Փախչելով խնդիր չենք լուծի, Ծառուկյանը դուրս եկավ՝ կան ուրիշ մարդիկ. ՀԱԿ անդամ

1in.am-ը գրում է. «Առաջին լրատվական»-ի զրուցակիցն է ՀԱԿ վարչության անդամ, ազատամարտիկ Վարդան Մալխասյանը:

– Պարոն Մալխասյան, Ձեր գործընկեր կուսակցությունը՝ «Բարգավաճ Հայաստանը», չեղյալ համարեց փետրվարի 20-ին Ազատության հրապարակում հրավիրած հանրահավաքը: Ի՞նչ կարծիք ունեք այս որոշման և Գագիկ Ծառուկյանի հայտարարության մասին:

– Թե հայտարարության խորքում ինչեր կան թաքնված՝ դեռևս չեմ կարող ոչինչ ասել, որովհետև Վարդանն էլ գնաց, հայտարարություն տվեց Տիզբոնում, հետո եկավ, կռիվ տվեց: Եթե այդ հայտարարությունը փախուստ է պարունակում՝ դա մի քիչ վտանգավոր է: Նրա ասպարեզից դուրս գալով՝ իհարկե, իրավիճակ է փոխվում: Ցանկացած մարդ ինքն է որոշում՝ իրեն բաժին հասած ճանապարհն ինչպես գնա, ինչպես տնօրինի: Եթե նա ընտրեց փախուստի ճանապարհը, ապա պետք է ասեմ, որ փախուստը ճանապարհ չէ, փախչելով չես հաղթի, փախչելով միայն ուժեղացնում ես նրան, ում պետք է հաղթես։

Փախչելով՝ մենք մեր երկիրը կթողնենք հոշոտողներին, փախչելով խնդիր չենք լուծի: Բազմիցս՝ թե՛ ես, թե՛ Լևոն Տեր-Պետրոսյանը և անգամ ԲՀԿ անդամները հայտարարել են, որ մեր ուժը մեր միասնականության մեջ է, և նպատակին հասնելու ամենակարևոր նախապայմանը չվհատվելն ու պայքարելն է, ու մենք գնալու ենք հենց այդ ճանապարհով:

– Օրինակ ինչպե՞ս, ի՞նչ մեթոդներով եք պայքարելու առանց ԲՀԿ-ի:

- Ձեր հարցին ես ունեմ մեկ ուրիշ պատասխան. մենք ժամանակին ունեցել ենք Վահան Մամիկոնյան, որին ասել են Գայլ Վահան: Այդ Գայլ Վահանը տասնամյակներ շարունակ եղել է մեն-մենակ, մարտնչել պարսկական հզոր պետության դեմ և մի պայմանագիր պարտադրել, որով բռնակալը հայրենասեր զինվորի առաջ պարտավորվել է, որ նվաստ, ընչաքաղց, ծախու և կաշառակեր հայերին պաշտոններ չտա Հայաստանում: Մենք մինչև հիմա նույնն էինք ասում Սերժ Սարգսյանին:

Իշխանափոխության հասնելն ինքնանպատակ չէ, մենք չէինք ուզում նրան հանել ու գայինք նրա փոխարեն: Սերժ Սարգսյանին նույնն էինք ասում. այսօր կոչումներով ու պարգևներով եք լցնում իշխանության ոտքերի տակ սողացող՝ կեղտի ու հանցանքների մեջ թաղված մարդկանց, ազատվե՛ք նրանցից: Հայաստանը դարձրեք երկիր, որտեղից հայերը ոչ թե փախչեն, ինչպես դժոխքից, այլ մնան ու ուժեղացնեն երկիրը։ Մենք սա՛ ենք ասել. եթե չի արել, ուրեմն պայքարը շարունակվում է:

մանրամասները` սկզբնաղբյուրում