Փոխոստիկանապետը՝ Նուբարաշենի սպանության մասին. Նաեւ անուններ են հայտնի

«Նուբարաշեն» քրեակատարողական հիմնարկի մոտ մարտի 4-ին քրեական դեմքերի` Դրաստամատ Թադեւոսյանի, Լեւոնի Ղազարյանի (3-րդ մասցի Լյովիկ), Մեսրոպ Նազարյանցի սպանության եւ գործի բացահայտման ուղղությամբ տարվող աշխատանքների վերաբերյալ NEWS.am-ը զրուցել է Ոստիկանության պետի առաջին տեղակալ Հունան Պողոսյանի հետ:

Պարոն Պողոսյան, արդեն երեք օր է, օրը ցերեկով տեսախցիկների ներքո տեղի է ունեցել սպանություն, սակայն ոչ ոք դեռ հայտնաբերված չէ, որոնողական աշխատանքները ի՞նչ փուլում են, ի՞նչ նորություն կա:

Կատարվածից անմիջապես հետո ակտիվ բազմաբնույթ, բազմածավալ որոնողական եւ օպրերտիվ հետախուզական միջոցառումներ են իրականացվում, այս պահին կարող եմ վստահաբար ասել, որ դրանք արդյունավետ են, նորից կրկնեմ իմ ավելի վաղ հնչեցրած միտքը` չբացահայտվող հանցագործություններ չկան եւ ուղղակի որոշ դեպքերում որոշ ժամանակ է հարկավոր: Ոստիկանության կողմից ձեռնարկված հետախուզական, որոնողական աշխատանքների հիմնական նպատակը մեկն է` ստեղծել այնպիսի իրավիճակ, որ սահմանափակվի որոնվողի եւ որոնվողների շարժը, այնպիսի դրության մեջ հայտնվեն, որ խուսանավելու հնարավորություն չունենան: Մի խոսքով, նրանց շուրջ օղակը սեղմենք:

Որքանո՞վ է հաջողվել օղակը սեղմել, հատկապես որ խոսվում է` սպանվածների ու նրանց հետ առնչվողները կապված են քաղաքակական որոշ շրջանակների հետ, որոնց անունը այս օրերին արդեն շրջանառվում է: Այս պարագայում կարո՞ղ եք վստահեցնել, որ այդ սպանությունը ամբողջությամբ կբացահայտվի:

Ոստիկանությունը վեր է Ձեր թվարկած ամեն ինչից, մի անգամ չի, որ ապացուցել է, որ իրականում այդպես է եւ իր գործունեության վերջին տարիներին ցույց է տվել` ովքեր օրինահարգ են, ոստիկանությունը հարգում է նրանց: Ովքեր օրինազանց են, խստագույնս կպատժվեն, օպերատիվ փնտրողական եւ հետախուզական աշխատանքները բավական արդյունավետ են, պարզապես համբերեք եւ կլսեք արդյունքների մասին:

Շրջանառվում է ԱԺ պատգամավոր Մհեր Սեդրակյանի թիկնապահներից մեկի անունը, ով Էրեբունի վարչական շրջանում հայտնի է՝ Կյաժ Մարտուն մականվամբ եւ տեղի ունեցածը մեկնաբանվում` որպես անցած տարվա մարտից «օրենքով» գող օշականցի Գեւորիկի եւ 3-րդ մասցի Լյովիկի միջեւ տեղի ունեցած ընդհարումների շարունակություն: Այս անունները կապվա՞ծ են սպանության հետ:

Բոլոր վարկածներն էլ քննվում են եւ քննարկվում են, ես ընդամենը ասում եմ հետեւյալը` ասեկոսեներին տուրք մի տվեք, ոստիկանությունը շատ համբերատար, պրոֆեսիոնալ իր գործն է անում: Մեր կատարած աշխատանքները բավականին արդյունավետ են, պարզապես համբերեք….

Պարոն Պողոսյան, ինչո՞ւ Ազգային անվտանգության ծառայությանը հանձնվեց գործը, ինչո՞վ էր այս գործը առանձնահատուկ:

Ընդամենը հանձնարարվել է` Ազգային անվտանգության կազմում գտնվող նախաքննական մարմինը, քննչական վարչությունը, օպերատիվ հետախուզական միջոցառումները իրականացնեն համատեղ Ազգային անվտանգության ծառայության ու ՀՀ ոստիկանության համապատասխան ստորաբաժանումների հետ: Այդպես է նպատակահարմար գտնվել: Դրանից ոչինչ չի փոխվում, տարվող աշխատանքները բավական արդյունավետ են…

Վերջին մեկ տարվա ընթացքում ՀՀ-ում ակտիվորեն գլուխ է բարձրացրել քրեական աշխարհը` սպանություններ, կրակոցներ: Ինչով պայմանավորված՞, հանցավոր միջավայրն արդեն անվերահսկելի՞ է:

Այնպես չէ որ քրեական աշխարհը անընդհատ քնած էր եւ հանկարծ միամիտ գլուխ բարձրացրեց, ամեն ինչ վերահսկելի է, եւ եթե քրեածին միջավայրի դեմքերը, թափթփուկները փորձել են ինչ-որ ձեւով ազդել օպերատիվ իրավիճակի սրման վրա, դա դեռ չի նշանակում, որ անվերահսկելի է… Իհարկե, ցավալի դեպք էր, հասարակական մեծ հնչեղություն, բայց մենք էլ նրա համար ենք, որ իրենց դնենք իրենց տեղը:

Մանրամասներն` այստեղ