Ռուսական ՄիԳ-29 կործանիչները վարժանքներ են անցկացրել Հայաստանի երկնքում. Հարավային ռազմական շրջան

Ռուսական Էրեբունի ավիաբազայի ՄիԳ-29 կործանիչների անձնակազմերը Հայաստանի երկնքում վարժանքների ընթացքում որսացել են պայմանական հակառակորդի թիրախները։ ՏԱՍՍ-ի փոխանցմամբ՝ այս մասին լրագրողներին հայտնել են Հարավային ռազմական շրջանի մամուլի ծառայությունում։
«Հարավային ռազմական շրջանի՝ Հայաստանում տեղակայված Էրեբունի ռազմաօդային բազայի ՄիԳ-29 կործանիչների անձնակազմերը ուսումնական թռիչքների ժամանակ որսացել են պայմանական հակառակորդի օդային թիրախները»,- ասվում է հաղորդագրության մեջ։
Մամուլի ծառայությունից պարզաբանել են, որ որսված թիրախները եղել են հակառակորդի ինքնաթիռների նմանակում։ Ավիացիոն զույգերի կազմում ռազմական օդաչուները, լեռներում բարդ օդերևութաբանական պայմաններում, կատարել են պարզ և բարդ աերոբատիկական տարրեր:
Զինծառայողները իրականացրել են նաև ներխուժող ինքնաթիռների հարկադիր վայրէջք։
2021 թվականին ՄիԳ-29 կործանիչներով ավիաբազայի օդաչուները կատարել են ավելի քան 1200  ուսումնական և մարտական պատրաստության առաջադրանք: