ՔԿ վարույթում քննվում է 9 քրգործ այլ անձի փոխարեն քվեարկելու դեպքով, կա 1 մեղադրյալ, 5 կասկածյալ

Քննչական կոմիտեն տեղեկացնում է, որ ընտրախախտումների վերաբերյալ կոմիտեի Լոռու մարզային քննչական վարչությունում ստացված հաղորդումներում, մամուլի հրապարակումներում մատնանշված հանգամանքներն ստուգելու ուղղությամբ ձեռնարկված անհրաժեշտ դատավարական գործողությունների արդյունքում հարուցվել է երկու քրեական գործ՝ մեկից ավելի անգամ քվեարկելու փորձ կատարելու դեպքերի առթիվ:

Ըստ հաղորդագրության, Քննչական կոմիտեի Լոռու մարզային քննչական վարչությունում հաղորդում է ստացվել ընտրողի կողմից թիվ 23/02 ընտրատեղամասում մեկից ավելի անգամ քվեարկելու փորձի մասին։ Ձեռնարկված միջոցառումների արդյունքում պարզվել է, որ թիվ 23/02 ընտրատեղամասի ընտրող Ա .Հովհաննիսյանը ապրիլի 2-ի առավոտյան, օրենքով սահմանված կարգով, մասնակցել է ԱԺ ընտրություններին, սակայն քվեարկությունը կատարելուց որոշ ժամանակ անց կրկին գնացել է նույն ընտրատեղամաս և փորձել նորից գրանցվել՝ քվեարկելու համար։ Նույնականացման սարքի ազդանշանն անմիջապես միացել է, որի արդյունքում հանձնաժողովը կանխել է մեկից ավելի անգամ քվեարկելու փորձը:

Նկատի ունենալով, որ նախապատրաստված նյութերում առկա են Քրեական օրենսգրքի 34-153-րդ հոդվածով քրեական գործ հարուցելու առիթ և հիմք` ՀՀ ՔԿ Լոռու մարզային քննչական վարչությունում հարուցվել է քրեական գործ:

«Քննչական կոմիտեի Լոռու մարզային քննչական վարչությունում հաղորդում է ստացվել թիվ 25/20 ընտրատեղամասում մեկից ավելի անգամ քվեարկելու փորձ կատարվելու մասին։ Ձեռնարկված միջոցառումների արդյունքում պարզվել է, որ թիվ 25/20 ընտրատեղամասում վստահված անձ գրանցված Բ. Բարսեղյանը որպես ընտրող, օրենքով սահմանված կարգով͵ ապրիլի 2-ին նշված ընտրատեղամասում մասնակցել է ԱԺ ընտրություններին͵ սակայն որոշ ժամանակ անց՝ ժամը 20-ի սահմաններում, փորձել է նորից գրանցվել՝ քվեարկելու համար։ Նկատի ունենալով, որ նախապատրաստված նյութերում առկա են Քրեական օրենսգրքի 34-153-րդ հոդվածով քրեական գործ հարուցելու առիթ և հիմք` ՀՀ ՔԿ Լոռու մարզային քննչական վարչությունում հարուցվել է քրեական գործ», - ասված է հաղորդագրությունում:

Այսպիսով՝ ապրիլի 5-ի դրությամբ, Քննչական կոմիտեի տարածքային ստորաբաժանումներում քննվում է 9 քրեական գործ` ապրիլի 2-ին այլ անձի փոխարեն քվեարկելու դեպքերի առթիվ, որոնցից 6-ը՝ մարզերում (1-ական քրեական գործեր՝ Սյունիքում͵ Վայոց ձորում, Արմավիրում, Շիրակում͵ 2-ը՝ Լոռիում), 3-ը՝ Երևանում: 1 անձ ներգրավվել է որպես մեղադրյալ, 5-ը՝ կասկածյալ։