Րաֆֆին կվնասի՞ համաժողովրդական շարժմանը.

«Հրապարակ» թերթը գրում է. «Ոչ իշխանական եռյակի քաղաքական պայքարը խորհրդավոր լռության փուլ է մտել: ԲՀԿ-ից մեկնաբանում են, թե զբաղված են արտախորհրդարանական քաղաքական ուժերի ու ՀԿ-ների հետ բանակցություններով: Միակ հայտնի իրադարձությունը դեկտեմբերի 10-ին կայանալիք ՀԱԿ-ի ամենամյա երթն է՝ Մարդու իրավունքների պաշտպանության օրվա առթիվ, որը միացյալ եռյակի օրակարգից բխող միջոցառում չէ: Եվ մինչ նրանք կպատրաստվեն այս երթին, Րաֆֆի Հովհաննիսյանն առաջ ընկավ՝ նոյեմբերի 21-ին ասուլիս հրավիրելով և հայտարարելով, որ պատրաստվում է դեկտեմբերի 5-ին Ազատության հրապարակում, 6-ին Վանաձորում և Գյումրիում սեպարատ հավաքներ անել: Սրանք եռյակում իր՝ ավելորդի կարգավիճակը հաղթահարելուն ուղղված քայլեր են: Եթե նման հայտարարություններ թույլ տային ՀԱԿ-ը կամ ԲՀԿ-ն, լրահոսը կհեղեղվեր եռյակի ապահարզանի վերաբերյալ վերլուծություններով, Րաֆֆի Հովհաննիսյանի ինքնագործունեության կապակցությամբ արձագանք գրեթե չկա: Անգամ նրա առաջարկած հռչակագիրը լուրջ չընդունեցին, ուստի «Ժառանգության» առաջնորդն անցավ վճռական գործողությունների: Ըստ Րաֆֆի Հովհաննիսյանի, եռյակում միասնական օրակարգ չկա. «Միաժամանակ պետք է ասեմ, որ հրապարակի դիմաց կա հարթակ, որը տակավին միացյալ չէ, հոկտեմբեր ամսին եղել են հրապարակային երկու հավաքներ, ինչպես գիտեք, շատ լավ հավաքներ, որից լիցքավորվել է ժողովուրդը, և դա համարում եմ արժեք, որը պետք է պահպանվի, բայց, միաժամանակ, մենք պիտի ունենանք այդ տղամարդկությունը, շիտակությունը՝ ասելու համար, որ որոշ հարցեր կան, որոնք մնում են բաց: Հրապարակային գործունեության շարունակականության խնդիրը, շարժման սկզբունքների հրապարակայնացման հռչակման հարցը, որոշումների կայացման անհրաժեշտության հարցը: Չկա վերջնական համաձայնություն ոչ հռչակագրի հուշագրի վերաբերյալ, ոչ էլ հրապարակային գործունեության մասին»: Հովհաննիսյանի սրտնեղումներին հետևց ԲՀԿ-ի արձագանքը. «Քաղաքական ուժերից յուրաքանչյուրի իրավունքն է ինքնուրույն կազմակերպել ցանկացած զանգվածային և հրապարակային միջոցառում»: Նկատելի է, որ «Ժառանգության» մնալը կամ հեռանալը եղանակ չի փոխում եռյակում, ավելին՝ տուժողը հենց «Ժառանգությունն» է լինելու. դուրս գա, որ ի՞նչ անի:

«Ժառանգության» անդամները երեկ խուսափում էին կարծիք հայտնելուց, տեղյակ չէին կամ չէին հասկանում առաջնորդի ծրագրերի իրական պատճառը, նպատակն ու հեռանկարները: «Որևէ մեկնաբանություն Հովհաննիսյանի ելույթի վերաբերյալ չեմ անելու, ինքը խոստացել է առաջիկա 7 օրվա ընթացքում խոսել: Ես իմ կարծիքը շատ ազատորեն արտահայտում եմ մեր վարչության նիստում, բայց լրագրողների համար կխոսի պարոն Հովհաննիսյանը»,-մեզ հետ զրույցում հայտարարեց կուսակցության փոխնախագահ Արմեն Մարտիրոսյանը: Ինչպես տեսնում ենք, ՀԱԿ-ԲՀԿ ոչ թափանցիկությունը քննադատող կուսակցությունում աշխատում են նույն ձեռագրով: Կարելի՞ է ասել՝ Րաֆֆի Հովհաննիսյանը գաղափարական տարաձայնություններ ունի մյուս առաջնորդների հետ և առանձին պայքար մղելու տակտիկա է մշակում: «Ինքը կմեկնաբանի իր ասածներն առաջիկա 7-10 օրվա ընթացքում»:

Եռյակի միասնական օրակարգից քաջատեղյակ Միքայել Մելքումյանը չի բացառում, որ Րաֆֆու առաջարկած հռչակագիրը դեռ կքննարկվի: «Նախ պետք է մտնի եռյակի օրակարգ, քննարկվի, նոր ընդհանուր հայտարարի կգանք: Սա չի նշանակում, որ ամեն մի կուսակցություն պիտի իր գործունեությունը դադարեցնի»: Մելքումյանը նրա պահանջների բովանդակությունը չցանկացավ քննարկել. «Հակասությունները մի կողմ են դրվել, ու կոնկրետ հարցերի շուրջ ենք միավորվել, որը չի հակասում ռազմավարական խնդրի լուծմանը: Ես խնդիր չեմ տեսնում, որ այդ հակասություններն են նման որոշման տեղիք տվել»:

Մանրամասները՝ թերթի այսօրվա համարում