Սարալանջի կրակոցները յուրօրինակ վենդետա էր «Շարլոտ»-ի տերերի դեմ

Օրերս «Շարլոտ»-ի ծեծկռտուքի գործով հարցաքննվել է Կարեն Կարապետյանը, ով Կենտրոնի հարկային տեսչության պետն էր և աշխատանքից ազատվել էր դեպքից անմիջապես հետո:

Այս մասին տեղեկացնում է «Հրապարակ»-ը՝ միաժամանակ հիշեցնելով, որ Կ.Կարապետյանը նախկին զինկոմի տեղակալ Գագիկ Կարապետյանի որդին է և վարչապետի խորհրդական Կովալենկո Շահգալդյանի զարմիկը:

Թերթը հիշեցնում է դեպքի մանրամասները, մասնավորապես այն, որ Կ.Կարապետյանը, Ֆինանսների նախարար Գագիկ Խաչատրյանի եղբոր որդի Կարեն Խաչատրյանը, ԱԱԾ նախկին աշխատակից Արսեն Ղազարյանը զվարճացել են ակումբում, հետո կոնֆլիկտի մեջ մտել «Շարլոտ»-ի տերերի հետ, ինչն էլ վեր է ածվել ծեծկռտուքի:

Ինչպես նշում է լրատվամիջոցը, ոստիկանությունը գործ հարուցեց խուլիգանության հոդվածով և ծեծկռտուքին մասնակցելու կասկածանքով բերման ենթարկվեցին միայն ակումբի տերերը: Ըստ թերթի՝ պաշտոնյաների մասին ոչ մի խոսք:

Եվ ահա, թերթի տեղեկացմամբ, երեկ Կարեն Կարապետյանը հրավիրվել է ՀՔԾ՝ հարցաքննության, սակայն նրա կարգավիճակը պարզ չէ:
Լրատվամիջոցի աղբյուրներն ասել են, որ դեպքի մասնակիցները բացատրություններ են տվել: Ի պատասխան լրատվամիջոցի հարցմանը՝ ՀՔԾ-ից հայտնել են, որ միջադեպի մասնակիցների կարգավիճակի մասին տեղեկությունները վարույթն իրականացնող մարմինը համարում է նախաքննական գաղտնիք և հրապարակման ոչ ենթակա:

Իսկ լրատվամիջոցի աղբյուրները փոխանցում են, որ Կ.Կարապետյանի հարցաքննությունը կապված է մեկ այլ քննության՝ սեպտեմբերի 30-ին Սարալանջում հնչած կրակոցների հետ: Այդ օրը ոտքի շրջանում հրազենային վիրավորում էր ստացել Լևոն Հարությունյանը, ով «Շարլոտ»-ի տիրոջ որդին է: Այս կրակոցների փաստով քրեական գործ էր հարուցվել և նույն օրը երկու դեպքերը՝ «Շարլոտ»-ի ծեծկռտուքը և Սարալանջի կրակոցները, անմիջապես կապել էին իրար:

«Մեր տեղեկություններով՝ Սարալանջի կրակոցները յուրօրինակ վենդետ էր «Շարլոտ»-ի տերերի դեմ, իսկ Կարեն Կարապետյանը հզոր հովանավոր ունի Ռուսաստանում, որի մարդիկ ուղղակի կապ ունեն Սարալանջի կրակոցների հետ»,- եզրափակում է թերթը:

Հոդվածն ամբողջությամբ կարող եք կարդալ «Հրապարակ» օրաթերթի` 17.10.2014թ. համարում: