Քաղաքագետ Արմեն Բադալյանի տեսակետը հոկտեմբերի 24-ի հանրահավաքի վերաբերյալ

Shabat.am-ը գրում է. Երեկ՝ հոկտեմբերի 24-ին, տեղի ունեցավ ընդդիմադիր եռյակի հանրահավաքը: Հանրահավաք, որից ժողովուրդը մեծ սպասելիքներ ուներ: Արդյո՞ք արդյունավետ էր, և ի՞նչ արդյունքեր կարելի է արձանագրել: Այս մասին Shabat.am-ի լրագրողի հետ զրուցեց քաղաքագետ Արմեն Բադալյանը: Խոսելով հանրահավաքի արդյունավետության մասին՝ պրն. Բադալյանը ասաց. « Մարդկանց քանակի տեսակետից, այո՛, կարելի է այս հանրահավաքը արդյունավետ համարել, քանի որ ավելի շատ մարդ էր հավաքվել, քան նախորդի ժամանակ: Եվ, փաստորեն, երեկվա հանրահավաքում հնչած ելույթները ցույց տվեցին, որ շարժումը սկսում է կամաց-կամաց կազմակերպչական բնույթ ստանալ: Այսինքն, եթե նայում ենք մարդկանց քանակի և ինստիտուցիոնալիզացիայի տեսակետից, ապա կարող ենք ասել, այո, արդյունավետ է եղել»:
Հանրահավաքի ժամանակ Րաֆֆի Հովհաննիսյանի և Գագիկ Ծառուկյանի՝ ազատամարտիկների նստացույցի վերաբերյալ ելույթային հակասությունների մասին պրն. Բադալյանը ասաց հետևյալը. «Դա հակասություն չէր: Քանի որ սա նոր ձևավորվող շարժում է, բնական է, որ շարժման գործելակերպի մեջ տարբեր մոտեցումներ կարող են լինել: Եռյակի հիմնական գործելակերպը այն է լինելու, ինչ որ որոշել են ԲՀԿ-ն , ՀԱԿ-ը և Ժառանգությունը միասին: Իսկ Ժառանգության լիդերը ուղղակի տարբեր մոտեցումներ կարող է ունենալ այս կամ այն հարցի վերաբերյալ: Դա նորմալ է, հակասություն համարել չի կարելի: Սրանք ընդամենը մոտեցումների տարբերություններ են, որոնք այս պահին նպատակահարմար չգտնվեց իրականացնել, բայց դա չի նշանակվում, որ հետագայում նույնպես նստացույցը նպատակահարմար չի համարվի: Այսինքն՝ հակասություններ եռյակի մեջ, որպես այդպիսին, չկան: Կան կոնկրետ քայլերի և նրանց ժամանակի վերաբերյալ տարբերություններ»: Բադալյանը նաև նշեց, որ «եռյակից խարիզմատիկը միանշանակ հանրապետության առաջին նախագահն է: Իսկ վարկանիշի տեսանկյունից չենք կարող ասել, դժվար է այս հարցին ճշգրիտ պատասխանելը: Սա ավելի շատ ցանցային պայքար է, որտեղ լիդերները այդքան մեծ նշանակություն չեն ունենում: Այստեղ կարևոր է ցանցերի ձևավորումը, ցանցի աշխատանքը, թե ով ավելի լավ կազմակերպչական աշխատանք կդրսևորի»: