Պուտինը չի մոռանա նվաստացումը Երեւանում

Շատերին թվում է, որ մեկ ամիս համաշխարհային քաղաքականության էպիկենտրոնում գտնվելուց հետո Հայաստանը վերադառնալու է իր ճահիճը: Համաշխարհային քաղաքականությունում ամեն ինչ լավ կազմակերպված էր՝ հանրահավաքներ, երթեր, բոլորը հայերի մասին էին խոսում, եւ մենք հպարտ ենք, որ ամբողջ աշխարհն իմացավ, թե ինչպես են մեզ կոտորել ու վտարել մեր հողերից:

Սակայն ամեն ինչ ավարտվել է, եւ պետք է «վերադառնալ»: Արմեն Աշոտյանը Ֆեյսբուքի իր էջում «գաղջին» խնդրել է չվերադառնալ, սակայն այն կարծես թե մտադիր էլ չէ վերադառնալ: Հայաստանը վերջնականապես դուրս է եկել զզվելի, սակայն տաք ճահճից եւ հայտնվել կեղտոտ ու բուռն հոսանքի մեջ, որը հայտնի չէ, թե ուր է տանում:

Այն, որ Պուտինը ստիպված էր Երեւան գալ, իսկ հետո Թուրքիայից նվաստացուցիչ ակնարկներ լսել, հազիվ թե մոռացվի: Այժմ Հայաստանի «ռուսաֆիկացումը» արագանալու է, առավել եւս, պարզ է դարձել, որ Արեւմուտքը չի պատրաստվում պայքարել հայերի շահերի համար: Մոսկվան այլեւս պատճառ չունի Հայաստանի ինքնիշխանությունը նույնիսկ ձեւական պահպանելու համար:

«Ռուս-հայկական» բարեկամության ապոլոգետներից մեկը՝ եվրասիական հիմնադրամների ու նախագծերի ղեկավար Անդրանիկ Նիկողոսյանը հատկանշական հայտարարություն է արել: Մեկնաբանելով այն հանգամանքը, որ Բելառուսի ու Ղազախստանի նախագահները չեն աջակցել Հայաստանին ապրիլի 24-ին, նա ասել է՝ «ավել լավ չէ՞ր լինի մտնել Ռուսաստանի, այլ ոչ թե ԵՏՄ կազմ»:

Իրոք, ԵՏՄ-ը գոնե ինչ-որ կերպ ենթադրում է դրա անդամների ինքնիշխանությունը, եւ դա սկսում է ձանձրացնել Ռուսաստանին: Ինքնիշխանության խաղն ավարտվել է, եկել է հստակ ընտրության պահը՝ կամ Ռուսաստանի կազմ, կամ էլ Ռուսաստանի դեմ:

Ապրիլի 24-ին Հայաստաին ինքնիշխանության ճնշման նոր ակտեր են սպասվում: Հնարավոր է, դա կվերաբերի ղարաբաղյան խնդրին: Մայիսի 9-ին Մոսկվայում է լինելու Ադրբեջանի նախագահը, եւ եթե Սերժ Սարգսյանը Մոսկվա գնա (նա դժվար թե կարողանա հրաժարվել), ապա Պուտինը կարող է եռակողմ հանդիպում կազմակերպել ու ստիպել Հայաստանին ընդունել կարգավորման իր նախագիծը:

Դա կարող է վերաբերվել նաեւ տնտեսությանը: Ռուսաստանը կարող է անարգել բարձրացնել Հայաստանի գազի ու էլեկտրաէներգիայի գինը, եւ ոչ ոք չի դիմադրի: Քանի որ Երեւանում Պուտինին ոչ ոք չի մեղադրել, որ ապրիլի 24-ին նա «ցեղասպանություն» բառը չի ասել, քանի որ Երեւանում Թուրքիայի նկատմամբ պահանջներ չի տեսել, նշանակում է, որ հայ ժողովուրդն ամեն ինչ կուլ կտա:

Այնպես որ, վերադարձ դեպի ճահիճ չի լինելու: Պետք է պատրաստվել Եվրասիական միության փլուզմանն ու Ռուսաստանի կազմ մտնելուն:

Աղբյուրը `  Lragir.am