Սա ուղղակի Խաչիկ Ասրյան տեսակի արձագանքն է եղել

Նախօրեին ՀՀ սպորտի և երիտասարդության հարցերով փոխնախարար, «Հայոց արծիվներ» կազմակերպության նախագահ Խաչիկ Ասրյանը, մեկնաբանելով նախորդ շաբաթ Ստրասբուրգում Սերժ Սարգսյանին ուղղված կազինոյում խոշոր գումար տանուլ տալու վերաբերյալ Փոստանջյանի սկանդալային հարցը, ասել էր. «Փոստանջյանին պետք է այրել խարույկի վրա»: Թեպետ դրանից հետո Խաչիկ Ասրյանը հանդես եկավ պարզաբանմամբ ու հայտարարեց, որ ինքը «խարույկի վրա այրել» արտահայտությունն օգտագործել է ոչ թե ուղղակի, այլ փոխաբերական իմաստով՝ նկատի ունենալով երևույթը, սակայն Փոստանջյանը, ամեն դեպքում, դիմել է իրավապահներին: Այս համատեքստում Hayeli.am-ը զրուցել է Խաչիկ Ասրյանի հետ, որն էլ, մասամբ, ներկայացնում ենք.

Պարո՛ն Ասրյան, «Ժառանգություն» խմբակցության պատգամավոր Զարուհի Փոստանջյանը դիմել է ՀՀ ոստիկանապետ Վլադիմիր Գասպարյանին՝ խնդրելով ապահովել իր և իր ընտանիքի անվտանգությունը Խաչիկ Ասրյանից, այսինքն՝ Ձեզնից: Փաստորեն, տիկին Փոստանջյանը, Ձեր հայտնի հայտարարությունից հետո վախենո՞ւմ է Ձեզնից: -Նախ միանգամից ուզում եմ մերժել Ձեր հարցադրման մեջ վախի հասկացողությունը: Զարուհի Փոստանջյանը կարիք չունի ինձանից վախենելու, որովհետև Խաչիկ Ասրյանն ու «Հայոց արծիվները» կոչված են մինչև արյան վերջին կաթիլը ապահովելու և պաշտպանելու ցանկացած հայ կնոջ, հայ մոր և հայ ընտանիքի անվտանգությունն ու պատիվը: Ես իմ տեսակով հայ կնոջը պաշտպանող եմ, ոչ թե վախեցնող: Ի գիտություն Զարուհի Փոստանջյանի՝ որևէ  հայ կին, այդ թվում նաև ինքը, կարիք չունի իր և իր մերձավորների անվտանգությունն ապահովել ինձանից, քանի որ ես ինքս իմ տեսակով և գործունեությամբ, «Հայոց արծիվներ» հայրենասիրական շարժման հետ միասին եղել եմ անվտանգության երաշխավորի դերում՝ մշտապես հայոց բանակի կողքին լինելով, նպաստելով հայոց  բանակի, հայ զինվորի հայրենասիրական և մարտական ոգին բարձր պահելու սուրբ գործին: Ուզում եմ մեկ անգամ ևս հիշեցնել, որ ՀՀ ԱԺ պատգամավոր Զարուհի Փոստանջյանի լկտի պահվածքի վերաբերյալ իմ արած առաջին հայտարարությունից հետո /նկատի ունի, որ ասել էր «խարույկի վրա պետք է այրել»-խմբ./, որը շատերի մոտ թյուրըմբռնման տեղիք էր տվել, ունեցել եմ նաև երկրորդ հայտարարությունն ու մեկնաբանել, որ ես այդ արտահայտությունն օգտագործել եմ փոխաբերական իմաստով և նկատի եմ ունեցել Փոստանջյանի ոչ թե ֆիզիկական մարմինը, այլ երևույթը՝ նրա լկտի պահելաձևը:

Պարո՛ն Ասրյան, Դուք միակ իշխանական ներկայացուցիչը չեք, ով հանդես եկավ Զարուհի Փոստանջյանի պահվածքի քննադատությամբ: ՀՀԿ երիտասարդներն էլ կոչ էին անում ձվեր և լոլիկներ շպրտել նրա վրա, թեպետ նման բան ի վերջո չարեցին: Ինձ հետաքրքիր է՝ այդ կտրուկ արձագանքները ինչ-որ տեղից ուղղորդված կամ հրահանգավորվա՞ծ էին, թե՞ ինքնաբուխ պոռթկում էր: -Իմ արտահայտած խոսքերը որևէ մեկի, առավել ևս Հանրապետական կուսակցության ղեկավար կազմի հետ խորհրդակցված կամ քննարկված չեն եղել: Դա ուղղակի Խաչիկ Ասրյան տեսակի արձագանքն է եղել: Ինձանից միշտ կարելի է սպասել նման հայտարարություն, եթե որևէ մեկը վիրավորում է իմ ազգի, պետության, նախագահի արժանապատվությունը: Ես նույնպես, ինչպես մնացածը, այդ թվում նաև նրանք, ովքեր եվրոպաներում առանց ամոթի պատրաստ են խայտառակել իրենց հայրենիքը, ունեն խոսքի ազատության և իմ կարծիքն արտահայտելու իրավունք:

Մանրամասներն` այստեղ: