Քաղաքական որոշում պետք է լինի

Մամուլում տեղ գտած հրապարակումներից մեկում նշվում է, որ Հանրապետական կուսակցության երևանյան թիմը ցանկանում է Գյումրիի ՏԻՄ ընտրություններում ՀՀԿ ավագանու ցուցակը գլխավորի գործող քաղաքապետ Սամվել Բալասանյանը, մինչդեռ Գյումրիի կառույցում նրա թեկնածությանը կտրուկ դեմ են՝ համարելով նրան թույլ թեկնածու:
ՀՀԿ Գյումրիի կառույցում մի մասը ցանկանում է, որ իրենց ցուցակը գլխավորի ԱԺ պատգամավոր Սուքիաս Ավետիսյանը, մյուս մասը կողմնակից է ՀՀԿ մարզային կառույցի ղեկավար Սահակ Մինասյանի թեկնածությունը:
ԱԺ Հանրապետական խմբակցության պատգամավոր Սուքիաս Ավետիսյանին այս լուրը զարմացրեց: Նա կամ իսկապես տեղյակ չէր նման խոսակցությունների մասին, ինչպես ինքը նկատեց, կամ էլ պարզապես փորձեց զգուշավոր լինել իր պատասխաններում: Համենայնդեպս` Սուքիաս Ավետիսյանը Fnews.am-ի հետ զրույցում նկատեց, որ շրջանառվող տեղեկություններն ահիմն են:

«Ո’չ իմ անվան շուրջ ու ո’չ էլ առհասարակ ՀՀԿ ցուցակը գլխավորելու հետ կապված որևէ թեկնածուի առաջադրման շուրջ որևիցե քննարկումներ չեն եղել: Ես զարմանում եմ, թե որտեղի՞ց այդ տեղեկությունները: Մենք այդ թեմայով ընդհանրապես քննարկումներ չենք արել, իսկ եթե չկան քննարկումներ, ապա շրջանառվող տեղեկություններն ահիմն են: Պետք է ինչ որ բան քննարկվի, լինեն առաջարկություններ, որոնց հիման վրա էլ նման հրապարակումներ լինեն»,- նկատեց հանրապետական պատգամավորը:
Հարցին, թե տեսնո ՞ւմ է արդյոք Սուքիաս Ավետիսյանն իրեն քաղաքապետի պաշտոնում, վերջինս նկատեց, որ եթե իրեն պետք լիներ վաղուց կարող էր զբաղեցնել այդ պաշտոնը, հատկապես, որ այդ համակարգում երկար տարիներ աշխատել է:
«Դա քաղաքական որոշում պետք է լինի, դա թիմը պետք է որոշի ու այնպես չէ, որ ես հենց էնպես տեսնում եմ ինձ քաղաքապետ, կամ չեմ տեսնում… Երբ կքննարկվի, թիմը որոշում կկայացնի, ու իմ թեկնածություննը  կառաջադրի և դա վերջնական կլինի, ապա ես պարտավոր եմ ենթարկվելու թիմի որոշմանը, և ես էլ իմ մեջ ուժ տեսնում եմ, որ կարող եմ զբաղվեմ այդ ծանր աշխատանքով» ,-ասաց Սուքիաս Ավետիսյանը:

Հարցին, թե ի՞նչ ժառանգություն կստանա եկող քաղաքապետն իր նախորդից, իշխանական կուսակցության ներկայացուցիչը դարձյալ զգուշավոր պատասխան հնչեցրեց:
«Բնական է խնդիրները շատ են, բայց յուրաքանչյուր քաղաքապետ իր ժամանակահատվածում որոշակի խնդիրների լուծում տվել է և կարծում եմ, որ օր-օրի քաղաքի տեսքը փոխվում է և կարելի է զարգացման միտումներ նույնպես նկատել: Այնպես որ ոչ մեկը որևիցե մեկին վատ ժառանգություն չի թողնում... Դա համայնք է ` իր խնդիրներով»,-ասաց Սուքիաս Ավետիսյանը: