«Քամին փչում է տարբեր ուղղություններից…»

Անցնող շաբաթվա քննարկումների հիմնական թեման Զորի Բալայանի` ՌԴ նախագահ Վլադիմիր Պուտինին ուղղված նամակն էր, որն ինչ-որ տեղ կարելի է ասել, որ ստվերեց նույնիսկ Վիլնյուսի նոյեմբեր ամսվա հնարավոր զարգացումների թեման: Եվ հենց այդ հարցերի շուրջ էլ forums.am-ը զրուցեց ԱԺ ՀՀԿ խմբակցության քարտուղար Հովիկ Սահակյանի հետ, ով նախ խոսեց հայտնի նամակի մասին.

- Ես բազմիցս հայտնել եմ Զորի Բալայանի նամակի հետ կապված իմ կարծիքը, տեսակետը: Դա նամակ է, որտեղ Զորի Բալայանն իր տեսակետն է հայտնել նամակի միջոցով, որը իրավական որեւէ, այս պահի դրությամբ գոնե, հետեւանք չունի: Իսկ Արցախի, Ղարաբաղի խնդրի հետ կապված բոլոր հարցերի պատասխանը տալիս են հենց Լեռնային Ղարաբաղի ժողովուրդը, կայացած ժողովրդավարական երկրի պետությունը, որն այսօր գոյություն ունի: Եվ դա` անկախ նրանից, թե ինչպիսի մոտեցումներ ու կարծիքներ ունեն տարբեր հասարակական ու քաղաքական գործիչները, պատմաբանները, եւ այլոք: -Ոմանք այդ նամակը համարում են <նամակ ռուսաց թագավորին>, <դավաճանական քայլ>, որով նամակագիրը <ցանկանում է ստրկացնել Արցախը>: -Մենք տեսնում ենք, որ որակումները, մոտեցումները տարբեր բնույթ են կրում, եւ քամին փչում է տարբեր ուղղություններից: Դրա համար այսօր չարժե անդրադառնալ դրանց, մեկին քննադատել, մյուսին ասել, որ այդ որակումը ճիշտ էր կամ սխալ, քանի որ դրանով իսկ իրենց արժեքն ենք բարձրացնում: Ես ասացի այն, ինչ որ մտածում եմ, այն, ինչ որ իմ անձնական տեսակետն է` կապված Զորի Բալայանի նամակի հետ: -Խոսակցություններ կան, որ Հանրապետականներն այդ հարցում միակարծիք չեն: -Հանրապետականներ հասկացությունը մի քիչ լայն հասկացություն է: Եթե, օրինակ, խմբակցությունը նկատի ունեք, ապա այնտեղ յոթանասունից ավելի պատգամավորներ են, որոնցից յուրաքանչյուրն անհատ է եւ տարբեր հարցերի վերաբերյալ ունի իր մոտեցումը: Դժվար թե կարողանային միատարր լինել. կարող է տարբեր նրբերանգների կամ ինչ-որ մտքի հետ կապված այլ կարծիք ունենան: Իսկ Ղարաբաղի խնդրի հետ կապված առհասարակ Հանրապետականների մոտեցումը, տեսակետը միասնական է եւ մեկն է, որի մասին մենք բազմիցս ասել ենք ու մինչեւ այսօր էլ այդ տեսակետին ենք: -Մոտենում է նոյեմբերը, երբ Վիլնյուսում քննարկվելու է ասոցացման խնդիրը: ՀՀ նախագահի` Մաքսային միությանը միանալու վերաբերյալ հայտարարությունից արդեն ամիսուկես անցել է, եւ, ըստ Ձեզ, ինչպիսի՞ն է հիմա եվրոպական համապատասխան կառույցների մոտեցումն այդ հարցում: Ի՞նչ հնարավոր զարգացումներ կարող են լինել Ասոցացման համաձայնագրի հետ կապված… Մաքսային միությունն ու Ասոցացման համաձայնագիրը միմյանց հակասո՞ւմ են: -Դա մի քիչ ավելի խորը եւ երկար ժամանակի վերլուծության խնդիր է: Բայց մենք տեսնում ենք, որ այսօր էլ աշխատանքներ են ընթանում, որպեսզի նոյեմբերին Վիլնյուսում սպասվող Արեւելյան գործընկերության գագաթնաժողովի, այդ հանդիպման ժամանակ ինչ-որ փաստաթուղթ ունենանք: Իսկ թե այդ փաստաթուղթը ինչ ձեւով, ինչ տեսքով կլինի, ինչ դրույթներ կպարունակի, կարծում եմ` այս պահին դեռ վաղ է ասել: Բայց, այնուամենայնիվ, մեր ընդդիմախոսների ու հատկապես չարախնդացողների առաջին ռեակցիայով, պատկերացումներով պայմանավորված լարվածությունը անցել է նաեւ հենց եվրոպական մասի քայլերի շնորհիվ: -Հերթական անգամ շրջանառվում է այն հարցը, որ Ձեզ գործադիրում են պաշտոն տալու: -Ես աշխատում եմ, կուսակցական եմ, ունեմ պարտականություններ մեր խմբակցությունում, խմբակցության քարտուղարն եմ: Կարծում եմ` եւ իմ կուսակցության ղեկավարությունը, եւ այն մարդիկ, ովքեր, այսպես ասած, պաշտոն են տալիս, տեսնում ու գնահատում են կատարած աշխատանքը, գործը: Իսկ մամուլի հրապարակումները, կարծում եմ, ընդամենը աժիոտաժ ստեղծելու համար են արվում, բամբասանքներ են: -Այսինքն, եթե կուսակցությունը, կուսակցության ղեկավարությունը որոշի, որ Դուք պետք է գործադիրում աշխատեք, Դուք կաշխատե՞ք, ո՞ր ոլորտն է Ձեզ ավելի հարազատ: -Այդ մասին այս պահին խոսելու իմաստն էլ չկա, որ նշեմ ոլորտներ… Միայն կարող եմ ասել, որ որոշումները կայացվում են նաեւ փոխադարձ համաձայնության սկզբունքի հիման վրա:

Ճեպազրույցը` Ռ. ԹԱԹՈՅԱՆԻ