Քննչական կոմիտեն ընդգրկվեց պետական և ծառայողական գաղտնիքն ապահովող կառույցների ցանկում

Քննչական կոմիտեի նախագահի պաշտոնը, ՀՀ կառավարության այսօր ընդունած որոշմամբ, ներառվեց տեղեկատվությունը պետական և ծառայողական գաղտնիքի շարքը դասելու լիազորություններով օժտված պետական մարմինների պաշտոնատար անձանց ցանկում:

«Քննչական կոմիտեի կազմավորումից հետո իրականացվում են ակտիվ միջոցառումներ կառույցի աշխատանքները գործող օրենսդրությանը համապատասխան կազմակերպելու ուղղությամբ, և այս տեսակետից «անհրաժեշտ և առանցքային նշանակություն ունի կառույցի գաղտնիության ռեժիմի ապահովումը»»,-գործադիր մարմնի նիստի ժամանակ որոշման նախագիծը ներկայացնելիս ասաց Արդարադատության նախարար Հովհաննես Մանուկյանը:

Նշենք, որ մինչ այժմ պետական և ծառայողական գաղտնիքի պաշտպանության լիազորությամբ էին օժտված սահմանադրական դատարանը, դատական, քննչական և դատախազական մարմինները:

Այս պետական մարմիններն իրենց գործունեության ընթացքում ապահովում են պետական և ծառայողական գաղտնիքի պաշտպանություն, սահմանում են պետական և ծառայողական գաղտնիքի պաշտպանության ապահովման ուղղությամբ պաշտոնատար անձանց արտոնությունները, մշակում են գաղտնագրման ենթակա տեղեկությունների ընդլայնված գերատեսչական ցանկերը:

Մեկ այլ որոշմամբ էլ կառավարությունն այսօր Քննչական կոմիտեի նախագահին օժտեց գաղտնիության ռեժիմի ապահովման լիազորությամբ: Որոշումն ուժի մեջ մտնելուց հետո, մեկամսյա ժամկետում քննչական կոմիտեն պետք է մշակի գաղտնագրման ենթակա տեղեկությունների ընդլայնված գերատեսչական ցանկը: