Սահմանին կանգնած երիտասարդ հայ զինվորի թիկունքը պետք է ամուր լինի

Մենուա Հարությունյանը ֆեյսբուքյան իր էջում գրել է.

Եթե ամփոփելու լինենք անցնող տարին, ապա շատ դժվար է այն անվանել խաղաղության տարի: Թեև գործում էր զինադադարի ռեժիմ, բայց ղարաբաղա-ադրբեջանական սահմանին ամեն ժամ, ամեն րոպե լարվածություն էր տիրում: Ցավոք մենք ունեցանք մարդկային կորուստներ, հակառակորդը՝ մի քանի անգամ ավելի շատ, բայց փաստը մնում է փաստ, որ թեկուզ մեկ անգամ Հայաստանն ու Արցախը նախահարձակ չեղան, չխախտեցին հրադադարի ռեժիմը և բոլոր դեպքերում հայ զինվորը ուղղակի պաշտպանեց մեր պետության սահմանը ագրեսոր հարևանից:
Թվում էր, թե արտաքին վտանգը բոլորիս կմիավորի հայրենիքին ծառահելու գաղափարի և պետության Գերագույն գլխավոր հրամանատարի շուրջ, բայց ցավոք մեզանում շատ են արկածախնդիրները, շատ են սեփական ամբիցիաների համար ամեն ստորության գնացող քաղաքական տարրերը, ովքեր արտաքին վտանգը անտեսելով՝ ողջ տարվա ընթացքում փորձեցին ապակայունացնել Հայաստանի ներքաղաքական կյանքը:
Դա չհաջողվեց ոչ միայն այն պատճառով, որ իշխանությունն ուժեղ է, որ իրենք հասարակական լայն աջակցություն և գաղափարական հենք չունեն, այլ նախևառաջ այն պատճառով, որ Հայաստանի պարզ քաղաքացին շատ ավելի շատ է սիրում իր պետությունը, շատ ավելի շատ է հասկանում այն իրավիճակը, որում հայտնվել է Հայաստանը, շատ ավելի խորիմաստ է, քան այդ ժողովրդին տարիներ շարունակ թալանած, հարստահարած և այսօր այդ ժողովրդի անունից մեծ-մեծ խոսացող քաղաքական արկածախնդիրները:

Հ.Գ. Սահմանին կանգնած երիտասարդ հայ զինվորի թիկունքը պետք է ամուր լինի, իսկ քաղաքականությամբ զբաղվող և պետական պաշտոններ զբաղեցնող անհատները առավել զգոն և պատասխանատու պետք է լինեն այդ հարցում: