6 Օգոստոս, 2015

Փայլակ Հայրապետյանի խնամին վստահել է ոչ թե Աշոտ Սուքիասյանին, այլ` իր խնամուն

Աղմկահարույց օֆշորի գործով դատաքննությանն այսօր դատարանը լսեց գործով տուժող, հայտնի գործարար Փայլակ Հայրապետյանի խնամի Գագիկ Ղարիբյանին:

Նա նշեց, որ մտադիր է քաղաքացիական հայց ներկայացնել՝ ամբաստանյալ Աշոտ Սուքիասյանից իրեն հասցված վնասների փոխհատուցում պահանջելով:

Փայլակ Հայրապետյանի գույքից բացի, Աշոտ Սուքիասյանը հայտնի ադամանդի հումքի դիմաց «Ամերիաբանկում» գրավադրել է նաև նրա խնամու՝ Գագիկ Ղարիբյանին պատկանող գույքը: Եվ քանի որ չի վճարել բանկին, բանկը պարտքի դիմաց տիրացել է նրա` 5 միլիոն դոլար արժողությամբ գույքին:

«Խնամիս մի օր եկավ ու ասաց, որ Հայաստանում բիզնեսծրագիր է իրականացվում, որի շնորհիվ Հայաստանում բազմաթիվ աշխատատեղեր են ստեղծվելու, Հայաստանում մեծ ներդրումներ են լինելու, ես էլ, վստահելով Փայլակ Հայրապետյանին, ամեն ինչ թողեցի նրա վերահսկողության տակ և համաձայնեցի իմ գույքը ներդնել այդ ծրագրում»,-ասաց Գագիկ Ղարիբյանը:

Նա նաև պատմեց, որ որոշ ժամանակ անց խնամին իրեն ասել է, որ ոչ մի բիզնես ծրագիր էլ չի իրականացվել, որ Աշոտ Սուքիասյանն իրենց խաբել է, բանկին չի վճարել և բանկը տիրացել է իրենց գույքին:

Հարցին, թե ինչպես է իր գույքը հանձնել Աշոտ Սուքիասյանին և ինչպես է վստահել նրան, Գագիկ Ղարիբյանը պատասխանեց, որ ինքը վստահել է ոչ թե Աշոտ Սուքիասյանին, այլ իր խնամուն՝ Փայլակ Հայրապետյանին, և մինչեւ հիմա էլ վստահում է նրան:

Գործով երրորդ տուժող, Փայլակ Հայրապետյանի որդի Վարդան Հայրապետյանն այսօր դատարան չէր ներկայացել, ուստի՝ դատավարությունը հետաձգվեց՝ մինչև նրա ներկայությունն ապահովելը: Վարդան Հայրապետյանը հաշմանդամ է, ունի տեղաշարժվելու դժվարություններ, ուստի՝ դատարանի թույլտվությամբ ոչ բոլոր դատական նիստերին է ներկայանում:

Հեղինակ:

«Փաստինֆո»