Պտտվիր, պտտվիր, «կարուսել», ԲՀԿ-ի երգը վաղուց ենք լսել…

Չնայած նրան, որ քաղաքական քառյակն իր 12 կետերով գնացել է «ամառային հանգստի» այնուամենայնիվ մայրաքաղաքում դեռ մնացել են երիտասարդներ, ովքեր պատրաստ են այսպես կոչված «քառյակների» եւ ընդդիմադիրների փոխարեն բողոքի ակցիա անցկացնել էլեկտրաէներգիայի սակագնի թանկացման վերաբերյալ: Հիշեցնենք, օգոստոսի 1-ին մի շարք երիտասարդներ իրականացրել են ստորագրահավաք վերոնշյալ խնդրի հետ կապված, որին որքան էլ որ զարմանալի է ներկա էր նաեւ ԲՀԿ-ական պատգամավոր Վահե Էնֆիաջյանը: Հասկանալու համար, թե ինչո՞ւ էր ԲՀԿ ներկայացուցիչը մեն մենակ՝ առանց թիմակից պատգամավորների ներկայացել ակցիային, Fnews.am-ը զրուցեց պատգամավոր հետ.
-Սովորաբար ԲՀԿ կուսակցության ներկայացուցիչները եթե միանում են ակցիաներին, ապա դա լինում է թիմով, ինչո՞վ է պայմանավորված Ձեզ ներգրավվածությունն այս ակցիային, արդյո՞ք ԲՀԿ-ում միասնական կարծիք դեռ չի ձեւավորվել էլեկտրաէներգիայի սակագնի հետ կապված:
-Մենք համախոհների միավորում ենք եւ եթե մեր թիմից թեկուզ մեկ հոգի մասնակցում է, ապա դա նշանակում է, որ մեր թիմից մեկ անձ մասնակցում է: Մեր կուսակցության պատգամավորները, անհատները, քաղաքական խորհրդի ներկայացուցիչները բազմիցս տարաբնույթ հայտարարություններով հանդես են եկել, եւ կարծիք ու դիրքորոշում են հայտնել տվյալ խնդրի վերաբերյալ: Մեր մտահոգությունները մենք նոր չէ որ հայտնել ենք, եւ քանի որ երեկ արդեն ուժի մեջ էր մտնում որոշումը, դրա վերաբերյալ նախաձեռնող խումբը ստորագրահավաք էր կազմակերպել ընդդեմ էլեկտրաէներգիայի սակագնի բարձրացմանը, եւ ես, որպես ներկայացուցիչ եւ քաղաքական խորհրդի այլ ներկայացուցիչներ, ինչպես նաեւ երիտասարդների միության ղեկավար մարմնի անդամները, մենք միասնական մասնակցել ենք ակցիային, սատարելով նախաձեռնությանը:
-Իսկ ԲՀԿ խմբակցության այլ պատգամավորներ ներկա՞ էին այդ ակցիային, եւ եթե ոչ, ապա ինչո՞ւ:
-Մեր պատգամավորներից մարդիկ կային, որ նույն օրը տարբեր հեռուստաընկերություններով հարցազրույցներ են տվել եւ դիրքորոշում են հայտնել նույն հարցի վերաբերյալ: Ես նորից կնշեմ, որ եթե թիմից մեկ պատգամավոր կամ քաղաքական խորհրդի ներկայացուցիչներ ներկա են եղել, ապա կարծում եմ, որ դա բավականաչափ է նման նախաձեռնության համար, որպեսզի քաղաքական թիմի կարծիքը եւս մեկ անգամ ամրագրվի եւ բոլորի համար հրապարակային դարձվի:
-Եթե մեկ քաղաքական կառույցի անդամները՝ ինչպիսին ԲՀԿ-ն է, ունեն մեկ ու բացասական տեսակետ էլեկտրաէներգիայի սակագնի բարձրացման հետ կապված, ապա ինչո՞ւ միասնական թիմով հանդես չեք գալիս, ակցիաներ ու հանրահավաքներ չեք կազմակերպում:
-Մենք խորհրդարանում այս հարցին մի քանի անգամ անդրադարձել ենք, մամուլի հետ պարբերաբար շփվելով մեր մտահոգությունները հայտնել ենք ու պարտադիր չէ, որ ամբողջ կուսակցությունը, բոլոր անդամներով, խմբակցության պատգամավորներով կանգնի ու ինչ-որ դիրքորոշում հայտնի ու ցույց տա, որ սա կուսակցության դիրքորոշումն է կամ, որ կուսակցությունն այս հարցի վերաբերյալ տվյալ տեսակետն ունի: Իսկ մեր խմբակցության տարբեր պատգամավորներ իրենց դիրքորոշումներն այս խնդրի վերաբերյալ արդեն իսկ արտահայտել են, միգուցե ձեւակերպումները տարբեր լինեն, բայց մտահոգությունը նույնն է՝ նման գործընթացի կազմակերպումը Հայաստանում անթույլատերլի է:

Այսքանից հետո մնում է միայն մեկ երգ հիշել, որտեղ ասվում է. «Պտտվիր, պտտվիր, «կարուսել», մենք այդ երգը վաղուց ենք լսել»: ԲՀԿ-ականների քայլերից կարելի է երկու եզրահանգման գալ, կամ «Բարգավաճ Հայաստան» կուսակցությունը չունի միասնական տեսակետ էլեկտրաէներգիայի սակագնի բարձրացման հետ կապված՝ այլապես նրանք ձեռք-ձեռքի բռնած, ինչպես նախկինում էին անում ակցիաների կմասնակցեին ու մի լավ «ֆոտոսեսիա» կկազմակերպեին, կամ էլ՝ ԲՀԿ-ում այլեւս փոխվել են բարքերը, եւ ամեն ոք անում է այն, ինչ ցանկանում է…

Սոսե Չանդոյան