Պերմյակովի գործով դատաքննությունը նշանակված է օգոստոսի 12-ին

Հայաստանում ռուսական կայազորային դատարանը 102-րդ ռուսական ռազմակայանի զինծառայող՝ Գյումրիում 7-հոգանոց ընտանիքի սպանության համար մեղադրվող Վալերի Պերմյակովի՝ դասալքության և զենքով զորամասի տարածքը լքելու վերաբերյալ քրեական գործով դատաքննությունը նշանակել է օգոստոսի 12-ին: Այս մասին RIA Novosti-ին հայտնել է Հյուսիս-կովկասյան օկրուգի զինվորական դատարանի մամլո քարտուղար Ալյոնա Կատկալոն:
«Հինգերորդ կայազորային զինվորական դատարանի դատավորի վճռի համաձայն՝ Պերմյակովի դեմ քրեական գործի բաց դատական նիստը նշանակված է 2015թ. օգոստոսի 12-ին»,- ասել է Կատկալոն:
Դատարանը նաև Պերմյակովի կալանքի ժամկետը երկարաձգել է մինչև 2016թ. հունվարի 30-ը:
Ինչպես ավելի վաղ հայտնի էր դարձել՝ թեև Պերմյակովի գործի հետագա դատաքննությունը հանձնվել է հայկական կողմին, սակայն առաջին նիստը ռուսական ռազմակայանի տարածքում անցկացնելը ևս Հայաստանի և Ռուսաստանի համապատասխան ծառայությունների միջև ձեռք բերված պայմանավորվածության շրջանակներում է: Խնդիրն այն է, որ Վալերի Պերմյակովը, բացի Ավետիսյանների ընտանիքի 7 անդամների սպանությունը, թույլ է տվել նաև զինվորական կանոնակարգի կոպիտ խախտումներ: Հենց այդ պատճառով առաջին նիստի ժամանակ քննվելու են Ավետիսյանների ընտանիքի սպանությանը նախորդած Պերմյակովի կողմից թույլ տրված զինվորական կանոնակարգի խախտումները:
Պերմյակովին մեղադրանք է ներկայացվելու ծառայության վայրը ինքնակամ լքելու, իրեն ամրակցված ինքնաձիգը զորամասի տարածքից դուրս հանելու և դա քաղաքացիական անձանց սպանության նպատակով օգտագործելու համար: Միայն այդ հարցերը լսելուց հետո կարող է որոշում կայացվել, որ գործի հետագա դատաքննությունը հանձնվում է Հայաստանի իրավապահ մարմիններին, ինչը նշանակելու է, որ Հայաստանի իրավապահներին է հանձնվելու նաև Պերմյակովը: