19 Սեպտեմբեր, 2013

Քաղաքապետարանում քննարկվել է մետրոպոլիտենի զարգացման հարցը

Վերակառուցման եւ զարգացման եվրոպական բանկի հետ մեր համագործակցությունը միշտ բարձր մակարդակի վրա է եղել: Այս մասին, Վերակառուցման եւ զարգացման եվրոպական բանկի մունիցիպալ ծրագրի թիմի անդամների հետ հանդիպման ժամանակ նշել է Երեւանի քաղաքապետ Տարոն Մարգարյանը: Քաղաքապետարանի մամուլի ծառայությունից հայտնում են, որ հանդիպման շրջանակում ՎԶԵԲ-ի տարածաշրջանային տնօրեն Բրունո Բալվաներան քաղաքապետին է ներկայացրել բանկի երեւանյան գրասենյակի նորանշանակ տնօրեն Մարկ Դեյվիսին: Շնորհավորելով պաշտոնը ստանձնելու կապակցությամբ՝ քաղաքապետ Տարոն Մարգարյանը հույս է հայտնել, որ Երեւանի քաղաքապետարանի եւ բանկի միջեւ առկա գործակցային կապերն էլ ավելի կամրապնդվեն եւ կընդլայնվեն: «Համոզված եմ, որ այն բոլոր ծրագրերը, որոնք իրականացվում են Երեւանի քաղաքապետարան-ՎԶԵԲ շրջանակում, հաջողությամբ կշարունակվեն: Երեւանի քաղաքապետարանն իր լիազորությունների շրջանակներում պատրաստակամ է շարունակել իր աջակցությունը համատեղ փոխշահավետ ծրագրերի իրականացման ուղղությամբ»,- ընդգծել է Տարոն Մարգարյանը: Շնորհակալություն հայտնելով բարեմաղթանքների եւ ջերմ ընդունելության համար՝ Մարկ Դեյվիսը հավաստիացրել է, որ, շարունակելով ձեւավորված գործակցային կապերի զարգացման ուղղությամբ քայլերը, Երեւանի քաղաքապետարանի եւ բանկի միջեւ համագործակցությունը էլ ավելի կակտիվանա: Տարոն Մարգարյանը համատեղ արդյունավետ աշխատանքի համար շնորհակալություն է հայտնել նաեւ նախկին տնօրեն Վալերիու Ռազլոգին՝ մաղթելով աշխատանքային նորանոր հաջողություններ: Անդրադառնալով Երեւանի մետրոպոլիտենի զարգացման ներդրումային ծրագրի ընթացքին՝ Տարոն Մարգարյանն ընդգծել է, որ մետրոպոլիտենի զարգացումը մայրաքաղաքի համար ռազմավարական կարեւորություն ունի: Քաղաքապետը նաեւ նշել է, որ ծրագրի իրականացման նպատակով մասնագիտական հաշվարկների առկայությունը հնարավորություն կտա առավել հստակ պատկերացում կազմել մետրոպոլիտենի ընդլայնման մասին: «Դեռ տարիներ առաջ, մասնավորապես մետրոպոլիտենի՝ դեպի Աջափնյակ ուղղություններով զարգացման նպատակով քննարկվել եւ որոշակի քայլեր էին ձեռնարկվել: Մետրոպոլիտենի զարգացումն այսօր մեզ համար քաղաքային տնտեսության առաջնային խնդիրներից մեկն է, որի շուրջ պատրաստ ենք քննարկել կառուցողական ցանկացած առաջարկություն»,-հավելել է Տարոն Մարգարյանը: Ընդունելով ներկայացվող առաջարկները՝ բանկի երեւանյան գրասենյակի նորանշանակ տնօրենն իր պատրաստակամությունն է հայտնել՝ հնարավորին աջակցել ծրագրի իրագործմանն ու աշխատանքների ակտիվացմանը: