում, թե մեր սահմաններում վերահսկվում է»,-ասել էր նա:

Իսկ թե ի՞նչ կանխատեսումներ ունի սահմանին տիրող իրադրության եւ Ադրբեջանի դրսեւորած քաղաքական ԿԱՐՃԱՏԵՍՈՒԹՅԱՆ շուրջ, Արցախյան ազատամարտի առաջին հետախուզադիվերսիոն ջոկատի հրամանատար Վովա Վարդանովը, Fnews.am-ը հարցի պատասխանը փորձեց ստանալ հենց նրանից.
-Գիտեք, ոչ մի արտառոց բան չկա, երբ հակառակորդը ակտիվություն է ցուցաբերում: Դա Ալիև 2-րդ-ի որդեգրած քաղաքականությունն է :
-Արդյո՞ք սա լայնամասշտաբ պատերազմի սպառնալիք չէ: Մինչեւ ո՞ւր կգնա Ադրբեջանը: Եւ ըստ Ձեզ, որքա՞ն է կայծակնային պատերազմի հավանականությունը:

-Պատերազմը չի էլ վերջացել, պարզապես նոր փուլ դեռ չի սկսվի: Իսկ ի՞նչ է փոխվել, որ պատերազմ սկսվի: Ալիևը ինչպես եղել է, այդպիսին էլ շարունակում է մնալ: Չեմ կարծում, որ լայնամասշտաբ պատերազմ կսկսվի: Ճիշտ է` նրանք լավ զենք, զինամթերք ունեն, բայց նրանց բնակչությունը դեռ պատրաստ չէ դրան:

-Իսկ ի՞նչ կասեք Զաքիր Հասանովի վերջին աղմկահարույց արտահայտության մասին:

-Զաքիր Հասանովի արտահայտությունը այն մասին, որ եթե հայերը նորից խոցեն իրենց բնակավայրերը, ապա, իրենք կանցնեն ուժեղ հարձակման՝ ընդամենը հիմարություն է:
Իրենց մոտ երեխաների ձեռքին պայթուցիկներ էին պայթել ու վնասվել, որից հետո էլ հայտարարեցին, թե դա հայերի ձեռքի գործն է, եւ որ հաջորդիվ իրենք կխոցեն հայկական զինուժին ու կխփեն հայկական բնակավայրերին, ինչն  ի դեպ շատ տրամաբանական է ու թուրքերին բնորոշ: Հասանովին փաստորեն, թյուրիմացության մեջ էին գցել: Իսկ դրանից հետո էլ, կարծում եմ դուք էլ եք տեղյակ, որ նրանց Ներքին Գործերի նախարարությունը հայտարարեց, որ երեխաները պարզապես պայթուցիկով են խաղացել:Կարծում եմ, Հասանովն այդքան էլ խելացի չէ և նրան դրդում են այս կամ այն քայլին գնալ:

-Այդուհանդերձ, այսօր հայկական կողմը պատրաստ է ՞ պատերազմի:

-Իհարկե, միանշանակ մենք ավելի հզոր ենք մեր թշնամուց, եւ նրանք դա լավ գիտեն, դրա համար էլ չեն համարձակվում պատերազմ սկսել: Ե'ւ ՀՀ-ն, և' ԼՂՀ-ն պատրաստ են պատերազմի:

-Իսկ արդյո՞ք մեր ազատամարտիկները ` անկախ այսօրվա իրենց ունեցած կարգավիճակից կկանգնեն զինվորների կողքին:

-Եթե նրանց առողջությունը և տարիքը ների ` միանշանակ, անկասկած կկանգնեն: Մեր կամավորները շատ են և հայրենասեր: Հիշեք`  կամավորականները ազգի սերուցքն են:

Ա. Առաքելյան